Pambula kuswera yapa Khoti la muchigaŵa cha Minusinsk ku Krasnoyarsk liperekengi cheruzgu chaki pa mulandu wa Mubali Dmitriy Maslov. *

Dmitriy Maslov

• Chaka cho Wakuwiya: 1976 (Ku Minusinsk)

• Mo Wakukuliya: Iyu, mvurwa waki kweniso mzichi waki akulereka ndi anyinawu pe. Wakumaliza sukulu ndipu we ndi digili ya ulimi wa njuchi. Wagwiranga ntchitu ya upulambala. Watanja kwendesa njinga, kusambira mumaji ndipuso kumbisa kodiyoni

  Kutuwa pa unamana waki wajifumbanga mafumbu ngakukwaskana ndi chilatu cha umoyu. Wangukhorwa ndi vo wangusaniya mu Bayibolu ndipu wangubatizika mu 1994. Wati wadanika kuti wakasere usilikali, iyu wangukana chifukwa cha vo wagomezga ndipu wangupempha kuti wapaskiki waka ntchitu zinyaki. Wakutolana ndi Yuliya mu 1997

Mazulu nga pa 19 April 2019, ku Minusinsk, asilikali kweniso ŵanthu anyaki amu Komiti yo yifufuza milandu ku Russia ndipuso apolisi a gulu la Federal Security Service (FSB) angufufuza nyumba zinkhondi za Akaboni aku Yehova. Pa nyengu yo afufuzanga, mubali wakukota wa vyaka 76 angumututuzga ndipu wakupwetekeka. Abali ndi azichi akujumpha 30 anguŵato kuti akaŵafumbi mafumbu ndipu pakumaliya paki anguwatuzga. Pavuli paki, Mubali Dmitriy angumusaniya ndi mulandu. “Mulandu” waki ngwakuti wakambiskana nkhani za mu Bayibolu ndi mabwezi ngaki.

Dmitriy, akumukambiya kuti wangatuwanga cha mucharu chaki ndipu walindizga mulandu waki. Anyina wo mbakaboni aku Yehova cha awona kuti khoti likuyeruzga mwambula urunji kweniso palivi chifukwa chakuti mwana wawu wambiki mulandu. Yiwu aziŵa kuti mwana wawu we “mu chisopa cho chichita vinthu mwachimangu ukongwa.”

Dmitriy wapembuzgika kweniso waja ndi chiganga chifukwa chakuziŵa kuti Yehova “walongo nthazi zaki” ku ŵanthu ŵaki akugomezgeka.—2 Mbiri 16:9.