AUGUST 5, 2021
RUSSIA

Mubali Dmitriy Terebilov Angamuyeruzga Kuti Wakaje Mujeri Kachinkhondi, Kweni Ulendu uwu Uŵengi Wakwamba Kumangika Chifukwa Cha Chivwanu Chaki

JULANI

Nyengu yo Khoti Liyeruzgiyengi Mulandu

● Pa 6 September 2021, Khoti la Sverdlovskiy lo le mutawuni ya Kostroma likuyeruzga kuti Mubali Dmitriy Terebilov wakaje mujeri kwa vyaka vitatu. Ŵati amuyeruzga waka Mubali Dmitriy, anguluta nayu mujeri nyengu yeniyo
● Pa 8 September 2020

Khoti lingumujuliya mulandu mubali Dmitriy
● Pa 25 May 2020

Mubali Dmitriy akumusaniya ndi mulandu ndipuso akumukaniza kuti wangatungamu cha mucharu chaki kuluta mucharu chinyaki
● Pa 19 September 2019

Mubali Dmitriy akumujaliya makhadi nga ku banki
● Pa 13 June 2019

Khoti lingwamba kumumba mulandu Dmitriy chifukwa chakugaŵiya mabuku ngakukanizika ndipuso kuchita maunganu nga gulu lo likukanizika
● Pa 25 July 2018

Nyumba ya mubali Dmitriy yingufufuzika iyu ndi muwolu waki ŵati awe ku unganu ku Moldova. Yiwu ŵati afika waka kunyumba kwawu, apolisi anguŵamanga ndi kuŵafumba mafumbu

Vakukwasakana ndi Munthu Uyu

Dmitriy Terebilov

Chaka cho Wakuwiya: 1980 (ku Kostroma)

Mo Wakukuliya: Anyina akutayika iyu weche mwana. Weche mwana wayanjanga masaza nga ndewu. Wakumangika maulendu nganayi chifukwa cha munkhwala wakutimbanyizga wongu

Wangusambira Bayibolu kuziya mukalata yo wangulonde we mujeri mu 2010. Wakutuzgika mujeri mu 2013. Wakubatizika mu 2014. Wakutorana ndi Irina mu 2015. Yiwu atanja kuchitembeya, kukwera mapiri ndipuso kutchova njinga limoza

Vo Dmitriy Wangumuka Wati Wafumbika

Kumbi Akaboni aku Yehova munguŵaziŵa wuli?

Ndingwamba kuziŵa Akaboni aku Yehova pa nyengu yo ndenga mujeri ulendu wachinayi chifukwa cha munkhwala wakukanizika. Mu August 2010, ndingulonde kalata yangu yakwamba kutuliya kwa mubali wa ku Udmurtia. Pa vyaka vosi vo ndenga mujeri iyu wandiwovyanga, wandilembiyanga makalata ndipuso wanditumiziyanga mabuku. Teche mabwezi ngapamtima mpaka sonu

Ndingutuzgika pa 21 June 2013, ndati ndamaliza vyaka vo angundilangiya. Ndingusamiya ku Kostroma ndipu ndingukumana ndi Akaboni aku Yehova

Ntchinthu wuli cho chakuwovyani kuti mulutirizgi kuja akukondwa ndipuso kuti muleki kufipa mtima ukongwa?

Unganu wa Chigaŵa wo tingulutaku mu 2018 wenga wa mutu wakuti “Jani ndi Chiganga!” Tati tawe ku unganu, tingwamba kugwiriskiya ntchitu vo tingusambira. . . . Ndikumbuka vo vinguchitika tati taweku [ko anguchitifumba mafumbu apolisi ŵati afufuza kachiŵi kunyumba kwidu]. Tati tafika, tinguwona abali ndi azichi anandi wo anguza mwaliŵiliŵi kunyumba yidu ŵati aziŵa waka kuti kunyumba kwidu apolisi azifufuzaku. Venivi vipereka so ukaboni wakukwana wakuti Yehova we nasi

Kumbi mutuvwa wuli asani muŵanaŵaniya kuti muweriyengeku so kujeri pa nyengu iyi chifukwa cha chivwanu chinu?

Kuwona mo Yehova wandiwovye pa nyengu yosi yeniyi ndipuso mo watovye abali ndi azichi wo ŵe mujeri chifukwa cha chivwanu chawu, vitindiwovya kuti ndileki kukayikiya kuti wandiwovyengi kweniso wawovyengi banja langu. Ndingutuwa kujeri nde ndi mtima wakusimikiza kuti: ‘Ndikhumba kuja Kaboni waku Yehova.’ Palivi cho chasintha kutuwa pa nyengu yo.

Po mubali Dmitriy walutirizga kukondwa chifukwa ‘chakunyozeka chifukwa cha zina laku Khristu,’ tigomezga kuti “mzimu wa unkhankhu wo ndi mzimu waku Chiuta, we paku” iyu.—1 Peturo 4:14.

NKHANI