Pambula kuswera yapa, Khoti la Tsentralniy ku Chelyabinsk liperekengi cheruzgu chaki pa mulandu wa Mubali Dmitriy Vinogradov. *

Dmitriy Vinogradov

• Chaka cho Wakuwiya: 1963 (Ku Chelyabinsk)

• Mo Wakukuliya: Wakulereka ndi anyina pe nthengwa yati yamala ndi awisi. Watanja ukongwa kutchaya chess ndipu wanguja kaswiri wa masaza ngenanga. Wasambiza chess pa sukulu yinyaki ya pulayiveti. Wakutorana ndi Zhanargul mu 1990. Ŵe ndi ŵana anayi, ŵaŵi ŵeche anamana ndipu ŵechekuja nawu limoza

  Nyengu zosi wazizwanga kuti ntchifukwa wuli ŵanthu azeru ukongwa ananga charu ndipuso kupweteka anyawu. Wangusaniya kwamuka kwakukhorweska kutuliya mu Bayibolu. Wakubatizika mu 2014 kuja Kaboni waku Yehova

Chakukumaliya kwa chaka cha 2018, arara anyaki aboma anguŵakambiya kuti aje nge kuti nawu akhumba kuziŵa vinandi vakukwaskana ndi Bayibolu ndipu angwamba kukambiskana ndi Dmitriy. Pakufika mu January 2020, arara anguwona kuti vo akambiskananga kutuliya mu Bayibolu mbukaboni wakukwana wakuti amumbi mulandu. Pati pajumpha myezi yiŵi, arara angusere munyumba yaki ndikwamba kufufuza mweneku kulivi.

Dmitriy wasuzgika kuwona ndipu watama BP. Iyu wangukamba kuti: “Ubwezi wangu ndi Chiuta uthemba mo liŵavu langu liliri cha. Ndikondwa ukongwa ndi mo vinthu viliri pa umoyu wangu ndipu ndimalika kuti ndikamba ukaboni wa vo ndigomezga mukhoti.”

Nyengu zosi Dmitriy ndi banja laki aŵerenga Bayibolu ndi kuŵanaŵaniyapu pa vo aŵerenga, anozgeke, kusanirikapu ndipuso amukapu pa maunganu. Kwa vyaka vinandi, aja achichita venivi ndipu vaŵawovya kuja pa ubwezi wakukho ndi Yehova ndipuso kuja akukoliyana. Vaŵawovya so kuti kunozgeke umampha kuti mayeseru ngo angakumana nangu. Iyu wangukamba so kuti: “Mapempheru ngo abali ndi azichi apempheranga ndingu ngangutiwovya ukongwa. Yehova watuvwa mapempheru nga ŵanthu arunji ŵenaŵa ndipu banja lidu latumbikika ukongwa ndi vitumbiku vakutuliya kwaku Yehova.”

Tisambira vinandi kwa abali ndi azichi ŵidu akugomezgeka wo atesesa kukunthiyapu mwachiganga chinanga kuti atombozgeka. Asani tiŵanaŵaniya abali ndi azichi ŵidu ku Russia, nasi tikamba mazu ngo ngakulembeka pa 2 Atesalonika 1:4 ngo ngatiti: “Timalikengi pakati pa mipingu yaku Chiuta chifukwa cha kukunthiyapu kwinu ndipuso chivwanu chinu muchitombozgeka kweniso mu masuzgu nginu ngosi ngo mukumana nangu.”