JANUARY 21, 2021
RUSSIA
Mubali Feliks Makhammadiyev Akumutuzga Mujeri la ku Russia Ndipu Akumutumiza ku Uzbekistan
Pa 31 December 2020, Mubali Feliks Makhammadiyev akumutuzga mujeri la ku Russia. Khoti la Belyayevsky lo le muchigaŵa cha Orenburg likulamula kuti mubali uyu amusungi pa malu nganyaki kwakanyengu kamanavi wachilindiziya makalata ngakumuzomereza kuti waluti kwawu ku Uzbekistan. Venivi venga viyo chifukwa boma la Russia lingumulonda makalata ngaki nga uzika mu April 2020. Pa 20 January 2021, apolisi angumukweza sitima yakuluta kwawu ku Uzbekistan. Te akukondwa kukuziŵisani kuti Feliks wakufika umampha ku Uzbekistan pa 21 January 2021. Muwolu waki Yevgeniya, ndiyu wangudanjiyapu kuluta ku Uzbekistan kwati kwaja mazuŵa ngaŵi kuti Feliks wasoki. Iyu wanguchita venivi kuti wakalondere mulumu waki.
Feliks wanguja ku Russia kwa vyaka pafufupi 18. Mu 2002, weche wachinyamata, iyu ndi anyina angusama ku Uzbekistan kuluta ku Saratov, ku Russia. Wangubatizika kuja Kaboni waku Yehova mu 2004. Pa nyengu iyi wenga ndi vyaka 19. Wakutolana ndi Yevgeniya mu 2011.
Pa 12 June 2018, apolisi a boma wo aziŵika kuti Federal Security Services (FSB) anguchifufuza munyumba yaku Feliks ndi Yevgeniya. Feliks wangumangika ndipu wanguja mujeri pafufupi chaka wachilindiziya mulandu waki. Kupemphera kwaku Yehova nyengu zosi ndiku kungumuwovya kuti walutirizgi kuja ndi nthazi. Iyu wangukonkhoska kuti: “Zuŵa lelosi ndapempheranga kwaku Yehova kuti wandipaski chimangu kweniso likondwa pa zuŵa lo.”
Mubali Feliks Makhammadiyev, pati pajumpha masabata pafufupi ngaŵi kutuliya po wangupumika ndi akuwonere jeri
Pa 19 September 2019, Feliks ndi abali anyaki ankhondi anguŵayeruzga kuti ŵe ndi mulandu ndipu anguŵaŵika mujeri. Ŵati aŵakaniya kuchita apilu, Feliks ndi abali anyaki anayi anguŵasamusiya kujeri la ku Orenburg, lo le pa mtunda wa makilomita ngakujumpha 800, kutali ndi kwawu ndipuso mabanja ngawu ku Saratov. Ŵati afika ku jeri lenili, yiwu angupumika ukongwa.
Pa nyengu yakusuzga yeniyi, Feliks wangulutirizga kuja ndi likondwa ndipuso kuseka ndi ŵanthu chifukwa ndimu ŵanthu atimuziŵiya kuti watanja kuseka. Yevgeniya wangukamba kuti: “Ndimalika nayu mulumu wangu! Iyu wangukunthiyapu mayeseru mwakugomezgezgeka ndipu walutirizga kukunthiyapu. Nani watindiwovya kuti ndikunthiyengepu.”
Chinanga kuti apolisi a ku Russia akhumbanga kumupweteka Feliks kuti waleki kuteŵete Yehova, kweni iyu wangukamba kuti chiyesu cho wangukumana nachu chingumuwovya kuti walutirizgi kuja wakugomezgeka kwaku Yehova. Venivi vititikumbusa fundu yo ye pa Genezesi 50:20, po Yosefi wangukambiya abali ŵaki kuti: “Chinanga kuti mwakhumbanga kundipweteka, Chiuta wangusintha vinthu kuti vije umampha.”