Pa 1 February 2021, a khoti la Birobidzhan of the Jewish Autonomous ku Russia liperekengi cheruzgu chaki pa mulandu wa Mubali  Igor Tsarev. Iyu wangachija mujeri kwa vyaka vinayi.

Igor Tsarev

• Chaka cho Wakuwiya: 1974 (Mu chigaŵa cha Birakan)

• Mo Wakukuliya: Iyu we ndi azichi ŵaki ŵaŵi. Pa nyengu yo wenga pa sukulu, wagwiranga ntchitu ya kucheketa vimiti, ukalipentala ndipuso ya magesi kuti wawovyengi banja laki. Watanja kuwona chilengedu kweniso kuŵeja

• Iyu wangwamba kukhumba kuziŵa chilatu cha umoyu pa nyengu yo wagwiranga ntchitu ya usilikali. Venivi vinguchitiska kuti iyu kweniso awisi ayambi kusambira Bayibolu. Wangubatizika mu 1997. Wangutolana ndi muwolu waki Viktoriya mu 1998. Yiwu ŵe ndi mwana msungwana yo wasambira sukulu

Pa 30 July 2019, arara a boma ku Russia angumujuliya mulandu Mubali Igor Tsarevn. Mulandu waki ngwakuti wasambira Bayibolu “ndi chilatu chakuti wasambizengi anyaki vo Akaboni aku Yehova agomezga.” Mavidiyo ngo ngalongo maunganu ngachisopa ngo apolisi a Federal Security Service (FSB) angujambula mwachisisi ndingu ngangugwiriskikiya ntchitu nge ukaboni kuti amumbi mulandu Mubali Igor. Loya wa boma wangupempha kuti mulandu uwu ungayeruzgikiyanga pagulu cha, ndipu venivi vakuziziswa ukongwa. Khoti lingukoliyana ndi vo loya wa boma wangupempha, ndi chilatu chakuti ŵanthu aleki kukopeka ndi vo Igor wagomezga.

Igor wangukamba kuti “Vo khoti liyeruzgengi pambula kuswera yapa, visinthengi ukongwa umoyu wangu. Ndipu kukamba uneneska vayambapu kali kundisintha. Chifukwa chakuti nde mumanja mwa khoti, ndingayenda so cha maulendu. Abwana ŵangu ku ntchitu angundichichizga kuti ndikonkhoski chifukwa cho apolisi anguza kunyumba kwangu. Anyangu kweniso abwana ŵangu avwisa cha chifukwa cho ndimbikiya mulandu, kweni cho aziŵa ntchakuti Akhristu aja achitombozgeka.”

Titimupemphere Igor ndipuso banja laki. Tiziŵa kuti Yehova waŵapaskengi ‘nthazi ya mzimu waki.’—Aefeso 3:16.