Pa 25 September 2020, * khoti la Yelizovsky lo le muchigaŵa cha Kamchatka liyeruzgengi mulandu wa Mubali Konstantin Bazhenov, muwolu waki Snezhana ndipuso Mzichi Vera Zolotova. Loya wakumiya boma pa mulandu wakupempha khoti kuti Mubali ndi Mzichi Bazhenov apereki ndalama zakukwana madola 7,850 nga ku America ndipu Mzichi Zolotova wapereki ndalama zakukwana madola 5,235 nga ku America.

Konstantin Bazhenov

• Chaka cho Wakuwiya: 1977 (Ku Petropavlovsk-Kamchatsky Muchigaŵa cha Kamchatka)

• Mo Wakukuliya: Iyu ndi mwana wakwamba mubanja la ŵana anayi. Wasambizanga pa sukulu ya ntchinthu za manja ndipuso wangwiranga ntchitu ya umekanika. Watanja kuŵeja somba

• Mu 2001 wangutolana ndi Snezhana, yo nayu wenga musambizi. Yiwu ŵe ndi mwana zina laki Elizabeth ndipu wosi ateŵete Yehova

Snezhana Bazhenova

• Chaka cho Wakuwiya: 1977 (Ku Shikotan Island, Sakhalin Oblast)

• Mo Wakukuliya: Wakuleleka ndi mpapi yumoza. Watanja ŵana kweniso wakondwanga kusambiza ku pulayimale. Vachitima kuti pasonu panu akumukaniza kusambiza chifukwa akumusaniya ndi mulandu

• Ambuyaki ndiwu angumusambiza vakukwaskana ndi Chiuta kweniso mo wangapemphere. Venivi vingumuwovya kuti wayambi kwanja Chiuta kweniso Bayibolu

Vera Zolotova

• Chaka cho Wakuwiya: 1946 (Ku Yelizovo, Muchigaŵa cha Kamchatka)

• Mo Wakukuliya: Wakukuliya mubanja likulu. Mu 1966 wangutolana ndi Yuri Zolotov. Ŵe ndi ŵana ŵaŵi. Wagwiranga ntchitu ya akawuntanti. Watanja kuchiwona malu kweniso kuchita masaza kumalu ngo maji ngawundana

• Kwa vyaka vinandi wakhumbanga kuti waziŵi Chiuta. Iyu wapempherapu muvisopa vakupambanapambana. Pakumaliya wangukondwa ukongwa kuziŵa kuti Chiuta walivi sankhu ndipuso watanja ŵanthu. Mulumu waki wenga Kaboni waku Yehova cha. Kweni wakondwanga ukongwa kuwona mo Bayibolu linguwovye muwolu waki

Pa 19 August 2018, apolisi angufufuza nyumba zitatu za Akaboni mutawuni ya Yelizovo. Abali ndi azichi akukwana 11 angumangika. Yiwu angufumbika mafumbu kwa maola nganandi. Pavuli paki, Akaboni 8 anguŵafwatuwa. Kweni Mubali Bazhenov, muwolu waki ndipuso Mzichi Zolotova anguŵamba mulandu. Yiwu anguŵaŵika mujeri. Pati pajumpha mazuŵa ngaŵi azichi anguŵatuzga mujeri. Kweni wakweruzga wanguyeruzga kuti Mubali Bazhenov walutirizgi kuja mujeri. Pati pajumpha mazuŵa 8 nayu angumutuzga.

Po alindizga cheruzgu chenichi, tipemphera kuti banja la Mubali Bazhenov ndipuso Mzichi Zolotova alutirizgi kuthemba ukongwa Yehova. Bayibolu lititisimikiziya kuti Yehova waperekengi likondwa kweniso chimangu kwa ateŵeti ŵaki akugomezgeka kuti yiwu azaziki ndi “chilindizga kuziya mu nthazi ya mzimu wakupaturika.”—Aroma 15:13.