Mubali Konstantin wangutuzgika mujeri ku Russia pa 5 May 2021. * Iyu angumutumiza ku Ukraine pa 19 May 2021, ŵati amusunga kwa mazuŵa ngamanavi ku malu ngo asungiyaku ŵanthu wo alindiziya kuti atumiziki kwawu. Muwolu waki Irina, wangudanjiyapu kuti wakamulondere asani wafika. Mubali Konstantin wakutumizika ku Ukraine chifukwa mu May 2020, boma la Russia likumulonda vimakalata vauzika ya charu cha Russia.

Konstantin wakuwa mu chaka cha 1975 mu banja lo lalekanga kusopa ndipu ajanga kuzambwi kwa Russia mutawuni ya Veliky ku Novgorod. Weche mwana, iyu limoza ndi banja laki angusamiya ku Ukraine. Konstantin weche mwana wayanjanga kuchita masaza ngakupambanapambana ndipuso sumu. Wakumaliza masambiru ngaki pa sukulu ya kusambiza ŵanthu kumba sumu ndipu wenga mulongozgi wa gulu linyaki lakumba.

Chinanga mphanyengu yo wenga wechendasambiri Bayibolu, Konstantin wagomezganga kuti nkhunanga kuchita viwawa kweniso nkhondu. Ndichu chifukwa chaki wati wadanika kuti wakasere usilikali ku Ukraine wangukana. Po wenga ku koleji, wenga ndi mafumbu ngakukwaskana ndi umoyu ndipuso chisopa. Ndipu wangwenda mu visopa vakupambanapambana kuti wasaniyi kwamuka kwa mafumbu ngaki, ndipu wangusaniya kwamuka wati wayamba kusambira Bayibolu ndi Akaboni aku Yehova. Wakubatizika mu 1996.

Konstantin wakutorana ndi Irina mu 2001. Kuti wasaniyengi ndalama zakuphwere banja laki, wangwiranga ntchitu yakuzenga ndipu ndi kaswiri pakuzenga mauvunu ngakubikiyapu ndipuso malu nganyaki ngakupembiyapu motu. Angusamiya ku Russia mu 2009.

Pa 12 June 2018, apolisi wo ŵenga ndi futi angufufuza nyumba 7 za Akaboni aku Yehova ku Saratov, kusazgapu nyumba ya Mubali Konstantin ndi Irina. Iyu pamoza ndi abali anyaki ku Saratov angumangika ndipu anguchiŵajaliya mujeri kulindiziya mulandu wawu.

Konstantin wati wasere waka mujeri wanguziŵa kuti wakhumbikanga kupembuzgika ndi Mazu ngaku Chiuta, kweni Bayibolu wengavi. Iyu wangukamba kuti: “Muwolu wangu wangunditumiziya notibuku ndipu zuŵa lelosi ndalembangamu mavesi ngo ndangakumbukanga.” Yehova wangumuwovya kukumbuka mavesi 500 pa myezi yiŵi pe! Wati wapaskika Bayibolu, wangufwiyapu kuliŵerenga losi ndipu wangumaliza kuŵerenga mu myezi yinayi pe. Malemba ngangumuchiska ukongwa. Kweniso wangukondwa ukongwa kulembe muwolu waki ndipuso mabwezi ngaki fundu zakuchiska za mu Bayibolu zo wangusaniya.

Kanandi Konstantin wapempheranga kwaku Yehova mwakutuliya pasi pa mtima kuti wafiski kukunthiyapu pa nyengu yo wenga mujeri, ukongwa pa nyengu yo wajiwonanga kuti we yija, ndipu wangumusoŵa muwolu waki. Iyu wangukamba kuti: “Ndajikamanga pasi ndikwamba kuliya uku ndipemphera kwaku Yehova. Ndingulemba pa pepala vinthu vo ndikhumba kuti Chiuta wandichitiyi ndipu vo wandimuka ndachonganga. Ndingukondwa ukongwa chifukwa Yehova wenga nani pafupi.” Pa 20 May 2019, iyu wangutuzgika mujeri mo angumuŵika kulindiziya mulandu waki. Kweni masuzgu ngaki ngangumaliya penapa cha.

Pa 9 September 2019, Konstantin ndipuso abali anyaki ankhondi ku Saratov, anguŵayeruzga kuti ŵe ndi mulandu ndipu anguŵatumiza kujeri. Pati pajumpha myezi yimanavi khoti lati lakana apilu yawu, abali ankhondi ŵenaŵa anguŵasamisiya kujeri la ku Orenburg. Konstantin angumusamusiya kujeri la ku Dimitrovgrad, lo lenga kutali pamtunda wa makilomita ngakujumpha 500 kutuwa ku Saratov ko kwenga muwolu waki.

Chinanga kuti Irina wenga kutali ndi mulumu waki, kweni wachiskikanga kuŵerenga Nkhani za pa JW zo zikamba va abali ndi azichi ŵidu wo mwachiganga angukunthiyapu mayeseru ngo angukumana nangu. Irina wanguchiskika so ukongwa kuwona kuti Konstantin walutirizga kuja wakukho ndipuso kuja ndi chimangu cha chamumtima. Wati wafumbika pa nyengu mulumu waki we mujeri, Irina wangukamba kuti: “Nyengu zosi mazu nga mulumu wangu ngavwika ngakukondwa!” Ati amuzomereza kuti wamumbiyengi Konstantin, yiwu ambiyanga limoza sumu, kupemphera ndipuso kusambiriya pamoza. Irina wangukamba kuti kukambiskiyana pamoza fundu za mu Bayibolu kwawovya kuti chivwanu chaki mwaku Yehova chije chakukho ndipuso kuti walutirizgi kuja wakukondwa kwambula kutoliyaku kanthu mayeseru ngo akumana navu.

Konstantin wanguja mujeri kwa myezi yakujumpha 14 wachilindiziya mulandu waki ndipu ŵati amuyeruzga kuti waje mujeri chifukwa cha vo wagomezga, wangujamu waka kwa kujumpha chaka ndi hafu. Angumutuzga kwati kwaja myezi 9 kuti nyengu yo angumulangiya ya vyaka vitatu ndi hafu yikwani. Venivi venga viyo chifukwa wanguja mujeri kwa chaka ndi hafu ŵechendamuyeruzgi. Kweniso wakhumbikanga cha kugwira ukayidi kwa myezi yiŵi yakumaliya chifukwa chakuti angumuzomereza kuti watuzgiki mwaliŵi.

Tikondwa kuti Konstantin wakutuzgika mujeri ndipu we so limoza ndi muwolu waki Irina. Abali ndi azichi ŵidu wosi wo akunthiyapu chinanga kuti atombozgeka, alongo kuti agwiriskiya ntchitu mazu nga Fumu Davidi pa umoyu wawu, ngakuti: “Ndibisama mu mduzi wa mapapa nginu mpaka po masuzgu ngajumphiyapu.”—Salimo 57:1.