Pa 7 April 2020, ofesi yakumiya boma pa milandu ku Belarus yingukana pemphu la Boma la Russia lakuti Mubali Nikolay Makhalichev amuweze ku Russia ndipu lingumutuzga mujeri. Mubali Makhalichev wangukondwa ukongwa kuti wangufwatulika pa nyengu yamampha ukongwa kuti wakachitiyi limoza ndi abwezi ŵaki Chikumbusu cha nyifwa yaku Khristu ku Belarus.

Mubali Makhalichev wangumangika pa 21 February 2020, wachituwa ku Russia kuluta ku Belarus kuti wakawoni anyaki. Apolisi angumuŵika mujeri ŵati awona pasipoti yaki ndi kusaniya kuti we mugulu la ŵanthu wo akhumbika ukongwa ku Russia pa mlandu wakovya ntchitu za gulu “lakuyukiya.”

Pati pajumpha mazuŵa ngatatu, apolisi anguŵanaŵana kuti amumangi Mubali Makhalichev, kuti awoni asani wakhumbika kumutumiza ku Russia kuti wakamuki milandu yo angumujuliya mu January 2019. Yaka kenga kakwamba kuti Kaboni waku Yehova wamangiki mucharu chinyaki chifukwa chakuti boma la Russia litimupenja kuti likamumbi mulandu.

Pa nyengu yo Mubali Makhalichev wenga mujeri wangutaya mtima cha chifukwa wangulutirizga kusopa Yehova. Iyu wanguchitiska masambiru nga Bayibolu nganayi ndipu wangumaliya maora 198 mu uteŵeti mu mwezi wa March.

Tiziŵa kuti abali ŵidu ku Russia alutirizgengi kuthemba Yehova nge jalawi kweniso malu ngawu ngakuthaŵiyapu pa nyengu yinu yo akumana ndi masuzgu.—Sumu 142:5.