Pambula kuswera yapa, Khoti la muchigaŵa cha pakati cha Komsomolsk-on-Amur liperekengi cheruzgu chaki pa mulandu wa Mubali Nikolay Aliyev. *

Nikolay Aliyev

• Chaka cho Wakuwiya: 1978 (Ku Komsomolsk-on-Amur)

• Mo Wakukuliya: Pa nyengu yo wenga mwana, wakhumbanga kuziŵa mo umoyu kweniso chilengedu vikwambiya. Venivi vinguchitiska kuti wayambi kufufuza kwamuka kutuwa mu Bayibolu. Wanguleka kuchita masaza nga ndewu wati waziŵa vo Yesu wangusambiza vakukwaskana ndi chimangu ndipuso mo iyu wangulongore venivi pa umoyu waki. Wangubatizika mu 1993 kuja Kaboni waku Yehova

  Wakutolana ndi Alesya, mu 2016. Pe vinandi vo yiwu atanja kusazgapu kuluta ku malu ngakupambanapambana, kuwona malu kweniso kuchita masaza mu ayisi

Ndi mulenji pa 22 May 2020, apolisi a mutawuni ya Komsomolsk-on-Amur anguchifufuza munyumba ya Mubali Nikolay ndi muwolu waki Alesya. Apolisi ŵati asere ŵaka angumututuziya pasi Nikolay ndipu angufufuza munyumba yawu kwa maora ngankhondi ŵechendaŵatole kujeri. Pa nyengu yo amufumbanga mafumbu, arara a boma angukamba kuti Nikolay watuwi chisopa cho wali ndipu wakasere chinyaki. Yiwu angukambiya so Alesya kuti wakoliyani ndi vo yiwu akambanga kuti mulumu waki “chileki kumuchitikiya chinthu chinyaki chiheni.” Chinanga kuti anguŵawofyeza, kweni yiwu angutuzgika mazulu ngenanga ndipu anguwere kunyumba kwawu.

Nikolay waŵanaŵaniya mo Yehova wangumuwovye munthowa zinandi pa nyengu yakusuzga yeniyi ndipu venivi vitimupaska nthazi. Iyu wangukamba kuti: “Asani wakumana ndi masuzgu ndipu uziŵa kuti ungamalana nangu cha wija. Ndajiwone ndija mo Yehova wamukiya mapempheru kweniso mo walongozge. Ndawona kufiskika kwa mazu ngo Paulo wangukamba ngakuti: ‘Pakuti asani ndalopwa, penipo ndipu ndija ndi nthazi.’”—2 Akorinto 12:10.

Nikolay ndi Alesya alutirizga kuchita vinthu vo vingaŵawovya kuti aje ndi chiganga ndipuso akufwasa. Yiwu akulemba mazu nga pa Yesaya 41:10 pa pepala ndipu akulipulinta ndi kulibatika pa fuliji. Nikolay wangukamba kuti: “Asani vinthu vasuzga pa umoyu ndiŵerenga vesi lenili ndipu lititiwovya ukongwa. Mazu ngenanga ngatindichiska kuti ndileki kuchita mantha. Kweni layizgu laku Yehova lakuti we nani pafupi ndilu litindichiska ukongwa, ndipu venge kuti watindiko ndi janja laki lamaryi nge bwezi langu lapamtima.” Tigomezga kuti nyengu zosi Yehova waŵapasengi nthazi ateŵeti ŵaki akugomezgeka.