Pa 1 February 2021, * khoti la mutawuni ya Abakan ku Republic of Khakassia liyeruzgengi mulandu wa Mubali Roman Baranovskiy ndi anyina a Valentina Baranovskaya. Loya yo wamiya boma pa milandu wechendakambi cheruzgu cho wakhumba kuti ŵanthu ŵenaŵa alonde.

Roman Baranovskiy

• Chaka cho Wakuwiya: 1974 (Muchigaŵa cha Saratov, ku Balakovo)

• Mo Wakukuliya: Wagwira ntchitu yakunozga nyumba za ŵanthu, ndipu ntchitu yeniyi ndiyu yitimuwovya kuti wajiphweriyengi kweniso waphweriyengi anyina. Watanja kumba gitala, kuseŵe tchesi ndipuso kutchaya bola

  Weche wachinyamata wakhumbisiskanga kuziŵa chilatu cha umoyu. Iyu wangukamba kuti: “Nyengu zinyaki ndamupemphanga Chiuta kuti wandiziwisi chilatu cha umoyu.” Wangwamba kusambira Bayibolu ndi Akaboni aku Yehova mu 1993. Ndipu wangubatizika mu 1997

Valentina Baranovskaya

• Chaka cho Wakuwiya: 1951 (Ku Vannovka, Kazakhstan)

• Mo Wakukuliya: Wagwiranga ntchitu yakuŵerengese ndalama ndipuso yakupereka ulongozgi pa nkhani za ndalama mpaka po wanguleke kugwira ntchitu iyi mu 2006. Watanja vakubikabika kweniso kulemba sumu ndi ndakatulu

  Mu 1995, wangwamba kusambira Bayibolu ndi Akaboni aku Yehova limoza ndi mwana waki. Iyu wanguzizwa ukongwa wati wasambira kuti Chiuta wangapusika cha. Wangubatizika mu 1996

Usiku wa pa 10 April 2019, apolisi wo atenda ndi futi ku Abakan angufufuza nyumba zinayi za Akaboni aku Yehova, kusazgapu nyumba ya Mubali Roman Baranovskiy ndi anyina a Valentina. Apolisi anguto Mabayibolu, vipangizu va mazuŵa nganu ndipuso makalata nganyaki ngakukwaskana ndi Mubali Roman ndi anyina. Yiwu angukamba kuti Mubali Roman ndi anyina a Valentina ŵe ndi mulandu.

Roman wangukamba kuti: “Panyengu yo apolisi anguza kuzifufuza munyumba yidu, tenga ku maunganu ndipu panyengu yeniyi ndipu takambiskana waka lemba la 1 Akorinto 10:13. Pa vesi ili tingusambirapu fundu yakovya ukongwa yakuti, Yehova wasankha cha chiyesu cho isi tikhumbika kukumana nachu cho tingafiska kukunthiyapu. Ndipuso waŵanaŵanaku cha kuti: ‘Yiwi we wakukho, vo vilongo kuti ungakunthiyapu chiyesu ichi, kweni yiwi we wakulopwa, chiyesu ichi ndichu chasayizi yaku ndipu chenichi ndichu ungakunthiyapu.’ Yehova wachita viyo cha, ndipu asani ndimu venge ndikuti weyosi watingi wathembengi nthazi zaki. Weyosi wangakumana ndi mayeseru ngakupambanapambana. Asani tithemba nthazi zaku Yehova, tingakunthiyapu mayeseru ngosi ngo tingakumana nangu.”

Mu July 2020, Valentina wanguchita sitiloku. Iyu wangukamba kuti: “Matenda ngangu ngati ngafika paheni, Yehova wandiwovyanga ukongwa. Venga viyo chifukwa chakuti ndikulekapu cha kupemphera, ndipuso venga nge kuti iyu wandinyamuwa pamapewa ngaki. Ndenga ndi chimangu chikulu chamumtima.”

Vinthu vosi vo Valentina wakumana navu vingumuchitiska kukamba mazu nganthazi ngakuti: “Ndisimikiza mtima kuti ndilutirizgengi kuteŵete Yehova kweniso kuja wakugomezgeka kwaku iyu kwali ndingakumana ndi masuzgu wuli pa umoyu wangu.”

Roman wangukamba kuti kuŵanaŵaniya vakuyeruzgiyapu va ŵanthu wo azumbulika mu Bayibolu kweniso ŵanthu a mazuŵa nganu wo angulongo chiganga kungumuwovya kuja ndi chivwanu chakukho. Asani waŵanaŵaniya vakuyeruzgiyapu venivi, kanandi watijifumba kuti: ‘Kumbi ndi vinthu wuli vo akhumbikanga kukunthiyapu ndipu ntchifukwa wuli? Kumbi ndi vinthu wuli vo vinguŵawovya kuja akugomezgeka? Kumbi Yehova wanguŵawovya wuli ndi mzimu waki?’ Kwamuka kwa mafumbu ngenanga kungumuwovya Roman kukamba ndi mtima wosi kuti kwali wangakumana ndi chiyesu wuli, kweni “Yehova wandipaskengi nthazi asani mphakukhumbika kuchita viyo.”

Ndi pempheru lidu kuti Roman, Valentina, ndipuso abali ndi azichi ŵidu wosi ku Russia alutirizgi kulereska kwaku Yehova yo ndi malu ngawu ngakuthaŵiyaku kweniso nthazi zawu.—Salimo 46:1.