Pa 17 December 2020, * khoti la muchigaŵa cha Leninskiy ku Rostov-on-Don liyeruzgengi mulandu wakukwaskana ndi Mubali Ruslan Alyev. Loya wakumiya boma wangupempha khoti kuti liyeruzgi kuti Ruslan wangapalamulanga mulandu wewosi cha kwa vyaka vitatu.

Ruslan Alyev

• Chaka cho Wakuwiya: 1987 (Ku Chunoyar, muchigaŵa cha Krasnoyarsk)

• Mo Wakukuliya Banja laki lasamapu kananandi waka ku Azerbaijan ndi Ukraine. Wakugwirapu ntchitu nge wakuzenga, wagulisa vinthu, wasambizanga ŵanthu kumba gitala ndipuso wasambizanga Chingelezi ndi Chitchayinizi. Watanja masaza ndipuso kulemba ndakatulu ndi sumu. Walongoro vineneru vinayi. Muwolu waki Kristina, walongoro so Chitchayinizi

  Wangwamba kuŵerenga ndipuso kusambira Bayibolu we ndi vyaka 13. Kusambira mwaphamphu Bayibolu kungumuwovya kuti wasaniyi kwamuka kwa mafumbu ngosi ngo wenga nangu ngakukwaskana ndi umoyu. Venivi vingumuchitiska kuti wajipatuliyi kweniso wabatiziki mu 2006

Pa 6 June 2019, Mubali Ruslan Alyev angumujuliya mulandu ndipu wangumangika pa 10 June 2019. Wati waja maora 24 mujeri Ruslan ndi mubali munyaki Semyon Baybak, anguŵakambiya kuti akachitengi ukayidi wa panyumba. Pakwamba, Ruslan angumuyeruzga kuti wakachitengi ukayidi wa panyumba kwa masabata 8, kweni aja achisazgiyapu masabata ngenanga maulendu ngakukwana 9. Venivi vachitiska kuti wachiti ukayidi wapanyumba kwa myezi 18. Chifukwa chakuti wachita ukayidi wa panyumba, Ruslan wazomerezeka cha kukambiskana ndi weyosi kupatuwapu loya waki, yo watimufumba mafumbu, wapolisi ndi muwolu waki. Iyu atimuzomereza cha kuti wagwiriskiyengi ntchitu intaneti kusazgiyapu kulonde pamwenga kutumizanga makalata ndi mameseji.

Ruslan wangukamba kuti ŵechendamumangi, iyu ndi muwolu waki Kristina, kanandi ayanjanga kukambiskana vakukwaskana ndi kutombozgeka ndipu aziŵanga kuti nawu vikhoza kuŵachitikiya. Iyu wangukamba kuti: “Tayesesanga kusambira Bayibolu, kuwungana ndipuso kupemphera nyengu zosi. Tiziŵa vo vingachitika asani munthu watombozgeka chifukwa tiŵerenga nkhani zakukwaskana ndi kutombozgeka mu Buku Lapachaka ndipuso nkhani za mbiri ya umoyu wa abali. Tinguwona kuti yiwu akondwanga kweniso aweriyanga vuli cha chinanga akumananga ndi masuzgu ngakulu.” Ruslan wangukamba so kuti: “Tingupempha Yehova kuti watipasi nthazi zakuti tizifiski kukunthiyapu masuzgu ngo tingazikumana nangu munthazi.”

Ruslan wakambiskananga ndi anyaki vakukwaskana ndi vo vingazichitika asani atombozgeka ndipu venivi vingumuwovya. Iyu wanguti: “Ndingufufuza fundu zinandi zakuchiska kutuliya mu Bayibolu kweniso nkhani zinyaki ndi chilatu chakuti tileki kufipa mtima ndipuso kuti tichiskengi apharazgi anandi mumpingu. Ndipu po ndakhumbanga kupembuzgika, malemba kweniso nkhani zo ndingufufuza ndi kusambira zingundichiska ukongwa.”

Ruslan ndi Kristina wosi anguyanduwa ukongwa chifukwa angunozgeke limu kuti angayamba kutombozgeka. Pa nyengu yo apolisi afufuzanga nyumba yawu Ruslan wangukamba kuti: “Ndenga ndi chimangu kweniso ndafipanga mtima cha.” Pa nyengu yo afufuzanga nkhani yeniyi, apolisi angukamba so kuti akhumba kumujuliya mulandu Kristina. Ruslan wangukamba kuti: “Venivi vingumuwofya cha muwolu wangu wakwanjiwa Kristina. Ivi vingundipaska nthazi kweniso ndinguchiskika ukongwa.”

Chifukwa chakuti Ruslan angumuyeruzga kuti wakachitengi ukayidi wapanyumba, venivi vinguchitiska kuti akumani ndi masuzgu nganandi. Kweni Ruslan wanguti: “Nyengu zosi Yehova watitipasa vakukhumbikiya kuti tije ndi umoyu, tindere kufupi ndi iyu kweniso kuti tileki kufipa mtima ndipu venivi ndivu ndakhazanga. Isi tingusambiriya limu mo tingamuthembe kweniso mo tingajaliya umoyu wambula kukhumba vinandi. Ndipu tafipanga mtima ukongwa cha.”

Zuŵa linyaki po angamukamba mulandu waku Ruslan wakukwaskana ndi ukayidi waki wapanyumba, mabwezi ngaki ngazomerezekanga cha kusere mu khoti. Kweni abali ndi azichi ŵidu anguwungana pabwalu pa khoti ndipu wachituwa mukhoti ambanga mumanja ndikudaniriza kuti: “Ruslan, titikwanja!”

Titiŵawonga ukongwa abali ndi azichi ŵidu a ku Russia chifukwa cha chakuwoniyapu chawu chamampha. Chinanga kuti yiwu atombozgeka kwambula chifukwa kweni alutirizga kuthemba ukongwa Yehova.—Salimo 118:6-9.