Pa 18 December 2020, * khoti la muchigaŵa cha Leninskiy mutawuni ya Rostov-on-Don lazamuyeruzga cheruzgu chakukwaskana ndi Mubali  Semyon Baybak. Wo atimumba mulandu akupempha khoti kuti Mubali Semyon amuyeruzgi kuti wangapalamulanga mulandu wewosi cha kwa vyaka vinayi.

Semyon Baybak

• Chaka cho Wakuwiya: 1997 (Ku Rostov-on-Don)

• Mo Wakukuliya: We ndi mku waki kweniso mzichi waki. Wakusambira Chitchayinizi ndipu ndi msambizi wa Chitchayinizi. Watanja kuŵerenga ndipuso kulemba ndakatulu

• Weche mwana, wangusambira vakukwaskana ndi Yehova kutuliya kwa apapi ŵaki. Iyu wangusambira vakukwaskana ndi ulongozgi wazeru wakutuliya mu Bayibolu ndipu wangusankha kuwugwiriskiya ntchitu. Chivwanu chaki ndichu chingumuchitiska kuti wakani kusere usilikali. Wagwiranga ntchitu yakutowesa muchipatala cha ŵana kwambiya mu 2015 mpaka 2017

Pa 22 May 2019, arara a boma angufufuza mwankhaza nyumba 13 za Akaboni ku Rostov-on-Don. Pati pajumpha masabata ngaŵi, pa 6 June 2019, Mubali Semyon angumujuliya mulandu. Pavuli paki, wangumangika ndipu wanguja mujeri kwa zuŵa limoza khoti lechendayeruzgi kuti wakachitengi ukayidi wapanyumba. Khoti lingumuyeruzga kuti wakachitengi ukayidi wapanyumba kwa masabata 8, kweni lingujumphisa masabata ngenanga maulendu 7.

Pakwamba apolisi angukamba kuti Semyon we ndi “milandu” chifukwa chakuti waluta ku maunganu nga chisopa chaki ndipuso wapharazgiya anyaki vo wasambira mu Bayibolu. Ndipu mu November 2019, apolisi angukamba so kuti iyu we ndi mulandu wakuti wapereka ndalama ku gulu “lakofya.”

Po abali ndi azichi ŵidu alutirizga kutombozgeka ku Russia, tiziŵa kuti Yehova, “Chiuta wachimangu,” walutirizgengi kuŵapaska vosi vakukhumbikiya ‘kuti aje akunozgeka kuchita khumbu laki.’—Aheberi 13:20, 21.