Pa 19 January 2021, Khoti la Kemerovo likukana apilu ya Mubali Sergey Britvin ndi Vadim Levchuk. Venivi vilongo kuti cheruzgu cho angupaskika chakuti angapalamulanga mulandu wewosi cha kwa vyaka vinayi sonu chiyambengi kugwira ntchitu. Chifukwa cha nyengu yo abali yaŵa angujaliya mujeri kulindiziya mulandu wawu kuti uyeruzgiki, kweniso nyengu yo angugwiriya ukayidi wapanyumba, abali yaŵa atiŵato kuti akugwiraku kali vyaka vakujumpha vitatu. Venivi vilongo kuti pasonu panu aja ndi chaka chimoza kuti amalizgi vyaka vo anguŵayeruzga kuti angasanilikanga ndi mulandu wewosi cha. Wosi alutirizga kuja akugomezgeka ndipu agwiriskiya ntchitu nyengu yawu mwazeru.

Pa nyengu yo khoti laperekanga cheruzgu, abali yaŵa angulongoro mwachiganga vakukwaskana ndi chivwanu chawu mwaku Yehova ndipuso angukonkhoska vitumbiku vo asaniya chifukwa cha kumuteŵete.

Sergey wangukambiya khoti kuti: “Kumbi khoti likhumba kuti ndichitenji? Kuti ndileki vo ndigomezga? Viwoneke limu kuti kuja ndi chivwanu mwaku Yehova ndiku kwandiwovya kuti ndije munthu wamampha ndipuso kuti ndije zika yamampha ya Russia. Nditimuwonga ukongwa Chiuta chifukwa chakundiwovya kuja ndi banja lamampha kweniso kuja ndi umoyu wamampha. Nditimuwonga ukongwa Yehova chifukwa chakundiwovya kuziŵa chilatu cha umoyu kweniso kuja ndi chilindizga chamampha chamunthazi. Chinthu chakukhumbika ukongwa cho ndasaniya mbubwezi wangu ndi Chiuta, Yehova. Ubwezi wangu ndi Yehova nditiwuwona kuti ngwapade ukongwa, chinanga angandimba mulandu waboza chimtundu wuli.”

Vadim wangukamba kuti: “Kutuwa pa nyengu yo ndingumangika, nde ndi chimangu chamumtima chifukwa chakuti Yehova watindiwovya ndipu nde wakusimikiza mtima kulutirizga kuja wakugomezgeka kwaku iyu. Mwemosi mo mungandiyeruzgiya, chakukhumbika ukongwa Kwaku ini ndi mo Yehova wawone vinthu. Ndiwona kuti ndikukhumbika kulutirizga kuja ndi mijalidu yo yikondwesa Yehova nge chanju, likondwa, chimangu, lisungu, chivwanu ndi kujiko.”