Pa 24 November 2020, * khoti la mutawuni ya Petropavlovsk-Kamchatskiy mu chigaŵa cha Kamchatka lazamuyeruzga mulandu wa Mubali Sergey Ledenyov. Iyu wangaziyeruzgika kuti wakaje mujeri kwa vyaka 6.

Sergey Ledenyov

• Chaka cho Wakuwiya: 1974 (Ku Ossora, muchigaŵa cha Kamchatka)

• Mo Wakukuliya: Iyu wakuwiya mubanja la ŵana 6. Watanja kujambula vithuzi. Wagwira ntchitu ya kuzenga ndipuso kuŵika matayilosi. Waŵanaŵananga kuti Bayibolu likoliyana cha ndi sayansi mpaka po wangwamba kusambira Bayibolu ndi Akaboni aku Yehova. Wakutolana ndi Anna, mu 2017. Anna wangukamba kuti kugwiriskiya ntchitu fundu za mu Bayibolu kwamuwovya Sergey kuti waje munthulumi wakuzika kweniso wachanju.

Pa 2 December 2018, apolisi wo anguvwala vakujibisa kumasu ndipuso wo angunyamuwa futi angufufuza nyumba ya Mubali Ledenyov ku Petropavlovsk-Kamchatskiy. Angumumanga ndipuso angumusaniya ndi mulandu wakuti waswa dangu 282.2 la marangu nga boma la Russia. Mulandu uwu ungwamba pa 28 November 2019.

Pa 12 December 2019, khoti la mutawuni ya Petropavlovsk-Kamchatskiy muchigaŵa cha Kamchatka linguweze mulandu uwu kwa loya wakumiya boma. Venivi vichitika kanandi asani khoti lasaniya kuti palivi ukaboni wa mulandu wo. Kweni pa 4 February 2020, khoti likulu lingusintha cheruzgu ndipu mulandu uwu ungwamba so. Pakumaliya paki, apolisi angufumba mafumbu muwolu wa Mubali Ledenyov kweniso mzichi munyaki ndi kuŵachichizga kuti akambi vaboza vakukwaskana ndi Mubali Ledenyov. Mzichi Ledenyov ndi mzichi munyaki angukanisiska kuchita viyo.

Achibali a Mubali Ledenyov wo mbakaboni cha avwisa cha kuti ntchifukwa wuli iyu watombozgeka chifukwa cha chivwanu chaki.

Tipemphere Mubali ndi Mzichi Ledenyov po alindizga kuti aŵayeruzgi. Tigomezga kuti mzimu waku Yehova we mwaku yiwu.—1 Peturo 4:14.