Khoti la Ussuriyskiy lo le muchigaŵa cha Primorye, pambula kuswera yapa liperekengi cheruzgu chaki pa mulandu wa Mubali Sergey Melnikov. * Loya wa boma wechendakambi cheruzgu cho wakhumba kuti mubali uyu wapaskiki.

Sergey Melnikov

• Chaka cho Wakuwiya: 1973 (ku Terney, muchigaŵa cha Primorye)

• Mo Wakukuliya: Wagwiranga ntchitu ya ukalipentala, yakuzimwisa motu, ya ulovi kweniso yakunozga munyumba. Pa nyengu yo wenga wachinyamata wayanjanga kutchaya hockey ndi volleyball. Wangwamba kusambira Bayibolu ndi Akaboni aku Yehova cha mu ma 2000. Wangusamiya ku Ussuriysk mu 2003 ndipu chaka chenichi ndichu so wangubatizikiya

Mubali Sergey Melnikov wangwamba kumbika mulandu mu June 2019. Apolisi angumumanga panyengu yo wakambiskananga ndi munthu munyaki vakukwaskana ndi Bayibolu. Apolisi ŵenaŵa anguchifufuza so munyumba yaki ndipu angumulonda laputopu ndi foni.

Sergey wanguja mujeri kwa myezi yinayi weche kulindiziya mulandu waki ndipu kwa mazuŵa 145 wenga pa ukayidi wa panyumba. Nyengu zinyaki Sergey wajivwanga nge kuti walivi nthazi zakuti wakunthiyepu. Asani wayamba kujivwa viyo, wayanjanga kuŵanaŵaniya lemba la 1 Akorinto 10:13 ndipu nyengu yeniyo wayambanga kuvwa umampha mu mtima. Iyu wangukamba kuti “Ndinguziŵa kuti asani Yehova wazomereza kuti ndikumani ndi mayeseru ngenanga, ndikuti ndingafiska kukunthiyapu. Yehova wangundipaska ‘nthazi yakujumpha yo ndituŵa nayu’”—2 Akorinto 4:7.

Pa 25 February 2020, Sergey wangutuzgika pa ukayidi wa panyumba. Kweni walivi mbwenu wanangwa wakuti wangayenda kuluta muvyaru vinyaki.

Po tilindizga kuti khoti lipereki cheruzgu chaki, tigomezga kuti Yehova walutirizgengi ‘kumuwovya, kweniso kuja chishangu’ kwa Mubali Sergey limoza ndi abali ndi azichi ŵidu wosi ku Russia.—Salimo 115:11.