Pa 1 March 2021, * khoti la Priokskiyourt of Nizhny Novgorod lingapereka cheruzgu chaki pa mulandu wa Mubali Sergey Verkhoturov. Iyu wangayeruzgika kuti wakaje mujeri kwa vyaka 7.

Sergey Verkhoturov

• Chaka cho Wakuwiya: 1974 (Muchigaŵa cha Irkutsk, ku Baikalsk)

• Mo Wakukuliya: Kwa vyaka 10 wagwiranga ntchitu ya magesi. Kweni pambula kuswera yapa wagwiranga ntchitu nge wakupereka ulongozgi pa nkhani za marangu pa kampani yinyaki

• Wakondwanga kusambira fundu za mu Bayibolu weche munamana. Wati wakuwa, wakondwesekanga ndi nkharu yamampha yo munthu munyaki yo wagwiranga nayu ntchitu wenga nayu. Munthu uyu wasambiranga Bayibolu ndi Akaboni aku Yehova. Pakumaliya paki, nayu wangwamba kusambira Bayibolu. Wanguzizwa ukongwa ndi fundu za uneneska zo zisanirika mu Bayibolu. Wangubatizika mu 1995. Wangutolana ndi Viktoriya, mu 2001

Pa 16 ndi pa 17 July 2019, ŵaraŵara a boma ku Russia angufufuza nyumba 35 za Akaboni aku Yehova muchigaŵa cha Nizhny Novgorod, kusazgapu nyumba ya Mubali Verkhoturov. Sergey wangukamba kuti, ŵati ayamba kufufuza munyumba yaki iyu wanguja waka phe chinanga kuti wafipanga mtima kamanavi waka. Pavuli paki, ŵaraŵara yaŵa anguwofyeza Viktoriya kuti amumangengi asani waleka kusumuwa vinthu vinyaki vachisisi. Sergey wangukamba kuti, “[Ivi] venga vakusuzga ukongwa kwaku ini.” Pa nyengu yosi yeniyi, Yehova wangumuwovya Mubali Sergey kulutirizga kuja wakukho ndipu muwolu waki Viktoriya * angumumanga cha.

Mubali uyu wangukamba kuti: “Ndasambira kuti ndingachitanga mantha cha ndi vinthu vo vechendachitiki, chifukwa kanandi vinthu vichitika mwakupambana ndi mo wamunthu waŵanaŵaniyanga. Asani wamunthu ukunthiyapu chiyesu, utachiziŵa kuti ŵanthu anyaki ndiwu awonanga kuti ungafiska cha kukunthiyapu chiyesu cho. Ndipu asani ukunthiyapu mayeseru, uziŵa kuti Yehova watikuwovya mwapade.”

Kuti walutirizgi kuja wakukondwa, Sergey waŵika ukongwa mtima pakuchita vinthu vo vingakondweska Yehova kweniso ŵanthu. Iyu wakamba kuti: “Chinthu chimoza cho ndikhumba ukongwa ntchakuti Yehova wakankhuskiki. Ndipemphera ndipu ndilutirizgengi kupemphere venivi kuti vichitiki. Ndipemphera so kuti wandiwovyi kukunthiyapu munthowa yo yingachitiska kuti zina laki likankhuskiki kweniso kuti ŵanthu anandi asambiri uneneska. Kutuwa waka po mulandu uwu ukwambiya, vingachitika kuti ŵanthu wo ndikumana nawu aziŵa chechosi cha chakukwaskana ndi Chiuta pamwenga aziŵa waka vimanavi waka. Mwaviyo, ndipempha Yehova ndi mtima wangu wosi kuti waŵawovyi kusambira vaku iyu ndikuja nawu paubwezi.”

Po abali ndi azichi ŵidu ku Russia alutirizga kutombozgeka, mu mtima yidu tituvwa nge mo wakutumika Paulo wavwiyanga. Iyu wangukamba kuti: “Ambuya achimangu, alutirizgi kukupaskani chimangu mu nthowa yeyosi. Ambuya aŵi namwi mosi.”—2 Atesalonika 3:16.