Pambula kuswera yapa, Khoti la Zeya lo le muchigaŵa cha Amur ku Russia, liperekengi cheruzgu chaki pa mulandu wa Mubali Vasiliy Reznichenko. * Loya wakumiya boma wechendakambi cheruzgu cho wakhumba kuti mubali uyu wapasiki.

Vasiliy Reznichenko

• Chaka cho wakuwiya: 1942 (Murovka, Muchigaŵa cha Primorye)

• Mo Wakukuliya: Iyu ndiyu mwana ukongwa pa ŵana ankhondi mu banja mwawu. Wangusambira kwendesa gandaganda ndipu pavuli paki wagwiranga ntchitu yakuwona mo sitima yitende kweniso makanika. Wakugwirapu ntchitu ya usilikali. Wati waleka ntchitu ya usilikali ndipu wangwamba kugwira ntchitu yakuwona mo sitima yitende, pakumaliya paki angumukweza kuja kaputeni. Wangulonde zina la ulemu la “Veteran of Labor of the Soviet Union”

  Wangutolana ndi muwolu waki Valentina, mu 1969. Ŵe ndi ŵana anthulumi atatu. Cha mu ma 1990, Valentina wangukambiya mulumu waki vakukwaskana ndi vo Bayibolu lisambiza. Wati waziŵa khumbu laku Chiuta lakukwaskana ndi charu chapasi, wangwamba kusambira Bayibolu ndipu wakondwanga ndi vo wasambiranga. Vasiliy wangubatizika kuja Kaboni waku Yehova mu 1996. Muwolu waki wakutayika mu 2016

Pa 21 March 2019, apolisi a mutawuni ya Zeya anguchifufuza mu nyumba ya Mubali Vasiliy Reznichenko. Yiwu angumulonda laputopu, foni kweniso makalata ngaki. Kutuwa ŵaka pa nyengu yeniyi, Mubali uyu akumuŵika pa mundandanda wa ŵanthu wo boma la Russia likamba kuti “achita vinthu vakofya” ndipu akumukaniza kugwiriskiya ntchitu ma akaunti ngaki ngaku banki. Iyu wangatuwaku so cha kuchigaŵa cho waja.

Vasiliy walutirizga kuthemba Yehova kuti wamuwovyi. Walutirizga kuchita vinthu vauzimu nge kuŵerenga Bayibolu zuŵa lelosi kweniso kuchita lemba la zuŵa. Iyu wawonga so chanju cho abali ndi azichi atimulongo.

Iyu wangukamba kuti: “Pa zuŵa lenili ŵati amaliza kufufuza munyumba yangu kweniso kundifumba mafumbu, abali ndi azichi mu mpingu anguza kuzindiwona. Anyaki mwa abali ŵenaŵa nawu [nyumba zawu] zikufufuzika. Pati pajumpha mazuŵa ngaŵi, abali anyaki wo aja mu matawuni ngapafupi ndi ko ini ndija, nawuso anguza kuzindiwona. Ndinguziŵa kuti wanangwa wenga pangozi. Ndinguchiskika ukongwa chifukwa cha kuza kwawu. Asani ndikumbuka venivi, masozi ngadika waka ngija mumasu mwangu.” Iyu wangukamba so kuti: “Vakuchitika ivi vandiwovya kuti ndije pa ubwezi wakukho ukongwa ndi Yehova. Ndipu iyu we nani pafupi ukongwa.”

Vasiliy wasaniya nthazi kweniso wapembuzgika ndi mazu ngo nge pa Aheberi 13:5. Iyu wangukamba kuti: “Ndilutirizgengi kuthemba layizgu laku Yehova lakuti: ‘Ndazakukulekani cha ndipuso ndazakukujowoni cha.’” Tigomezga kuti Yehova walutirizgengi kovya abali ndi azichi ŵidu wo atombozgeka chifukwa cha chivwanu chawu.