Pambula kuswera yapa, Khoti la Ussuriyskiy lo le Muchigaŵa cha Primorye liperekengi cheruzgu chaki pa mulandu wa Mubali Vitaliy Ilinykh. *

Vitaliy Ilinykh

• Chaka cho Wakuwiya: 1974 (ku Ussuriysk, Muchigaŵa cha Primorye)

• Mo Wakukuliya: Wakumaliza masambiru ngaki nga upolisi pa sukulu yinyaki ndipu wagwiranga ntchitu mu Dipatimenti yakufufuza apolisi wo aswa marangu. Nyengu zosi wajifumbanga kuti ntchifukwa wuli ŵanthu atufwa ndipu ntchinthu wuli chichitika asani munthu wafwa. Wangwamba kusambira Bayibolu ndi Akaboni aku Yehova cha mu ma 1990. Wakubatizika mu 1999. Pasonu panu wagwira ntchitu yakupeya mu msewu. Wakutorana ndi Irina mu 2006

Mu February 2019, arara a boma anguchifufuza munyumba ya Mubali Vitaliy Ilinykh ndipu angujuliya mulandu Akaboni anyaki mutawuni ya Spassk-Dalniy. Pa 18 September 2019, arara a boma ku Russia angwamba kumufufuza Vitaliy. Pa 23 October 2019, anguza so kachiŵi kuzifufuza munyumba yaki, kweni pa nyengu iyi, angumumanga ndipu anguchimujaliya mujeri kwa mazuŵa ngaŵi. Pa nyengu yo wenga mujeri,Vitaliy wapempheranga kwaku Yehova. Iyu wangukamba kuti: “Asani ndapemphera kwaku Yehova, ndalekanga kusuzgika maŵanaŵanu ndipu ndajanga ndi chimangu cha mumtima.”

Wati watuzgika mujeri, angumukaniza kutuwa muchigaŵa cho wajanga. Anyina aku Vitaliy zina lawu, Olga Opaleva, nawu atiŵamba mulandu unyaki.

Vitaliy wakusambira vinandi kutuliya pa vo vingumuchitikiya. Iyu wangukamba kuti: “Pakwamba ndaziŵanga kuti Yehova wangazomereza cha kuti tikumani ndi mayeseru ngo tingatondeka kukunthiyapu. Kweni pasonu panu, ndajiwone ndija kuti fundu iyi njauneneska nadi. Asani takumana ndi vinthu vakusuzga ukongwa pa umoyu widu ndipu tija paubwezi wakukho ukongwa ndi Yehova. Yehova ndiyu Wakutiwumba, ndipu asani wazomereza kuti nyengu zinyaki ndikumani ndi masuzgu nga nge motu, wandiwovyengi kukunthiyapu mpaka pakumaliya. Asani ndiwona kuti ndingafiska cha kukunthiyapu, ndikuti yeniyo ndiyu nyengu yakuti ndimupemphi Yehova kuti wandipaski ‘nthazi yakujumpha yo tituŵa nayu.’”—2 Akorinto 4:7.

Mwakawi, Vitaliy waswera cha kukwaskika ndi vinthu, kweni wachiskika asani waŵanaŵaniya lemba la 1 Peturo 5:9. Iyu wachiskika so ukongwa ndi chakuwoniyapu chamampha cha abali ndi azichi anandi ku Russia, wo mwachiganga alutirizga kukunthiyapu chinanga kuti atombozgeka. Vitaliy wangukamba mwakusimikiza kuti: “Cheruzgu chechosi cho Yehova wangazomereza kuti khoti lindipasi, . . . ndi mwaŵi ukulu kuchitiya ukaboni ku ŵanthu wo ŵe ndi mazaza munyengu yinu yakumaliya.”

Nge Vitaliy, tichiskika ndi vakuwoniyapu va abali ndi azichi anandi wo alongo chiganga ndipuso chivwanu. Ndipu tilutirizga kumuwonga Yehova pakutipaska “chinthu chechosi chamampha kuti tije akunozgeka kuchita khumbu laki.”—Aheberi 13:20, 21.