Pambula kuswera yapa, Khoti la Leninskiy lo le Muchigaŵa cha Novosibirsk, liperekengi cheruzgu chaki pa mulandu wa Mubali Vitaliy Popov. a

Vitaliy Popov

• Chaka cho Wakuwiya: 1967 (Ku Novosibirsk)

• Mo Wakukuliya: Wagwiranga ntchitu ya vamagesi ndipuso yakuwotchere visulu. Wakugwirapu ntchitu ya usilikali munyengu ya ulamuliru wa Soviet. Iyu watanja kuchita masaza mu ayisi, kutchaya bola la malundi, volleyball ndipuso kumba. Wangulereke limoza ndi aku ŵaki ŵaŵi ndi azichi waki ŵaŵi. Kweni Vitaliy wati wakuwa, mku waki mura ndi mzichi waki mura angufwa mwambula kuziŵika umampha. Ndipu kutuwa pa nyengu yeniyi, Vitaliy, wenga ndi mafumbu nganandi ngakukwaskana ndi nyifwa ndipuso vo vazamuchitika kunthazi

  Wangwamba kusambira Bayibolu ndi Akaboni aku Yehova mu chaka cha 1990. Wangukhorwa ndi vo wangusambira vakukwaskana ndi chifukwa cho ŵanthu afwiya. Wangukondwa so ukongwa kuwona mo Akaboni alongore kuti atanjana, kutumbikana ndipuso kuwovyana. Wakubatizika mu 1994. Wangutorana ndi Natalya mu 2011

Pa 27 June 2019, ŵaraŵara aboma angumujuliya mulandu Mubali Vitaliy. Pa 9 April 2020, apolisi anguza kunyumba kwaki kuzimuto kuti akamufumbi mafumbu. Yiwu angumufumba mafumbu kwa maora ngakujumpha nganayi.

Vitaliy angumuŵika pa mundandanda wa ŵanthu wo boma likamba kuti achita vinthu vakofya. Mwakuti akujala akaunti yaki yaku banki. Pati pajumpha myezi yiŵi, Vitaliy akumutuzga ntchitu. Venivi vichitiska kuti banja laki lisuzgikengi kusaniya ndalama zakuguliya vakukhumbika.

Yehova walutirizga kuwovya banja la Mubali Vitaliy. Vitaliy wangukamba kuti: “Yehova wangutiwovya ukongwa kuti tilutirizgi kuja nayu paubwezi ndipu wangutipaska vinthu vakuliŵavu vo takhumbikiyanga. Banja langu losi liwonga chovyu cho Yehova wangutipaska ndipu venivi vatiwovya kukunthiyapu mayeseru ndipuso kulutirizga kuja ndi maŵanaŵanu ngamampha.”

Vitaliy wangukonkhoska cho chingumuwovya ukongwa kuti wakunthiyepu mayeseru. Iyu wangukamba kuti: “Chifukwa chakuti nyengu zosi ndisopa Yehova, vandiwovya kuja nayu pa ubwezi wakukho ukongwa. Iyu ndi munyangu wapamtima. Ndikusambira kuti mwemosi mo vinthu vingaŵiya, nditenere kumuthemba.” Vitaliy we ndi ndondomeku yamampha yakuchitiya vinthu vauzimu, kusazgapu kuchita kusopa kwa pabanja, kuwungana, kupharazga kweniso kupemphera. Iyu wangukamba kuti: “Nkhalekengi kuchita venivi, ndatingi ndifiskengi cha kumuthemba Yehova kweniso kumalana ndi mayeseru ngosi ngo ndakumana nangu.”

Po tilindizga vo khoti lazamuyeruzga, tilutirizga kumupemphere Mubali Vitaliy. Tiziŵa kuti Yehova ndiyu ‘watitipaska nthazi,’ ndipu walutirizgengi kuŵapaska nthazi abali ndi azichi ŵidu ku Russia kuti alutirizgi kukunthiyapu mwachiganga mayeseru ngo akumana nangu.—Afilipi 4:13.