Pa 16 December 2020, * Khoti la muchigaŵa cha Leninskiy ku Novosibirsk liyeruzgengi mulandu wakukwaskana ndi Mubali Yuriy Savelyev. Loya wakumiya boma wangupempha kuti mubali Yuriy wakaje mujeri kwa vyaka 8. Iyi yijengi nyengu yitali ukongwa yakuti mubali wakaje mujeri kuluska nyengu zo abali anyaki wosi ku Russia apaskikapu kutuliya po Khoti Likulu Ukongwa lingukaniziya ntchitu ya Akaboni aku Yehova mu 2017.

Yuriy Savelyev

• Chaka cho Wakuwiya: 1954 (Ku Krokhalyovka, muchigaŵa cha Novosibirsk)

• Mo Wakukuliya: Anyina akutayika iyu weche bonda. Wakulereka ndi mzichi waki. Wagwiranga ntchitu nge pulambara kumalu ngakupanga magesi. Wangwamba kwanja kusopa muwolu waki wati watayika. Ndipu wangusaniya kwamuka kwa mafumbu ngo wenga nangu kutuliya mu Bayibolu. Iyu wangubatizika kuja Kaboni waku Yehova mu 1996

Pa 8 November 2018, apolisi angufufuza nyumba ya mubali Yuriy ndipuso nyumba zinyaki 9 za Akaboni muchigaŵa cha Novosibirsk. Iyu wangumangika ndipu angumuŵika mujeri kulindiziya mulandu waki.

Yuriy atimumba mulandu wakuti wachita vinthu vakukwaskana ndi Akaboni aku Yehova mutawuni yeniyi. Aja achisazgiyaku nyengu yakulindizgiya mulandu waki maulendu ngakukwana 9 chinanga kuti waja wachipanga apilu kananandi waka kuti amutuzgi mujeri. Iyu waja mujeri kwa vyaka vakujumpha viŵi. Kutuwa po Khoti Likulu Ukongwa ku Russia linguyeruzgiya mu 2017, Mubali Dennis Christensen ndi Sergey Klimov ndiwu aja mujeri kwa vyaka vinandi kuphara Mubali Savelyev.

Po wakambanga mazu ngaki ngakumaliya pa Chitatu pa 9 December 2020, Yuriy wangukambiya wakweruzga mwachiganga kuti: “Ndawona kuti ndimbika mulandu chifukwa chakuti nde ndi mulandu cha kweni chifukwa chakulondo vo chisopa cha Akaboni aku Yehova chisambiza.

“Nde ndi arwani cha ndipu panu nde ndi vyaka pafufupi 67, Ndechendambikepu mulandu wewosi. Ndisereriyamu cha mu vacharu. Mu mazu nganyaki, nditinkhana ndi vachiwawa vevosi, kwali vakuti ŵanthu alongoro, kaya vo aŵanaŵana pamwenga kupumana chayiku.

“Chifukwa chakuti ndikhumba kuvwiya Chiuta nditumbika munthu weyosi kwali ngwakukhuphuka pamwenga cha, kwali wakutuliya nunkhu kweniso ngwachisopa wuli.

“Mazu ngaku Chiuta ngatitichiska kuti titumbikengi wo ŵe ndi mazaza. Mukalata yo yalutanga kwa Aroma, pachaputala 13:1-3, pakamba kuti: ‘Munthu weyosi wajithereskengi ku ŵaraŵara amazaza, pakuti palivi wamazaza yo walipu kwambula kuzomerezeka ndi Chiuta. Amazaza wosi ŵe mumalu mwawu chifukwa akuzomerezeka ndi Chiuta. Mwaviyo, munthu weyosi yo wasuskana ndi wamazaza, wasuska ndondomeku yaku Chiuta.’

“Ndisuskana ndi wo ŵe ndi mazaza cha chifukwa ndikhumba cha kususkana ndi Chiuta. Kususkana ndi Chiuta kulongozge kunyifwa. Mbakaboni aku Yehova pe wo akundiwovya kuziŵa Chiuta yija wauneneska kweniso Mwana waki Yesu Khristu. Nditiŵawonga ukongwa chifukwa ndiwu akundiwovya kuziŵa kuti Bayibolu lo ndi Malemba Ngakupaturika, ndi buku lapade ukongwa. Lititiwovya pa chechosi chakukwaskana ndi umoyu widu.”

Tichiskika ukongwa kuvwa kuti chivwanu cha mubali Yuriy ntchakukho ndipu tiwona kuti Yehova watimutumbika mwakulutirizga kumupaska chimangu.—Yesaya 26:3.