Pa October 7 2020, * khoti la Mayskiy lo le ku Kabardino-Balkarian Republic lazamuyeruzga mulandu wa Mubali Yuriy Zalipayev. Mubali uyu wangaziyeruzgika kuti wakaje mujeri kwa vyaka viŵi.

Yuriy Zalipayev

• Chaka cho Wakuwiya: 1962 (Ku Samara)

• Mo Wakukuliya: Wagwiranga ntchitu yakuwotchere visulu ndipuso kwendesa galimotu. Watanja kulemba ndakatulu kweniso kuchiwona malu

• Mu 1983 wangutolana ndi Natalia, yo wasambiriyanga limoza sukulu. Pati pajumpha vyaka 10 wosi angwamba kusambira Bayibolu. Ŵe ndi ŵana atatu. Wosi ateŵete Yehova pamoza ndi achibali ŵawu

Pa 20 August 2016, apolisi angufufuza Nyumba ya Ufumu ku Mayskiy ndipu anguŵikiyamu dala nganyaki mwa mabuku ngidu ngo ngakukanizika chifukwa boma liwona kuti “ngakofya.” Chinanga kuti abali ŵenga ndi vidiyo yo yalongonga ukaboni wakuti apolisi anguŵikiyamu dala mabuku, khoti lingukamba kuti abali yaŵa aswa dangu ndipu atenere kulipira ndalama zakukwana madola 2,634 nga ku America. Pati pajumpha myezi yimanavi waka, Mubali Zalipayev wangwamba kumbika mulandu chifukwa cha nkhani yeniyi.

Loya wakumiya boma wangukamba kuti Mubali Zalipayev wagaŵiya ŵanthu mabuku ngakukanizika ndipuso wachiska Akaboni aku Yehova anyaki kuti achitengi vinthu vakulimbana ndi ŵanthu avisopa vinyaki. Dangu likaniza kuchita venivi ndipu ŵanthu wo achita ivi akamba kuti ‘achiska ŵanthu kuti achitengi vinthu vakofya’ (Chigaŵa chakwamba cha Dangu nambala 280 la ku Russia).

Mulandu wenuwu ungwamba pa 21 June 2020. Pa nyengu yo ayeruzganga mulandu uwu, akaboni wo amiya loya wa boma asuskananga ŵijaŵija. Mwakuyeruzgiyapu, akaboni anyaki wo pakwamba akambanga kuti angumuvwa Mubali Zalipayev wachichiska ŵanthu kuti achitengi vinthu va chiwawa, pavuli paki yiwu angwamba kukana kuti pengavi. Kusazgiyapu yapa, akaboni anyaki angukamba kuti arara a boma ndiwu anguchiŵika mabuku ngakukanizika mu Nyumba ya Ufumu.

Po Mubali Zalipayev walindizga cheruzgu chenichi, tipemphera kuti iyu limoza ndi banja laki, aje ndi nthazi ndipuso chimangu kuziya mu mazu ngo Davidi wangukamba ngakuti: “Yehova ndi nthazi zangu kweniso chishangu changu; mtima wangu uthemba iyu. Ini ndalonde chovyu chaki, ndipu mtima wangu ukondwa.”—Salimo 28:7.