MAY 21, 2021
RUSSIA
Mubali ndi Mzichi Krutyakov, Mubali Nikiforov Ndipuso Mubali Zherebtsov Athemba Yehova Chinanga Kuti Ambika Mulandu
UPDATE | Khoti ku Russia Likuyeruzga Kuti Mubali ndi Mzichi Krutyakov, Mubali Nikiforov Ndipuso Mubali Zherebtsov Angapalamulanga Mulandu Wewosi Cha
Pa 24 May 2021, Khoti la Chekhov lo le Muchigaŵa cha Moscow likuyeruzga kuti Mubali ndi Mzichi Krutyakov ndipuso abali ŵawi, Mubali Nikiforov ndi Mubali Zherebtsov ŵe ndi mulandu. Khoti ili likuyeruzga kuti Mubali Krutyakov wangapalamulanga mulandu wewosi cha kwa vyaka 6. Mzichi Krutyakova, Mubali Nikiforov kweniso Mubali Zherebtsov akuŵayeruzga kuti angapalamulanga mulandu wewosi cha kwa vyaka viŵi. Wosi alutengi kujeri cha pa nyengu iyi.
Nyengu yo Khoti Liyeruzgiyengi Mulandu
Pambula kuswera yapa, Khoti la Chekhov lo le Muchigaŵa cha Moscow, liperekengi cheruzgu chaki pa mulandu wa Mubali Yuriy Krutyakov ndi muwolu waki Zinaida Krutyakova, pamoza ndi abali ŵaŵi, Mubali Vitaliy Nikiforov ndi Mubali Konstantin Zherebtsov. *
Vakukwaskana ndi Ŵanthu Yaŵa
Yuriy Krutyakov
Chaka cho Wakuwiya: 1952 (Ku Nizhny Novgorod)
Mo Wakukuliya: Wakusambira va uyinjiniya. Wakugwirapu ntchitu yakulemba mapulani ndipuso yakuwonere anyaki. Kwa vyaka vinandi wakhumbanga kuziŵa chilatu cha umoyu. Wangusaniya kwamuka kwaki wati wasambira Bayibolu ndi Akaboni aku Yehova. Wakubatizika mu 1998
Wakutorana ndi Zinaida mu 2012. Yiwu atanja kubika ndipuso kuvwisiya sumu
Zinaida Krutyakova
Chaka cho Wakuwiya: 1958 (Ku Nizhnedevitsk)
Mo Wakukuliya: Waleranga yija mwana waki. Wagwiranga ntchitu nge injiniya wa vinthu vakupambanapambana. Pasonu panu wakupumuwa ntchitu
Wakwiyanga ukongwa ndi vinthu vambula urunji vo vichitika pacharu. Wangusaniya kwamuka wati wayamba kusambira Bayibolu ndi Akaboni aku Yehova. Wakubatizika mu 2003. Wakutorana ndi Yuriy mu 2012
Vitaliy Nikiforov
Chaka cho Wakuwiya: 1968 (Ku Nevel, Muchigaŵa cha Pskov)
Mo Wakukuliya: Weche mwana, wangaziŵanga umampha ukongwa masamu kweniso wayanjanga kuchita masaza. Wagwiranga ntchitu nge wakunozga ndegi za nkhondu ku Russia
Wangwamba kusambira Bayibolu ndi Akaboni aku Yehova mu 2005. Wanguleka ntchitu ya usilikali mu 2007. Wakubatizika mu 2012
Konstantin Zherebtsov
Chaka cho Wakuwiya: 1973 (Ku Turkmenistan)
Mo Wakukuliya: Weche wachinyamata, wayanjanga kunyamuwa maweti kweniso wagwiranga ntchitu ya masitampu. Wakumaliza masambiru ngaki pa koleji yinyaki ndipu wagwiranga ntchitu ya vamagesi. Kutuwa mu 2003, wagwiranga ntchitu pa kampani yinyaki yo yipanga vamagesi nganyukiliya.
Wakutorana ndi Natalya mu 1994. Wosi angwamba kusambira Bayibolu ndi Akaboni aku Yehova ndipu angubatizika mu 2016
Vo Vinguchitika Kuti Ambiki Mulandu
Pa 30 September 2019, Komiti Yakufufuza milandu yo ye muchigaŵa cha Moscow ku Russia, yingumujuliya mulandu Mubali Vitaliy Nikiforov, Konstantin Zherebtsov, Yuriy Krutyakov ndi muwolu waki Zinaida Krutyakova. Pati pajumpha mazuŵa ngaŵi, apolisi angufufuza nyumba zosi za abali yaŵa.
Vitaliy, Konstantin, ndi Zinaida anguŵafumba mafumbu kwa maora nganandi ndipu anguŵajaliya mujeri kwa usiku umoza. Pavuli paki anguŵakambiya kuti akachitengi ukayidi wa panyumba.
Pa 5 March 2020, Yuriy angumuŵika mujeri kulindiziya mulandu waki. Kutuwa waka pa nyengu yeniyi, aja achimusamisiya ku majeri ngatatu ngakupambanapambana. Iyu weche mujeri mpaka sonu.
Konstantin wangukamba kuti pempheru ndilu lamuwovya kukunthiyapu mayeseru ngenanga. Usiku wo apolisi afufuzanga nyumba za abali yaŵa, Konstantin wangupempha Yehova kuti wamuwovyi kuti waleki kusuzgika maŵanaŵanu. Iyu wangukamba kuti: “Chifukwa chakuti mtima wangu wenga mumalu kweniso tinguŵatumbika arara a boma, vinguwovya kuti ini ndi banja langu tichitiyi ukaboni wakuti ŵanthu aku Chiuta mbachimangu ndipuso avwiya marangu.”
Konstantin wangulutirizga kukamba kuti: “Asani vinthu vandisuzga, lemba la Zekariya 2:8 ndilu landiwovyanga ukongwa kuja ndi nthazi. Landikumbusanga kuti Yehova watindiphwere ndipu watindiwona kuti nde wakuzirwa; iyu watindisimikiziya kuti wandivikiliyengi nge mboni ya jisu laki.”
Po abali atatu ndi azichi ŵidu akwanjiwa ŵenaŵa alutirizga kumuponye Yehova mphingu zawu, tigomezga kuti iyu walutirizgengi kuŵapaska vo akhumbikiya.—Salimo 55:22.
^ Ndi nyengu zosi cha po akambiya limu nyengu yo khoti liperekiyengi cheruzgu.