Mubali Ivan Puyda wakumbuka kuti mazulu ngengosi awisi amuŵerengiyanga buku lakuti, Buku Langu la Nkhani za M’bayibolo pamoza ndi ŵana anyaki 7. Wakumbuka so kuti iyu ndi awisi a Grigoriy, apharazgiyanga limoza kumuzi kwawu ku Kvitok, ndipu kanandi wapharazgiyanga asambizi ŵaki ndi anyaki wo wasambiranga nawu sukulu. Pa nyengu yo wenga wachinyamata, Mubali Puyda wangupharazgapu ku chigaŵa cho kuleka kupharazgika kaŵikaŵi limoza ndi agogu ŵaki a Pyotr Partsey. Yapa ndipu wanguziŵiya kuti agogu ŵaki atanja ukongwa uteŵeti ndipuso mbakujipereka.

Mubali Puyda waŵawonanga awisi ndi agogu ŵaki achiŵerenga Bayibolu ndi mabuku nganyaki ngo ngakonkhoska Bayibolu. Ndipu nayu wangusimikiza mtima kuyezga chakuwoniyapu chawu.

Pasonu panu Mubali Puyda we ndi vyaka 41, ndipu walutirizga kulondo chakuwoniyapu cha awisi ndi agogu ŵaki munthowa yo walekanga kuŵanaŵaniyaku. Iyu angumumanga chifukwa chakuti wateŵete Yehova. Gulu linyaki lakuvikiliya ŵanthu la FSB lingumanga Mubali Puyda pa 30 May 2018. Wanguja mujeri kwa myezi yinayi. Ŵati amutuzga, angamulangiya jeri la panyumba kwa myezi 6. Agogu ŵaki a Partsey, nawu angumangika ndi kuŵikika mujeri mu nyengu ya chipani cha Nazi ndi Soviet Union. Awisi a Grigoriy Puyda nawu anguŵikika so mujeri munyengu ya Soviet Union.

Mubali Ivan Puyda wangukamba kuti: “Pa 2 Timote 3:14, wakutumika Paulo wangulemba kuti, ‘Lutirizga kuchita vinthu vo ukusambira ndipuso vo ukuvigomezga wati wakhorwa navu, pakuti utiŵaziŵa ŵanthu wo akukusambiza venivi.’ Chifukwa chakuti nditiŵaziŵa wo ndikusambiraku uneneska, vitindiwovya kuti ndije ndi nthazi. Palivi cho chinguŵatondekesa kuteŵete Yehova kwali mbarara aboma pamwenga jeri ndipu kutombozgeka kuja kwamuyaya cha. Nani ndiyezga yiwu ndipu ndilutirizgengi kulondo chakuwoniyapu chawu. Ndipu ndiziŵa kuti asani ndingalutirizga kuja wakugomezgeka kwaku Yehova, iyu wanditumbikengi.” Mubali Puyda walindizga vo khoti liyeruzgengi pa mulandu waki.

Mubali Puyda wangukamba kuti asani awisi ndi agogu ŵaki akamba nkhani zakukwaskana ndi ku jeri akambangapu cha mo umoyu ujaliya wakusuzga ku jeri. Kweni akambanga waka vinthu vamampha vo angukumana navu asani apharazga uthenga wamampha.

Mubali Grigoriy sonu we ndi vyaka 64 ndipu wakubatizika mu 1975, wati waja kali mujeri kwa chaka champhumphu chifukwa chakukana kusere usilikali. Angutuzgika mu 1977. Anguŵikika so mujeri mu 1986 chifukwa angusanilika ndi mabuku ngidu ngo boma lakanizganga. Awisewu wo zina lawu ŵenga a Ivan, anguŵikika mu msasa wakutambuzgiyaku ŵanthu kwamba mu 1944 mpaka 1950, chifukwa cha kuleka kuchitaku vacharu.

Mubali Grigoriy wangukamba kuti: “Kuja ndi chivwanu chakukho kungundiwovya kukunthiyapu po ndatombozgekanga. Ndakayikanga cha kuti nditenda mu uneneska ndipuso kuti Yehova ndi Chiuta wa uneneska.”

Pasonu panu mwana wawu Ivan, wakumana ndi masuzgu ngo yiwu akumananga nangu. Mubali Grigoriy wangukamba kuti, “Ndikumbuka vo vachitikanga munyengu ya Soviet Union, ndipu venivi ndivu vichitika so sonu. Mwaviyo, ndipemphera kuti mwana wangu Ivan walutirizgi kuja wakugomezgeka munyengu yakusuzga iyi ndipu zina laku Yehova lilutirizgi kuja lakutowa.”

Mu 1943, chipani cha Nazi chingutumiza agogu aku Ivan a Partsey, wo pasonu panu akutayika, ku msasa ya ku Maidenek ndipu pavuli paki anguŵatumiza ku Ravensbrück chifukwa chakukana kusayina kadi lakuti aleka kuteŵete Yehova. Yiwu angufwatulika chipani cha Nazi chati chathereskeka mu 1945. Yiwu angumangika so mu 1952 ndipu anguŵayeruzga kuti anyongeki. Kweni chilangu chawu chingusintha ndipu anguŵatuzga mu 1956. Mubali Partsey wangumangika so chifukwa cha chivwanu chaki mu 1958 ndipu mu 1964 wangutuzgika.

Ivan wangukamba kuti “Kugomezgeka kwa agogu kwandiwovya kuti ndije wakukho. Asani aziyuskika, ndazakuŵakambiya kuti nani ndingukumana ndi mayeseru nge ngo yiwu angukumana nangu ndipu chakuwoniyapu chawu chingundiwovya kuti ndilutirizgi kuja wakugomezgeka ndipuso wachiganga.”

Ivan wangukamba so kuti “Palivi yo wangandilonda chivwanu ndipuso chanju kwaku Yehova Chiuta wangu. Ndaja ndichiŵakambiya mwakuwerezawereza wo afufuza va milandu kuti: ‘Chinthu cho yimwi mungachita nkhundimanga ndi kundiŵika mujeri, kweni mulivi nthazi pa vo ve mumaŵanaŵanu ndipuso mumtima mwangu.’”

Kumbi ntchinthu wuli cho chinguwovya abali ŵidu akwanjiwa po ayesekanga?

Ivan wangukamba kuti: “Pa Machitidu 14:22, tiŵerengapu kuti, ‘Titenere kukumana ndi masuzgu nganandi kuti tikasere mu Ufumu waku Chiuta.’ Mkhristu weyosi wakunthiyapu mayeseru nga mtundu unyaki. Venivi vilongo kuti mbakhristu wosi cha wo angaja mujeri. Anyaki angakumana ndi masuzgu nge kutama pamwenga nyifwa ya munthu yo atanja. Tingafiska kukunthiyapu asani tiwona vinthu mwakwenere kweniso asani te pa ubwezi wakukho ndi Yehova. Yehova ngwakunozgeka kuti wawovyi ŵanthu waki.”

Awisi a Grigoriy, angukamba kuti: “Jani paubwezi wakukho ndi Yehova. Jani bwezi laki leneku. Mbumampha kusaniya ukaboni wakuti tikusaniya uneneska. Pavuli paki tingafiska kuchita chechosi kuti tilutirizgi kuteŵete Yehova. Mwazamulonde mphotu chifukwa cha phamphu linu.”

Tichiskika asani tiŵerenga nkhani za mo Yehova wawovye abali ndi azichi ŵidu wo atombozgeka chifukwa cha chivwanu chawu. Tilutirizgengi kupemphere abali ŵidu ku Russia kuti alutirizgi kuja ndi chiganga ndipuso kugomezga ukongwa layizgu laku Yehova lakuti: “Ungawopanga cha . . . Mphotu yaku yazamuja yikulu ukongwa.”—Genezesi 15:1.