Pambula kuswera yapa, Khoti la Birobidzhan of the Jewish Autonomous liperekengi cheruzgu chaki pa mulandu wa Mzichi Anastasiya Guzeva. *

Anastasiya Guzeva

• Chaka cho Wakuwiya: 1979 (Ku Birobidzhan)

• Mo Wakukuliya: Iyu pamoza ndi azichi ŵaki ŵaŵi a kulereka ndi anyinawu. Weche mwana, wayanjanga kuŵerenga, kuchita masaza kweniso kuvina. Wati wafika vyaka 10, wangusaniya Bayibolu munyumba ya ambuyaki. Venivi vingumuchitiska kuti wayambi kusambira vinandi vakukwaskana ndi Chiuta. Pavuli paki, iyu ndi anyina angwamba kusambira Bayibolu ndi Akaboni aku Yehova. Ndipu wosi angubatizika mu 1995. Wakutolana ndi Konstantin, mu 2001

Mu May 2018, arara a boma ku Russia angufufuza munyumba yaku Anastasiya ndi Konstantin. Mu July 2019, Mubali Konstantin angumujuliya mlandu wakuti wachita “vinthu vakofya.” Ndipu mu February 2020, muwolu waki Anastasiya nayu amumbanga mulandu wakuyanana waka. Akaboni aku Yehova akukwana 23 wo aja muchigaŵa cha Jewish Autonomous anguŵajuliya milandu yakukwana 19.

Ŵanthu wo afufuza milandu, achitiska kuti umoyu waku Anastasiya ndi Konstantin uje wakusuzga ukongwa. Chifukwa chakuti atiŵawona kuti mbanthu wo “achita vinthu vakofya,” vachitisa kuti aŵatuzgi ntchitu yo agwiranga pa sukulu yo asambiza kumba sumu. Mu February 2021, Konstantin akumuyeruzga kuti wangapalamulanga mulandu wewosi cha kwa vyaka viŵi ndi hafu.

Anastasiya wakonkhoska vo vingumuwovya kuti wakunthiyepu, iyu wangukamba kuti: “Mbumampha kuziŵiya limu kuti wazamutombozgeka ndipu ukhumbika kunozgekeresa maŵanaŵanu ngaku mo wazamuchitiya asani wakumana ndi masuzgu. Mwakuyeruzgiyapu, asani muŵerenga vo vinguchitikiya Yesu pazuŵa lakumaliya la umoyu waki wa pacharu chapasi, vichita kuwoneke limu kuti iyu wangunozgeke limu vo wangazichita asani wazimangika, . . . nyengu yo wangalongoro, nyengu yo wangajaliya cheti kweniso vo wangakamba asani wakhumba kulongoro.”

Anastasiya wangukamba kuti mazu nga pa Aroma 8:38, 39 ngatimuchiska ukongwa pasonu panu. Iyu wangukamba kuti: “Mazu nga pa lemba ili ngatindipaska chifukwa chakujaliya wakukondwa. Yehova ndi Yesu ndiwu ŵija ŵe ndi nthazi ukongwa muchilengedu chosi, yiwu atindiyanja ukongwa ndipu palivi yo wangaŵatondekesa kuti aleki kundiyanja. Kukamba uneneska, venivi vitindichiska kuti ndikunthiyengepu kweniso ndije ndi chiganga.”