Khoti la muchigaŵa cha Birobidzhan of the Jewish Autonomous pambula kuswera yapa liperekengi cheruzgu chaki pa mulandu wa Mzichi Anna Lokhvitskaya. * Loya wa boma wechendakambi cheruzgu cho wakhumba kuti mzichi uyu wapaskiki.

Anna Lokhvitskaya

• Chaka cho Wakuwiya: 1993 (Ku Birobidzhan)

• Mo Wakukuliya: Wakulereka ndi anyina ndipu ndiwu angumukambiya kuti walondongi fundu za mu Bayibolu. Wangubatizika mu 2012. Wagwira ntchitu yakusona vakuvwala. Wakutolana ndi mulumu waki Artur, mu 2018. Yiwu atanja kuŵeja, kuchitembeya kweniso kuseŵe volleyball

Pa 6 February 2020, Anna wenga yumoza mwa Azichi 6 wo angumbika mulandu ndi apolisi ku Birobidzhan, ku Russia wakuti achita vinthu “vakofya.” Muchigaŵa chenichi, Akaboni aku Yehova akukwana 19 atiŵamba mulandu kusazgiyapu mulumu waki Artur ndipuso apongozi ŵaki a Irina.

Venivi vachitiska kuti banja ili likumani ndi masuzgu nganandi. Yiwu angayenda cha ulendu utali, ma akawunti ngawu ngaku banki akuŵajaliya ndipuso alivi mwaŵi wakuti angagwira ntchitu. Chifukwa cha venivi, Anna wasuzgika ukongwa maŵanaŵanu vo vichitiska kuti nyengu zinyaki walutengi kuchipatala kuti wakalonde chovyu.

Iyu wangukamba kuti pe vinthu vinandi vo vamuwovya. Iyu wanguti: “Sumu za mu broadcasting zitindisisipuwa ukongwa. Sumu izi zitindiwovya kuti ndivwengi umampha mumtima kweniso kuti mayeseru ngo ndikumana nangu ndingawonengi mwakwenere. Kuchita masaza naku kutindiwovya so kuti ndiŵanaŵaniyengi vinthu vakuchiska.”

Kusazgiyapu yapa, Anna wangukamba kuti iyu ndi mulumu waki Artur atesesa kuŵika vakukhumba va anyawu pamalu ngakwamba. Iyu wangukamba kuti “Tikunozga ndondomeku yakuti mwezi wewosi tiwovyengi anyidu mwakuŵapaska mphasu, chinanga yingaŵa yimana wuli. Titanja kuŵanaŵaniya masuzgu ngo anyidu akumana nangu mumalu mwakujaliya kuŵanaŵaniya waka masuzgu ngidu.”

Po walindiziya mulandu waki kuti uyeruzgiki, Anna wawona kuti vo vitimuchitikiya ndi ‘mwaŵi ukulu wakulongo kuti ngwakugomezgeka kwaku Yehova mu vakuchita vaki.’—Salimo 18:2.