MARCH 29, 2021
RUSSIA
Mzichi Irina Lokhvitskaya Walutirizga Kuja ndi Chiganga Chinanga Kuti Wambika Milandu
VO VACHITIKA SONU | Khoti ku Russia Lakana Apilu ya Mzichi Lokhvitskaya
Pa 16 November 2021, khoti la Muchigaŵa cha Jewish Autonomous likukana apilu ya Mzichi Irina Lokhvitskaya. Cheruzgu chaki cho angumuyeruzga pakwamba chakuti wangapalamulanga mulandu wewosi cha chechendasinthi. Iyu walutengi kujeri cha pa sonu panu.
Pa 19 July 2021, khoti la Birobidzhan lo le Muchigaŵa cha Jewish Autonomous lingumusaniya ndi mulandu Mzichi Lokhvitskaya ndipu lingumuyeruzga kuti wangapalamulanga mulandu wewosi cha kwa vyaka viŵi ndi hafu.
Vakukwaskana ndi Munthu Uyu
Irina Lokhvitskaya
Chaka cho Wakuwiya: 1962 (Izvestkovoye)
Mo Wakukuliya: Awisi akutayika iyu we ndi vyaka 6. Weche munamana, wayanjanga kuvina, kuluka vinthu, kuwonere mafilimu kumaholu, kweniso kuseŵe basketball ndi volleyball
Chilindizga cha mu Bayibolu chakuti akufwa azamuyuka chingumukwaska ukongwa. Wangubatizika kuja Kaboni waku Yehova mu 1993. Mulumu waki wangutayika pati pajumpha waka myezi 7 kutuliya po iyu wangubatizikiya ndipu venivi vinguchitiska kuti waleri yija mwana waki zina laki Artur yo wenga ndi vyaka 7 pa nyengu yo
Vo Vinguchitika Kuti Wambiki Mulandu
Pa 6 February 2020, Mzichi Irina Lokhvitskaya wenga yumoza mwa azichi 6 wo arara a boma ku Russia mutawuni ya Birobidzhan, anguŵamba mulandu wakuti achita “vinthu vakofya.” Akaboni aku Yehova 22 mutawuni iyi kusazgapu mwana waku Irina, Artur ndi muwolu waki Anna, atiŵamba milandu yakukwana 19.
Khoti likuzomereza cha kuti ŵanthu, atolankhani ndipuso ŵanthu a mubanja laku Irina avwisiyi mulandu waki. Khoti lingukana vo Irina wangupempha kuti paŵi ŵanthu anandi pa mulandu waki ndipuso kuti awuweze kwaku loya waboma.
Chifukwa cha masuzgu ngo Irina wakumana nangu vachitiska kuti watamengitamengi ndipu nyengu zinyaki waguŵa. Kweni kuchita vinthu vauzimu ndiku kutimuwovya kuti wakunthiyengepu. Iyu wangukamba kuti: “Yehova wakundiwovya kuti ndiziŵiriyi kuchita vinthu vauzimu. Ndiŵerenga waka Bayibolu cha, kweni ndifufuza so kuti ndivwisi.” Asani wayamba kufipa mtima mwakuti wangafiska cha kuŵerenga Bayibolu, Irina wakambiya Yehova kuti wamuwovyi. Iyu wangukamba kuti: “Nditamba kupemphera mwakutuliya pasi pa mtima ndipu nditamba so kuchita vinthu nge mo ndachitiyanga kali. Yehova wandisambiza kuti ndikhumbika cha kujiŵanaŵaniya waka ndija, mumalu mwaki ndikhumbika kuŵanaŵaniya so ŵanthu anyaki.”
Irina waŵanaŵaniya ukongwa ŵanthu wo akhumbika chovyu kweniso kuchiskika kuphara iyu. Ŵanthu ŵenaŵa asazgapu ŵanthu akunweka ndipuso abali ndi azichi. Iyu wangukamba kuti: “Asani uŵanaŵaniya ŵanthu anyaki, uŵavi nyengu yakuti ujilenge lisungu pamwenga kufipa mtima ukongwa.”
Mpingu nawu utimuchiska ukongwa Irina, ukongwa ŵara. Iyu wangukamba kuti: “Chinanga kuti nawu atombozgeka kweni atindipembuzga ndipu nyengu zosi asaniya mazu ngamampha kuti andichiski. Ndipuso nyengu zosi atindiwovya asani ndikhumbika chovyu ndipu ndiwonga ukongwa chifukwa cha vo achita.”
Po Irina walutirizga kukunthiyapu chiyesu chenichi, te ndi chigomezgu kuti Yehova walutirizgengi kumupaska chechosi cho wakhumbikiya. Irina wangukamba kuti: “Kali asani ndiŵerenga nkhani yakukwaskana ndi kutombozgeka, nyengu zosi ndakhumbisiskanga kuziŵa vo ndazamuchita asani ndazikumana ndi chiyesu. Ndipu ndajifumbanga kuti: Kumbi ini ndingazimuthemba Yehova? Sonu kwamuka ndikukusaniya. Ndipu ndi chovyu chaki, ndilutirizengi kumuthemba Yehova. Nge mo ateŵeti ŵaki wosi achitiya, nani ndilutirizgengi kuja wakukho ndipu Yehova wandikongi ndi janja laki lamaryi.”—Yesaya 41:10.