Pambula kuswera yapa, Khoti la Leninskiy ku Rostov-on-Don liperekengi cheruzgu chaki pa mulandu wa Mzichi Lyudmila Ponomarenko. a

Lyudmila Ponomarenko

• Chaka cho Wakuwiya: 1950 (ku Ola, Muchigaŵa cha Magadan)

• Mo Wakukuliya: Wechendaleki ntchitu, wagwiranga ntchitu pakampani yakupanga magesi. We ndi ŵana anthukazi ŵaŵi ndi azuku ŵaŵi. Watanja kuŵerenga ndipuso watanja vakulukaluka. Waphwere mulumu waki yo watama matenda ngakulu

• Wangukondwa ukongwa wati waziŵa zina chayilu la Mlengi. Khumbu laku Chiuta lakukwaskana ndi charu chapasi kweniso ŵanthu, lingumufika pa mtima ukongwa. Wakubatizika mu 1998 kuja Kaboni waku Yehova

Pa 6 June 2019, Mzichi Lyudmila Ponomarenko angumujuliya mulandu. Milandu yaki yasazgangapu kupereka malu ngakuchitiyapu maunganu kugulu lo boma litilikamba kuti “ndakofya,” ndipuso chifukwa chakuti wakambiyangaku anyaki uthenga wa mu Bayibolu.

Lyudmila waziŵanga kuti nayu wangatombozgeka nge mo viliri ndi abali ndi azichi anyaki ku Russia. Iyu wangukamba kuti: “Ŵati ayamba kutombozga abali ndi azichi ku Moscow ndipuso mutawuni ya Taganrog, ndinguziŵa kuti pajumphengi nyengu cha, kutombozgeka uku kukwaskengi weyosi.”

Chifukwa cha marangu ngo ngakujalikiskika chifukwa cha mulili wa COVID-19, Akaboni anyaki alutaku cha kukhoti kuchivwisiya mulandu kweniso kuti akamuchiski. Pakukamba z amo vinthu viliri, Lyudmila wangukamba kuti: “Ndafipanga mtima ndipuso kusuzgika maŵanaŵanu kuti ndamuŵangaku ndija ku khoti, mwaviyo nyengu zosi asani ndiluta ku khoti ndayanjanga kumba sumu ndipuso kupemphera kwaku Yehova. Ndiwona kuti kuchita venivi kungundiwovya kuja ndi nthazi. Sonu ndifipa mtima cha asani nde mu khoti ndipu ndiwona nge nyengu yitenda mwaliŵi ukongwa.”

Lyudmila wangukamba so mo venivi vakwaskiya mulumu waki ndi ŵana ŵaki ŵaŵi wo Mbakaboni aku Yehova cha. Iyu wangukamba kuti: “Avwisa cha chifukwa cho atindimbiya mulandu. Yiwu afipa mtima ukongwa chifukwa awona mo ndisuzgikiya ndi matenda chifukwa cha mlandu uwu. Kweni mukuluta kwa nyengu, ŵanthu a mubanja langu akuwamu kuti ŵaraŵara a boma atindichitiya vinthu mwambura urunji ndipu vo achita vitindiwovya kuti ndikunthiyengepu.”

Chinanga kuti mzichi uyu watombozgeka kweni walutirizga mbwenu kuchita phamphu pakuteŵete Yehova. Iyu wangukamba kuti: “Ndikondwa mumtima chifukwa ndiwona kuti palivi chifukwa chakuchitiya mantha ndi vo vichitika pamwenga vo vichitikengi kunthazi mwakukoliyana ndi mauchimi nga mu Bayibolu. Ubwezi wangu ndi Yehova ngwakukho ukongwa. Pasonu panu, mapempheru ngangu ngakuvwika umampha, ngatali ndipuso ngakutuliya pasi pa mtima.”

Tiziŵa kuti Mzichi Ponomarenko walutirizgengi kulonde mzimu wakupaturika waku Yehova ndipuso vitumbiku chifukwa chakulutirizga kuja “mu mduzi wa Wanthazizosi.”—Salimo 91:1.