Pambula kuswera yapa, Khoti la Voroshilovskiy lo le Muchigaŵa cha Rostov-on-Don liperekengi cheruzgu chaki pa mulandu wa Mzichi Olga Ganusha. a Loya wa boma wechendakambi cheruzgu cho wakhumba kuti mzichi uyu wapaskiki.

Olga Ganusha

• Chaka cho Wakuwiya: 1961 (ku Rostov-on-Don, Muchigaŵa cha Rostov)

• Mo Wakukuliya: Wakuleka ntchitu ndipu we ndi mwana yumoza munthulumi. Watanja vakulukaluka, kuvwisiya sumu ndipuso kuŵerenga mabuku

• Wangwamba kusambira Bayibolu wati waziŵa vakukwaskana ndi chilindizga chakuzija mu paradayisu limoza ndi abali ŵaki kweniso mabwezi ngaki wo azamuyuskika. Wakubatizika kuja Kaboni waku Yehova mu 1995

Chakukwambiriya kwa chaka cha 2019, arara a boma anguŵika mwachisisi kachipangizu kakujambuliya mazu kweniso vidiyo mu nyumba ya Mzichi Olga Ganusha. Mu June 2019, a boma angugwiriskiya ntchitu vo angujambula nge ukaboni kuti afufuzi munyumba ya mzichi uyu. Yiwu anguto so manotibuku, makalata ndipuso timabuku ta mzichi uyu kuti awonemu. Pa 17 August 2020, arara ŵenaŵa angukamba kuti Mzichi Olga we ndi mlandu, ndipu khoti lingwamba kuvwa mulandu wenuwu pa 4 March 2021. “Milandu” yaki yisazgapu kuchitisa kweniso kusanirika pa maunganu nga chisopa kweniso kukambiyaku anyaki vo wagomezga. Mzichi Lyudmila Ponomarenko ndi Galina Parkova, nawu aŵafufuzanga pa nyengu yeniyi, kweni pasonu weyosi atimufumba pakuyijapakuyija.

Kwa vyaka pafufupi viŵi vo mzichi Olga aja achimufufuza ndipuso kumumba mulandu, iyu wasaniya nthazi chifukwa chakupemphera kutuliya pasi pa mtima kweniso kukamba vinthu chayivu vo wakhumba kuti Yehova wamuwovyi. Olga wangukamba kuti: “Zuŵa lelosi ndipemphera kuti zina laku Chiuta litoweseki kuphara kali. Ndipemphere so abali ndi azichi wo ŵe mujeri kulindizgiya mulandu wawu ndipuso wo achita ukayidi wapanyumba kuti afiski kuchitiya ukaboni kweniso kuti aje ndi chiganga. Ndipu nditiŵapemphere kuti aje ndi chivwanu chakukho mwaku Yehova ndipuso kuti iyu wazakuŵajowo cha pa nyengu yakusuzga yeniyi.” Pakuŵanaŵaniya suzgu yo wenayu, Olga wangukamba so kuti: “Nditimupempha Yehova kuti wandiwovyi kuti ndileki kuchita mantha, ndimuthembengi ukongwa kweniso kuti wandiwovyi kuja chipilala cha chisulu ndi chimati cha mkuŵa, nge mo wanguchitiya ndi Yeremiya. Ndikhumba kuti ndifiski kukunthiyapu mayeseru ngosi ngakulilima nge mo anyamata atatu a Chiheberi anguchitiya. Ndipu ndigomezga kuti nyengu zosi ndilongongi nkharu yamampha nge mo Khristu wanguchitiya ndi arwani ŵaki.”

Tigomezga kuti Yehova walutirizgengi kumuwovya Olga ndipuso abali ndi azichi anyaki wo atombozgeka chifukwa cha chivwanu chawu, ‘ndi janja laki lamaryi la urunji.’—Yesaya 41:10.