Pa 11 June  2024, Mzichi Olga Ivanova wakutuzgika mujeri ku Russia Mutawuni ya Zelenokumsk. Pa 25 October  2021 khoti lingumuyeruzga kuti wakaje mujeri kwa vyaka vitatu ndi myezi 6. Chifukwa chakuti wanguja kali panyumba kwa chaka chimoza ndi myezi yinayi wachichita ukayidi wapanyumba, sonu mulandu waki wamala. Mulumu waki Yevgeniy, wanguyeruzgika zuŵa lenilo angwambiya kumumba mulandu, mwakuti iyu we kujeri pasonu panu ndipu akumuyeruzga kuti wajengi mujeri kwa vyaka 8.

Pa nyengu yo wenga kujeri, Olga wakhumbikanga kugwira ntchitu yanthazi mazuŵa 6 pa sabata kwa maola 12. Iyu angumusamuyisa so mumajeri nganandi ku Russia. Venivi venga vakusuzga ukongwa kwa anyina aku Olga a Svetlana wo ndi choko kuti akamuwonengi kweniso kumuwovya Olga. Svetlana wangukamba mo Yehova wangumuwovye kuti: “Nyengu yeyosi yo Olga amusamusiyanga mutawuni yasonu abali ndi azichi amuwovyanga kusaniya vakukhumbika pa umoyu. Yiwu amanga pa muzeri kuti akamupaski chakurya ndi vinthu vinyaki vakukhumbikiya ndipu asani mphakuzomerezeka yiwu achitanga vosi vo angafiska kuti akamuwoni. Kusazgiyapu yapa, asani ndapepuka kuti nkhamuwoni nyengu zosi abali andipaskanga malu ngakuti nkhajepu ndipu andiwovyanga chechosi. Venga vakuziziswa ukongwa!”

Titimuwonga ukongwa Yehova chifukwa chakumuphwere Olga pa nyengu yo wenga mujeri. Po tikondwa ndikutuzgika kwaki, tilutirizga mbwenu kupemphere mulumu waki kweniso abali ŵidu wosi wo ŵeche mujeri ndipu tigomezga kuti Yehova walutirizgengi kuŵalongo chanju chambula kumala.—Genezesi 39:21.