Pa 4 February 2021, * khoti la Birobidzhan lo le muchigaŵa cha Jewish Autonomous liperekengi cheruzgu chaki pa mulandu wa Mzichi Svetlana Monis. Loya wa boma wechendakambi cheruzgu cho wakhumba kuti mzichi uyu wapaskiki.

Svetlana Monis

• Chaka cho Wakuwiya: 1977 (ku Lesozavodsk)

• Mo Wakukuliya: We ndi nthenda ya masu. Watanja kusambira vineneru. Wakusambira chineneru cha Chitchayinizi, Chingelezi ndi Chijeremani. Wakulera yija mwana waki munthulumi. Wakujula resitilanti yo wagulisamu vakurya va Chitchayinizi kuti waphweriyengi banja laki

  Chifukwa chakusuzgika maŵanaŵanu ndi vinthu vambula urunji vo vichitika pacharu, iyu wangwamba kusambira Bayibolu. Wakubatizika mu 2005. Mu 2015, wakutorana ndi mulumu waki Alam Aliyev, yo nayu atimumba so mulandu unyaki

Pa 26 Septembe 2019, Lieutenant D. Yankin, mura wa akufufuza limoza ndi gulu la apolisi a FSB (Federal Security Service) angwamba kumumba mulandu Mzichi Svetlana Monis. Khoti lingumukaniza kugwiriskiya ntchitu galimotu yaki kwa myezi pafufupi yiŵi, chinanga kuti wakhumbikanga galimotu kuti wawovyengi ambuyaki a vyaka 91.

Kufufuza kwakwamba kungumala mu December 2019. Pavuli paki, apolisi angulutisa milandu yaki ku Khoti la Birobidzhan.

Svetlana wachiŵanaŵaniya mo watombozgekiyanga, wangukamba kuti: “Mtima wangu wenga mumalu, pa nyengu yo arara a boma afufuzanga munyumba yangu. Yenga nyengu yeniyi, yo ndinguvwisa kakwamba mazu ngakuti: ‘Mbakukondwa wo atombozgeka chifukwa cha urunji ’”—Mateyu 5:10.

Ŵati afufuza, Alam yo ndi mulumu waku Svetlana nayu so angumumanga ndikumuŵika mujeri kwa mazuŵa 8. Svetlana wangukamba kuti: “Chinthu cho chenga chakusuzga ukongwa kwaku ini chenga kuleka kuŵanaŵaniya ukongwa va mulumu wangu. Ndamufipiyanga mtima chifukwa chakuti we ndi nthenda ya msana ndipu nthenda yeniyi yilutiyalutiya munthazi. Iyu wanguluta kuchipatala kuti akamuwovyi suzgu yeniyi. . . kwati kwaja sabata yimoza ŵechendafufuzi munyumba yidu. Ndengavi nthowa yakuti ndikambiskani ndi Alam, mwakuti venga vakusuzga kuziŵa asani weumampha. Ndingumukambiya Yehova mo ndavwiyanga, ndipu ndamukambiyanga chechosi cho chandifipiskanga mtima ndipu ndinguziŵa kuti iyu wangamuphwere umampha Alam.”

Svetlana wakayikiyanga cha kuti Yehova we nayu. Iyu wangukamba kuti: “Ndawonanga mo iyu wandiwovyiyanga. Ndinguvwisa kuti ndikhumbika cha kuchita mantha. . . . Ndayesesanga kuleka kuŵanaŵaniya vaku ndamweni. Mumalu mwaki, ndayesesanga kuŵanaŵaniya mo ndingalutirizgiya kuja wakugomezgeka kwaku Yehova.”

Kuti alutirizgi kuja ndi maŵanaŵanu ngakwenere, Svetlana ndi Alam alutirizga kuchita phamphu kuti akhoresi chivwanu chawu. “Zuŵa lelosi, ini ndi mulumu wangu tiŵerenge limoza Bayibolu ndipuso kukambiskana lemba la zuŵa ndi chaputala cha mu Bayibolu. Nyengu zosi tiŵanaŵaniya malemba ngo ngangatichiska kuti tithembengi ukongwa Yehova ndipuso kupembuzgika.” Lemba la chaka cha 2019 la Yesaya 41:10, lo likamba kuti: “Ungafipanga mtima cha, pakuti ndini Chiuta waku,” lisimikiziya Svetlana ndi Alam kuti Yehova watiŵayanja. Iyu wangukamba kuti: “Tingunozga kuti tipulinti mazu nga pa vesi lenili ndikulipangiya kaferemu”.

Kukunthiyapu kwaku Svetlana kwawovya achibali ŵaki wo Mbakaboni cha. Svetlana wangukamba kuti: “Ndipereka ukaboni wakukwana kwa ama ŵangu wo nyengu yinyaki andisuskanga. Ndipu sonu atitichitiya vinthu mwa ulemu kweniso alutirizga kutilongo lisungu ndipuso atitiwovya.” Svetlana wangukamba so kuti: “Agogu ŵangu wo ŵe ndi vyaka 91 ŵe muchisopa cha Orthodox ndipu nyengu zosi atitichitiya lisungu kweniso kutifipiya mtima. Yiwu angwamba kwanja kusambira Bayibolu.”

Tilutirizga kuŵanaŵaniya vakukwaskana ndi Svetlana ndipuso Alam. Tiziŵa kuti alutirizgengi kuja ndi maŵanaŵanu ngakwenere po Yehova walutirizga ‘kukhwimisa mitima yawu.’—Salimo 10:17.