JUNE 21, 2021
RUSSIA
Mzichi Tatyana Sholner Walutirizga Kuthemba Yehova Ndipuso Wakondwa Chinanga Kuti Atimumba Mulandu
UPDATE | Khoti ku Russia Likuyeruzga Kuti Mzichi Tatyana Sholner Wangapalamulanga Mulandu Wewosi Cha
Pa 25 June 2021, Khoti la Birobidzhan lo le Muchigaŵa cha Jewish Autonomous likumusaniya ndi mulandu Mzichi Tatyana Sholner ndipu likumuyeruzga kuti wangapalamulanga mulandu wewosi cha kwa vyaka viŵi ndi hafu. Iyu walutengi kujeri cha pa nyengu iyi.
Nyengu yo Khoti Liyeruzgiyengi Mulandu
Pambula kuswera yapa, Khoti la Birobidzhan lo le Muchigaŵa cha Jewish Autonomous liperekengi cheruzgu chaki pa mulandu wa Mzichi Tatyana Sholner. * Loya wa boma wakupempha khoti kuti liyeruzgi kuti mzichi uyu wakaje mujeri kwa vyaka vinayi.
Vakukwaskana ndi Munthu Uyu
Tatyana Sholner
Chaka cho Wakuwiya: 1993 (ku Birobidzhan)
Mo Wakukuliya: Awisi akutayika mwakuchitisa chitima iyu weche munamana ukongwa, vo vinguchitiska kuti iyu ndi mzichi waki alereki ndi anyinawu pe. Wagwira ntchitu ku malu ngo agulisiyaku munkhwala. Watanja kuchita masaza mu malu ngo mwe ayisi, kwendesa njinga ndipuso kutchaya volleyball
Wangwamba kwanja Bayibolu pa nyengu yo wasambiranga kusona pa sukulu yinyaki. Wakondwanga ndi mo mwana munyaki wasukulu yo wenga Kaboni waku Yehova wachitiyanga vinthu. Ndipu msiŵani waki wa vyaka 12 wati watayika mu 2014, iyu wangupembuzgika ukongwa ndi chilindizga chakuti kwe chiyuka. Wakubatizika mu 2017
Vo Vinguchitika Kuti Wambiki Mulandu
Pa 6 February 2020, arara a boma ku Birobidzhan angujuliya mulandu azichi 6 kusazgapu Tatyana wa vyaka 27. Iyu limoza ndi anyaki atiŵamba mulandu wakuti achita vinthu “vakofya” chifukwa chakuchita vinthu mwakukoliyana ndi vo agomezga. Akaboni aku Yehova wo aja Muchigaŵa cha Jewish Autonomous akuŵajuliya milandu yakukwana 19.
Tatyana we ndi chigomezgu chakuti Yehova wamuwovyengi kukunthiyapu kutombozgeka kwenuku. Iyu wangukamba kuti: “Tati tayamba waka kutombozgeka, ndafiskanga cha kusopa Yehova nge mo ndachitiyanga kali, kweni ndingulekapu cha kuŵerenga Bayibolu. Ndingumukambiya Yehova mo ndavwiyanga ndipuso vo vandifipiskanga mtima. Ndapempheranga kuti Yehova wandipaski mzimu wakupaturika kuti ndikunthiyepu chechosi kweniso kuti ndije wakugomezgeka kwaku iyu mpaka pa kumaliya. Ndapempheranga kuti ndije ndi chiganga ndipuso zeru kuti ndivikiliyi mwachiganga zina laku Chiuta mu khoti.”
Iyu wangukamba so kuti: “Kuziŵa kuti nyengu zosi Yehova watovya ndipuso wavikiliya ateŵeti ŵaki, kwandiwovya ukongwa kuti ndilutirizgi kuja wakukondwa. Yehova wandiko ndi janja laki lamaryi. Venivi vitindiwovya kuti ndimugomezgengi ukongwa ndipuso kuti ndilutirizgi kuja wakufwasa chinanga kuti nditombozgeka.”—Yesaya 41:10.
Po tilindizga kuti khoti lipereki cheruzgu, tigomezga kuti ndi chovyu chaku Yehova Tatyana walutirizgengi ‘kukunthiyapu masuzgu.’—Aroma 12:12.
^ Ndi nyengu zosi cha po akambiya limu nyengy yo khoti liperekiyengi cheruzgu.