Pambula kuswera yapa, Khoti la Nadezhdinskiy lo le muchigaŵa cha Primorye liperekengi cheruzgu chaki pa mulandu wa Mzichi Lyudmila Shut. a Loya wa boma wakupempha kuti mzichi uyu amuyeruzgi kuti wangapalamulanga mulandu wewosi cha kwa vyaka vinayi.

Lyudmila Shut

• Chaka cho Wakuwiya: 1947 (Ku Makarov, pa chirwa cha Sakhalin)

• Mo Wakukuliya: Wangwamba kusambira Bayibolu ndi Akaboni aku Yehova cha mu ma 2000. Wangukhorwa ndi mauchimi nga mu Bayibolu. Wakubatizika mu 2003 ndipu mu chaka chenichi ndimu mulumu waki wakutayikiya. Wendi ŵana atatu ndi azuku atatu. Iyu wasuzgika kwenda chifukwa chakutamatama

Mu November 2017, arara a boma angwamba kuŵenda Akaboni aku Yehova mu muzi wa Razdolnoye. Mu February 2020 Mzichi Lyudmila Shut angumujuliya mulandu. Chinanga kuti ngwakukota ndipuso wangachita cha vinthu vinyaki chifukwa chakutama, yiwu akumukaniza kuti wangatuwangamu cha mucharu chaki kuluta kucharu chinyaki.

Chifukwa chakuti Lyudmila atimufufuza kweniso atimumba mulandu, venivi vachitiska kuti watamengitamengi ndipu nyengu zinyaki wasuzgika maŵanaŵanu. Suzgu laki lakuleka kuwona umampha lafika paheni ukongwa mwakuti wakhumbika kupangika opaleshoni ya masu ndipu pasonu panu watama matenda ngakusoŵa tulu. Lyudmila watimuthemba ukongwa Yehova ndipu waziŵa kuti ndiyu watimuvikiriya. Nge mo wakulayizgiya pa Salimo 26:3, Yehova walutirizga kumupaska “chimangu chambula kumala.”

Abali ndi azichi mumpingu atimuyanja ndipuso kumuwovya Lyudmila. Iyu watiŵawonga ukongwa abali ndi azichi chifukwa atimupemphere. Lyudmila wangukamba kuti: “Wazakuviluwapu cha venivi.”

Chinanga kuti mwana waki munthulumi ndi mwana waki munthukazi mbakaboni aku Yehova cha, nawu so atimuwovya munyengu yakusuzga yeniyi.

Po walindizga kuti khoti lipereki cheruzgu, tipemphera ndi chigomezgu kuti Mzichi Shut walutirizgengi “kuthemba nthazi zaku Chiuta.”—2 Timote 1:8.