Pa 29 September 2020, * khoti la mutawuni ya Pervorechensky lo le muchigaŵa cha Vladivostok lazamuyeruzga mulandu wa Mzichi Yelena Barmakina. Mzichi uyu wangayeruzgika kuti wangapalamulanga mulandu wewosi cha kwa vyaka vitatu. Po Mzichi Barmakina walindizga kuti mulandu waki uyeruzgiki, mulumu waki Dmitriy wambika so mulandu unyaki.

Yelena Barmakina

• Chaka cho wakuwiya: 1967 (Ku Cherepanovo Muchigaŵa cha Novosibirsk

• Mo wakukuliya: Waphwere apapi ŵaki akukota ndipuso ambuyaki. Watanja vakujambulajambula. Watanja so kusambira mumaji kweniso kwenda kuchiwona malu

• Wati wayamba kusambira Bayibolu ndi Akaboni aku Yehova, wangukwaskika kuziŵa kuti kufiskika kwa mauchimi kulongo kuti Chiuta we ndi nthazi ukongwa. Wangwamba kuja ndi chivwanu wati wawona mo Yehova wangumukiya mapempheru ngaki. Wangutolana ndi Dmitriy, mu 2003

Pa 28 July 2018 nyengu ya 7:00 mulenji, gulu la apolisi wo angupinga futi ndipuso wo anguvwala vakubisa kumasu angupwanya nyumba ya ambuyaki a Mzichi Yelena Barmakina a vyaka 90. Panyengu iyi Mzichi Barmakina ndi mulumu waki Dmitriy, ajanga kunyumba kwa ambuyawu ndipu ndiwu aŵaphweriyanga. Mubali Barmakin wangumangika ndipu angumuŵika mujeri. Apolisi yaŵa anguwofyeza Mzichi Barmakina, ndipu angumukambiya kuti: “Kwaja yiwi sonu!”

Pati pajumpha chaka, arara aboma angukaniza Mzichi Barmakina kuti wangatongaku ndalama cha ku banki. Pa 6 August 2019, akufufuza angwamba kumba mulandu Mzichi Barmakina wakuti wapemphera, kuŵerenga Bayibolu ndipuso kuwonere nkhani za mu Bayibolu. Loya waki wangupempha khoti kuti limiki mulandu uwu chifukwa kupemphera kweniso kuŵerenga Bayibolu ndi vinthu vo ŵanthu a mu visopa vakupambanapambana achita. Kweni, wakweruzga wangukoliyana ndi vo loya wakumiya boma wangukamba kuti Mzichi Barmakina “wachita vinthu vakofya” vo visuskana ndi dangu la ku Russia.

Mzichi Barmakina wafipa mtima ukongwa ndi mlandu wenuwu. Iyu wangusiyana ndi mulumu waki kwa mazuŵa 447 kutuliya pa nyengu yo mulumu waki angumuŵika mujeri. Vakusuzga so kuti Mzichi Barmakina wasaniyi ntchitu, chifukwa wakhumbika kuchisanirika kukhoti asani amudana kuti akamufumbi mafumbu.

Mwakukoliyana ndi vo tisambira mu Bayibolu, tizizwa cha ndi vo arara aboma ku Russia achita “pakukhwimisa vinthu” kuti abali ndi azichi ŵidu aleki kuja akugomezgeka. Kweni tipembuzgika kuziŵa kuti Yehova walutirizgengi kuja ‘malu ngawu ngakuthaŵiyaku kweniso nthazi zawu.’—Salimo 118:13, 14.