Pa 29 January 2021, * khoti la Birobidzhan lo le mu chigaŵa cha Jewish Autonomous liyeruzgengi mulandu wa Mzichi Yelena Reyno-Chernyshova. Loya wakumiya boma wechendakambi cheruzgu cho wakhumba kuti Mzichi uyu walonde.

Yelena Reyno-Chernyshova

• Chaka cho Wakuwiya: 1968 (Ku Maloy, mu chigaŵa cha Irkutsk)

• Mo Wakukuliya: Wangwamba kusambira Bayibolu ndi Akaboni aku Yehova cha mu ma 1990. Venivi vingumuchitiska kuti waleki usilikali ndipu wanguyesesa kuti banja laki liyendengi umampha. Wakubatizika mu 1998

• Chinanga kuti mulumu waki ndi Kaboni waku Yehova cha, kweni watimukaniza cha kuteŵete Yehova. Iyu watanja kutchaya bola ndipuso volleyball

Pa 29 September 2019, arara a boma ku Birobidzhan angumumba mulandu Mzichi Yelena Reyno-Chernyshova.

Apolisi wo adanika kuti Federal Security Service (FSB) angufufuza nyumba yaku Yelena. Iyu wangukamba kuti Yehova wangumuwovya kuja wakuzikira pa nyengu iyi. Iyu wanguti: “Ndapempheranga kwaku Yehova kuti wandiwovyi kuja wakuzikira ndipuso wachiganga kuti ndifiski kukunthiyapu kweniso kuti ndilutirizgi kuja wakugomezgeka. Wo anguza kuzifufuza anguchita vinthu mwaulemu ukongwa.”

Yelena ndi banja laki angutimbanyizgika ukongwa ndi chiyesu chenichi. Mulumu waki wangutama nthenda ya mtima, ulendu wachitatu mu July 2020. Arara a boma akumukaniza Yelena kuti wangatuwanga cha mu charu cha Birobidzhan. Ndipu ma akawunti ngaki ngosi ngaku banki akumujaliya.

Yelena wachiskika ukongwa asani waŵanaŵaniya mo ateŵeti anyaki aku Yehova wo nawu angumanapu ndi chiyesu nge ichi angufiskiya kukunthiyapu. Iyu wangukamba kuti: “Nditanja kuŵerenga nkhani zakukwaskana ndi abali ndi azichi wo nyumba zawu zikufufuzika ndipuso wo angutombozgeka chifukwa cha chivwanu chawu mwaku Yehova. Yiwu akumana ndi masuzgu nganandi ndipuso atiŵachitiya vinthu vankhaza kweni alutirizga kukunthiyapu mwachiganga.” Kuŵerenga Bayibolu nyengu zosi ndipuso kuŵanaŵaniya pa vo wasambira ndiku kutimuwovya ukongwa.

Po walutilizga kukunthiyapu, Yelena watanja kuŵanaŵaniya lemba la Yesaya 30:15, lo likamba kuti: “Mwazamusaniya nthazi chifukwa chakuja mwakufwasa kweniso kundithemba.” Iyu wangukamba kuti: “Nyengu zosi nditanja kuŵanaŵaniya vesi lenili. Nditimuwonga ukongwa Yehova chifukwa wakundiguziya kwaku iyu! . . . Nyengu zosi ndija ndichimangu chamumtima. Nditimugomezga ukongwa Yehova ndipu nditimuthemba pa chechosi. Ndisimikiza kuti wandijowongepu cha.”