Pambula kuswera yapa, khoti la Pervomayskiy lo le muchigaŵa cha Kirov liperekengi cheruzgu chaki pa mulandu wa Mubali Maksim Khalturin, Vladimir Korobeynikov, Andrzej Oniszczuk, Andrey Suvorkov, Yevgeniy Suvorkov, ndi Vladimir Vasilyev. a

Mubali Yuriy Geraskov yo nayu wenga pa gulu la abali ŵenaŵa, wakutayika khoti lechendapereki cheruzgu chaki.

Yuriy Geraskov

• Chaka cho Wanguwiya: 1956 (Ku Azerbaijan)

• Wakutayika: Pa 24 April, 2020

• Mo Wangukuliya: Wayanjanga kutchaya bola la malundi kweniso kujambula vithuzi. Wagwiranga ntchitu ya kumba vidya vakumbiya sumu. Wangusamiya ku Russia mu 1993 chifukwa cha mo vinthu venge ku Azerbaijan pa nkhani za ndali. Wangutolana ndi Alevtina mu 2011, ndipu wangubatizika kuja Kaboni waku Yehova mu chaka chenichi. Banja ili layanjanga kuchitembeya ndipuso kuchiwona mabwezi ngawu

Maksim Khalturin

• Chaka cho Wakuwiya: 1974 (Kirov)

• Mo Wakukuliya: Weche mwana wayanjanga kuŵerenga. Wangwamba kwanja kuŵerenga Bayibolu mu chaka cha 1993. Wangubatizika kuja Kaboni waku Yehova mu 1995. Waphwere apapi ŵaki akukota. Chinanga kuti apapi ŵaki ŵe muchisopa chinyaki kweni atumbika vo iyu wagomezga

Vladimir Korobeynikov

• Chaka cho Wakuwiya: 1952 (Pa Chirwa cha Dikson, muchigaŵa cha Krasnoyarsk)

• Mo Wakukuliya: Awisi ŵenga kaswiri wakuwona va nyanja ya arctic. Weche mwana, Vladimir wayanjanga kupanga tinthu takupambanapambana. Wagwiranga ntchitu ya upulambala ndipuso ya umakanika. Sonu wakuleka ntchitu yaki, ndipu watanja ulovi.

  Iyu ndi muwolu waki Olga, angwamba kusambira Bayibolu ndi Akaboni ndi Akaboni aku Yehova cha mu ma 1990. Angukhorwa ndi mauchimi nga mu Bayibolu. Wakubatizika mu 1996. Fundu za mu Bayibolu zinguwovya banja lawu kuti lije lakukho, kusazgapu mwana wawu munthulumi ndi munthukazi

Andrzej Oniszczuk

• Chaka cho Wakuwiya: 1968 (Ku Białystok, Poland)

• Mo Wakukuliya: Weche wachinyamata wayanjanga kutchaya bola la malundi kweniso kunyamuwa maweti. Wakubatizika mu 1990. Wakusamiya ku Kirov mu 1997. Watanja kuŵerenga mabuku nga muchineneru cha ku Russia. Wakutolana ndi Anna mu 2002. Yiwu atanja kuchitembeya, kuchipenja wowa ndipuso kutchaya bola la malundi

Andrey Suvorkov

• Chaka cho Wakuwiya: 1993 (Ku Kirov, muchigaŵa cha Kirov)

• Mo Wakukuliya: Anyina ndiwu akumusambiza uneneska weche bonda. Weche mwana wayanjanga kusambira va sayansi ndipuso kuchita masaza, ukongwa kuseŵe volleyball. Wakubatizika kuja Kaboni waku Yehova mu 2007. Wagwiranga ntchitu kumalu ko agulisiya munkhwala wakutimbanyizga wongu mumalu mwakuchisere usilikali. Wakutolana ndi Svetlana mu 2016. Wosi atanja kuchita masaza

Yevgeniy Suvorkov

• Chaka cho Wakuwiya: 1978 (Ku Kumyony, muchigaŵa cha Kirov)

• Mo Wakukuliya: Weche mwana wayanjanga kuseŵe chess ndi hockey kweniso kuvwisiya sumu. Wagwiranga ntchitu ya va magesi. Wangwamba kusambira Bayibolu ndi Akaboni aku Yehova we ndi vyaka 16 ndipu wakubatizika mu 1995. Panyengu yo wenga ndi vyaka 18 wangupempha kuti wayambi ntchitu yinyaki mumalu mwakusere usilikali. Mukuluta kwanyengu angumuzomereza kuti wagwirengi ntchitu zinyaki ŵati amumba mulandu kwa maulendu 6 chifukwa cha kukana kusere usilikali. Wakutolana ndi Svetlana mu 2000 ndipu ŵe ndi mwana wawu Andrey (yo wazumbulika pachanya)

Vladimir Vasilyev

• Chaka cho Wakuwiya: 1956 (Ku Perm)

• Mo Wakukuliya: Weche mwana wayanjanga kutchaya bola la malundi. Wagwiranga ntchitu ya upulambala kweniso ya kwendesa galimotu. Pasonu panu wakuleka ntchitu. Iyu ndi muwolu waki Nadezhda, angwamba kusambira Bayibolu ndi Akaboni aku Yehova cha mu ma 1990. Wakubatizika mu 1994

Pa 9 October 2018, arara a boma anguchifufuza munyumba 14 za Akaboni aku Yehova ku Kirov. Pavuli paki, Mubali Maksim Khalturin, Vladimir Korobeynikov, Andrzej Oniszczuk, Andrey Suvorkov, ndi Yevgeniy Suvorkov angumangika. Yiwu anguŵaŵika mukachipinda kamujeri kulindizgiya mulandu wawu. Mu mwezi wa January ndi July 2019, Mubali Vladimir Vasilyev ndi Yuriy Geraskov nawu so anguŵamba mulandu.

Vladimir Korobeynikov angumujaliya mujeri kwa myezi yakujumpha yiŵi. Angumutuzga mujeri ndi kumukambiya kuti wakachitengi ukayidi wa panyumba ndi chilatu chakuti wakaphweriyengi muwolu waki yo watamanga kweniso mwana waki munthukazi. Mubali Maksim ndi Andrey anguŵajaliya mujeri kwa myezi yakujumpha yitatu kulindizgiya mulandu wawu. Yevgeniy angumujaliya mujeri kwa myezi pafufupi yinkhondi. Andrzej angumujaliya mujeri kwa mazuŵa 327 kulindiziya mulandu waki. Anyaki mwa abali ŵenaŵa anguŵatuzga mujeri ndikuŵakambiya kuti akachitengi ukayidi wa panyumba. Chinanga kuti akuŵatuzga mujeri kweni akuŵakaniza kutuwa mucharu chawu kuluta kucharu chinyaki.

Panyengu yo ŵenga mujeri, venga vakusuzga kwa abali yaŵa kulekana ndi mabanja ngawu. Kweni agomezganga Yehova kuti waphweriyengi akwanjiwa ŵawu.

Mwakuyeruzgiyapu, muwolu waku Vladimir Korobeynikov zina laki Olga, ngwakupunduka. Mubali uyu wangukamba kuti: “Chinthu chakusuzga ukongwa chenga chakuti ndingumuleka yija muwolu wangu yo wengavi munthu wakumuwovya.” Iyu wangukamba so kuti apolisi angulonda foni ya muwolu waki panyengu yo afufuzanga. Venivi vamufipiskanga mtima Vladimir mpaka po wanguzilonde kalata kutuliya kwa mzichi munyaki wa mumpingu wawu yakumusimikiziya kuti abali ndi azichi atimuphwere muwolu waki. Pavuli paki wangulonde kalata kutuliya ku muwolu waki Olga yo wangumukambiya kuti weumampha.

Umoyu waja wakusuzga ukongwa kwa abali yaŵa chifukwa angatuwa cha muchigaŵa chawu kweniso atiŵakamba kuti achita “vinthu vakofya.” Mwakuyeruzgiyapu, vakusuzga kuti abali yaŵa asaniyi ntchitu yakuthembeka. Kusazgiyapu yapa, angato cha ndalama zawu zo ze ku banki.

Kweni Yevgeniy wangukamba kuti: “Yehova watitipaska vinthu vosi vo tikhumbikiya. Mwakuyanana ndi Ayisirayeli muchipululu, tisoŵa chechosi cha. Tiwona mo ŵanthu aku Yehova awovyiyana mwakuliŵavu, mo apembuzgiyana kweniso mo awovyiyana kuti weyosi walutirizgi kuteŵete Yehova.”

Abali yaŵa angukamba kuti pempheru, kuchita sambiru la pakuŵija ndipuso kuŵerenga Bayibolu kunguŵawovya kuti alutirizgi kuja akugomezgeka ndipuso achiganga. Mwakuyeruzgiyapu, Vladimir Vasilyev wangukamba kuti: “Vakuchitika vo ve mu Bayibolu vititiwovya kuvwisa kuti Yehova ndiyu walongozga vinthu vosi. Mwaviyo, chivwanu chidu kwaku Chiuta ntchakukho ndipu kukamba uneneska tilutirizga kumuthemba.”

Chinanga kuti chiyesu chenichi chachitiska kuti abali ŵidu ndipuso mabanja ngawu akumani ndi masuzgu pa umoyu wawu, kweni tiziŵa kuti alutirizgengi kuthemba Yehova. Yiwu alutirizga kukunthiyapu chifukwa aziŵa kuti “munthu” wangachitiska kuti asuzgiki kwa nyengu yitali cha.—Salimo 56:4.