SEPTEMBER 14, 2023
RUSSIA

Pempheru Linguwovya Azichi Atatu

JULANI

Khoti la Zeya lo le muchigaŵa cha Amur, pambula kuswera yapa liperekengi chigamulu chaki pa mulandu wa Mzichi Margarita Moiseyenko, Galina Yatsik, ndipuso Mzichi Yelena Yatsyk. Wakumiya boma pa milandu wechendakambi cheruzgu cho wakhumba kuti ŵanthu yaŵa alonde.

Vakukwaskana ndi Ŵanthu Yaŵa

Margarita Moiseyenko

Chaka cho Wakuwiya: 1978 (Krasnoyarsk, Krasnoyarsk Territory)

Mo Wakukuliya: Wagwira ntchitu yakusona vakuvwala. Wakutorana ndi Konstantin mu 1998. Pa 14 July 2021, Konstantin angumusaniya ndi mulandu ndipu akumukambiya kuti wangapalamulanga so mulandu wewosi cha kwa vyaka 6

Margarita wangwamba kusambira Bayibolu we ndi vyaka 18, pa nyengu iyu ndipu munthu munyaki wa mubanja laki watayika waka. Wangubatizika kuja Kaboni waku Yehova mu 2001

Vo Wangumuka Wati Wafumbika

Kumbi ndi vinthu wuli vo vakuwovyani kuti mulutirizgi kukunthiyapu?

Ndikumbuka lemba la Nthanthi 21:31 lo lingukonkhoskeka umampha ukongwa, pa unganu wachigaŵa wa 2018 wa mutu wakuti ‘Jani ndi Chiganga’! Vesi lenili likamba kuti: “Hachi atiyinozgekerese zuŵa la nkhondu, kweni utaski utuliya kwaku Yehova.” Mwakawi, mahachi ngaswera cha kuchita mantha. Mwaviyo kuti ngakaleki kuchita mantha ku nkhondu, ngakhumbika ‘kunganozgekerese’ limu pamwenga kuti ‘kungasambiza.’ Ndimu so viliri ndi isi. Mwakawi, tosi tichita kusambira kuja ndi chiganga kweniso chivwanu. Mwaviyo nasi tikhumbika kujinozgekeresa mwakuja ndi mijalidu yeniyi. Kuti ndichiti venivi, ndiziŵa kuti ndikhumbika kujiliska ndamweni mwauzimu, mwa kusambira fundu za ndimba za mu Bayibolu kweniso kupemphera. Ndipu mwemosi mo vinthu vingaŵiya, chivwanu changu chidewezekengepu cha.

Galina Yatsik a

Chaka cho Wakuwiya: 1950 (Zeya)

Mo Wakukuliya: Wagwiranga ntchitu yakuwona mo makampani nga ntchitu zakuzenga ngagwiriskiya ntchitu ndalama zawu kweniso katundu. Pasonu panu wakupumuwa pa ntchitu

Wangutorana ndi Valeriy mu 1971. Ŵenga ndi ŵana ŵaŵi, mnyamata ndi msungwana. Mulumu waki wakutayika mu 1995

Wagomezganga kuti Chiuta kulivi kweni wajifumbanga kuti umoyu ukwamba wuli. Wangwamba kuŵerenga magazini nga Chigongwi cha Mlinda kweniso Jani Masu! Ndipuso wangwamba kusanirika pa maunganu nga mpingu. Wangusaniya maukaboni ngakuvwika umampha ngo ngalongo kuti kwe Mlengi. Iyu wangubatizika kuja Kaboni waku Yehova mu 1994

Vo Wangumuka Wati Wafumbika

Kumbi mwasambiranji vakukwaskana ndi kukhumbika kwa pempheru pa nyengu ya masuzgu?

Ndasambira kuti kupereka pempheru lifupi pa vakuchitika vamabuchibuchi nkhwakukhumbika ukongwa. Venivi vitindiwovya ukongwa kujalikiska mtima pasi kweniso kumuka umampha. Vakukondwesa so ukongwa kuziŵa kuti abali ndi azichi atindipemphere. Lemba la Yakobe 5:16 likamba kuti: “Pempheru lakuŵeyere la munthu murunji ligwira ntchitu mwanthazi ukongwa.” Ndinguziŵa kuti mapempheru ngo abali ndi azichi apereka ngatindiwovya kuja ndi chimangu cha mu mtima kweniso kuti ndileki kuchita mantha. Kukamba uneneska, mapempheru ngangu kweniso nga ŵanthu anyaki ngenge vakuvwala vo ŵanthu avwala kuti ataskiki asani abira, vo vichitiska kuti ayanjamengi waka ndipu nani ndija nge ndiyanjama.

Yelena Yatsyk b

Chaka cho Wakuwiya: 1972 (Zeya)

Mo Wakukuliya: Wagwira ntchitu ya kusona vakuvwala

Wakutorana ndi Andrey mu 1994. Ŵe ndi mwana yumoza msungwana

Anyina aku Yelena kweniso mzichi waki mumana zina laki, Yevgeniy Bitusov, ndiwu angwamba kusambira Bayibolu ndi Akaboni aku Yehova. Yelena wanguwona kukhumbika kwa marangu nga mu Bayibolu kweniso mo kugwiriskiya fundu zaki kungumuwovye pa umoyu waki. Iyu wangubatizika kuja Kaboni waku Yehova mu 1997

Vo Wangumuka Wati Wafumbika

Kumbi kutombozgeka kwakukwaskani wuli?

Ubwezi wangu ndi Chiuta wakho ukongwa. Ndipemphera kwaku Yehova kuti wandiwovyi kuja wakuzika ndipu ndiwona mo wamukiya mapempheru ngangu mwakundipaska chimangu cha mu mtima. Kusazgiyapu yapa ndayamba kuŵayanja ukongwa abali ndi azichi. Ndichiskika ukongwa kuziŵa kuti yiwu mbakunozgeka kundiwovya. Kukamba uneneska, ndikondwa ukongwa kuja mubanja laku Yehova. Ndasambira so kukhumbika kwakupemphere wosi wo ŵe mujeri nge mzichi wangu Yevgeniy. Nditiŵapemphere zuŵa lelosi.

Vo azichi ŵidu yawa akumana navu vititikumbusa kuti Yehova watuvwa mapempheru ngidu, ndipu watiwovyengi kuja ndi mijalidu yo tikhumbikiya kuti tikunthiyengepu mayeseru.—1 Yohane 5:14

Nyengu yo Vinguchitikiya

21 March 2019

Angufufuza mu nyumba yaku Moiseyenko
13 October 2020

Angufufuza munyumba yaku Yelena ndi Galina
22 November 2021

Anguŵajuliya mulandu
15 February 2022

Wosi anguŵakaniza kutuwa mucharu chawu
24 April 2023

Angwamba kuŵamba mulandu

a b Mzichi Galina Yatsik ndi Yelena Yatsyk mphachibali cha.

NKHANI