Pambula kuswera yapa, Khoti la Pavlovskiy lo le Muchigaŵa cha Nizhny Novgorod, liperekengi cheruzgu chaki pa mulandu wa abali atatu, Mubali Aleksey Oreshkov, Aleksandr Rakovskiy, ndi Aleksandr Vavilov. * Loya wa boma wechendakambi cheruzgu cho wakhumba kuti abali yaŵa apaskiki.

Aleksey Oreshkov

• Chaka cho Wakuwiya: 1971 (ku Pavlovo, Muchigaŵa cha Nizhny Novgorod)

• Mo Wakukuliya: Weche mwana wayanjanga kutchaya tenesi. Wakumaliza masambiru ngaki pa koleji yinyaki yo yisambiza kumba sumu ndipu wangwamba kumba mwakugwiriskiya ntchitu vitoliru. Pasonu panu wakuleka. Waja wachiphwere anyina kwa vyaka vinandi. Wakubatizika mu 2011 kuja Kaboni waku Yehova

Aleksandr Rakovskiy

• Chaka cho Wakuwiya: 1980 (ku Pavlovo, Muchigaŵa cha Nizhny Novgorod)

• Mo Wakukuliya: Wangusambira kumba gitala weche munamana, ndipu wambanga limoza ndi gulu linyaki. Iyu ndi kaswiri pa vinthu vakukwaskana ndi intaneti. Wakutorana ndi Tatyana mu 2005. Yiwu angwamba kusambira Bayibolu ndi Akaboni aku Yehova, ŵati aziŵa vo Bayibolu likamba vakukwaskana ndi chilindizga cha munthazi. Akubatizika mu 2009. Yiwu ŵe ndi mwana munthulumi ndipuso munthukazi

Aleksandr Vavilov

• Chaka cho Wakuwiya: 1967 (ku Kropotkin, Muchigaŵa cha Krasnodar)

• Mo Wakukuliya: Weche munamana, wayanjanga kutchimbiya, kusambira mumaji, kuchita masaza mu ayisi ndipuso kusheda vithuzi. Wakugwirapu ntchitu ya usilikali. Wenga kaswiri wakuchita masaza nga ndewu. Pati pajumpha nyengu, wanguleka kuchita masaza nga ndewu ndipu wangwamba kugwira ntchitu ya kusenga ŵanthu sisi. Iyu ndi muwolu waki Yelena, angwamba kusambira Bayibolu ndi Akaboni ndi Yehova. Yiwu akutorana mu 1994 ndipu akubatizika mu 1995. Yiwu atanja kuchitembeya

Pa 16 ndi 17 July 2019, gulu la apolisi la FSB (Federal Security Service) lingufufuza nyumba za Akaboni aku Yehova Muchigaŵa cha Nizhny Novgorod. Venivi vinguchitiska kuti Aleksey Oreshkov ndi Aleksandr Vavilov afumbiki mafumbu ndipu anguŵikika mujeri kulindizgiya mulandu wawu. Aleksey wanguja mujeri kwa mazuŵa 211 ndipuso mazuŵa 31 pa ukayidi wa pa nyumba. Yapa tingakamba waka kuti, Aleksandr waja mujeri kwa mazuŵa 241.

Po wenga mujeri, Aleksey wapempheranga kananandi waka mwakutuliya pasi pamtima kuphara kali. Zuŵa lelosi asani kwacha, wapempheranga kuti Yehova wamuwovyi kungawona mwakwenere masuzgu nga pa zuŵa lo ndipuso kuti walutirizgi kuja wakugomezgeka kweniso kulutirizga kuŵanaŵaniya vakukwaskana ndi Yehova ndi Mazu ngaki. Kusazgiyapu yapa, iyu wangukamba kuti: “Zuŵa lichimala, mapempheru ngangu ngajanga ngatali ndipuso ngakutuliya pasi pamtima ndipu ndayesesanga kuzumbuwa mazina nga abali ndi azichi. Ndapempheriyanga arara a jeri, akayidi anyangu, wakufufuza mulandu, banja langu, abali ndi azichi mu mpingo ndipuso gulu lidu.”

Aleksandr Vavilov wangukamba kuti: “Yehova we nani pafupi ukongwa. Nditijivwa kuti watindiwovya ndipuso watindipembuzga nge mo mliska wachitiya ndi kamwana ka mbereri. Zuŵa lelosi ndichita kuwone limu kuti watindiphwere ukongwa.”

Pa 21 September 2020, Aleksandr Rakovskiy nayu angumusaniya ndi mulandu wakuyanana ndi Mubali Oreshkov ndi Mubali Vavilov. Abali wosi atatu ambika mulandu chifukwa chakuchita maunganu nga Akaboni aku Yehova. Yiwu atiŵazomereza cha kutuwa mucharu chawu kuluta kucharu chinyaki.

Aleksandr Rakovskiy wawona kuti kuŵanaŵaniya ukongwa mauchimi nga mu Bayibolu, ukongwa uchimi wakukwaskana ndi fumu ya kunkhondi, kutimuwovya kuti wakunthiyepu. Iyu wangukamba kuti: “Vitindiwovya kuti ndiŵanaŵaniyeningi ukongwa mauchimi ngo ngakamba vakukwaskana ndi kutombozgeka ndipuso mo ngafiskikiya, mumalu mwa kuŵanaŵaniya ukongwa vo vitindifipiska mtima. Kweniso vitindiwovya kuti ndiŵanaŵaniyengi ukongwa malayizgu ngaku Yehova kuti ngatiwovyi asani titombozgeka.”

Tigomezga kuti abali atatu ŵenaŵa alutirizgengi kuja ndi maŵanaŵanu ngakwenere po chivwanu chawu chanthazi chitiŵawovya kukunthiyapu mayeseru.—Afilipi 1:29.