Pa 1 April 2021, ku Moscow kunguchitika unganu wa atolankhani wakukumbukiya kuti pajumpha vyaka 70 kutuliya po Operation North yikumaliya. Mazu ngakuti Operation North ngangwamba mu 1951. Pa nyengu iyi Akaboni aku Yehova pafufupi 10,000 kutuliya mu vyaru 6 vo kali vawusikanga ndi ufumu wa Soviet, angutumizika ku ukapolu ku Siberia. Ŵanthu 6 wo angumiya unganu uwu kusazgapu akaswiri kweniso wo awona va wanangwa wa ŵanthu, amukanga mafumbu ngo atolankhani afumbanga. Ŵanthu 6 ŵenaŵa angukonkhoska mo Operation North yingwambiya kweniso vo vichitikiya Akaboni aku Yehova ku Russia pasonu panu. Unganu wosi wenuwu unguwoneseka pa Intaneti.

Yaroslav Sivulsky, yo wamiya Akaboni aku Yehova ku Europe, kweniso yo ŵanthu a mubanja laki angutumizika ku Siberia pa nyengu ya Operation North, wangukambapu ukongwa vakukwaskana ndi mo ŵanthu asuzgikiyanga asani atumizika ku ukapolu. Iyu wangukamba kuti: “Tati tafufuza, tikusaniya kuti Akaboni aku Yehova akukwana 9,793 ndi mabanja ngawu angutumizika ku Siberia. Nambala iyi yisazgapu ŵanthu wo angufwa kweniso ŵana wo anguwiya munthowa.”

Kaswiri pa nkhani za visopa ku Russia zina laki Sergey Ivanenko, wangukonkhoska vo boma la Soviet linguchitiya Akaboni aku Yehova pa nyengu ya Operation North, kweniso vo lichita pasonu panu pakutombozgeka kwa Akaboni ku Russia. Ivanenko wangukambapu so vakukwaskana ndi kukunthiyapu kwawu. Iyu wanguti: “Vo boma lichita pakutombozga Akaboni aku Yehova ko kukwamba so mu 2017 ku Russia, nkhwambula phindu. Akaboni aku Yehova wo angukunthiyapu pa nyengu ya Operation North ndipuso Akaboni wo alipu mazuŵa nganu ku Russia mbakusimikiza mtima kuvikiliya chivwanu chawu. Ndipu wenuwu mbukaboni wakuti nkhuŵavi zeru kweniso kutaya ŵaka nyengu kuŵalekeska kusopa Chiuta. Boma la Russia lingachita umampha kuŵazomereza kuti alutirizgi kusopa kweniso kugwira ntchitu zawu.”

Kaswiri munyaki so pa nkhani za visopa zina laki Artur Artemyev, yo wakulemba buku la mbiri ya Akaboni aku Yehova ku Kazakhstan lakuti: A Social-Historical and Religious Analysis (linguwerezeka mu 2020), wangukambapu kuti chinanga kuti boma la Soviet lingugwiriskiya ntchitu nthowa zakupambanapambana kuti Akaboni aku Yehova angasanirikanga so cha, kweni akutondeka. Mumalu mwaki, mu ulamuliru wa Soviet chiŵerengeru cha Akaboni aku Yehova chingusazgikiyaku. Mwakuyanana waka, kaswiri wakuwona va wanangwa wa ŵanthu zina laki Valery Borschev wa gulu la Moscow Helsinki wangukamba kuti: “Kutombozgeka kuchitisa Akaboni aku Yehova kuja akukho. Venivi ndivu arara aboma akhumbika kuziŵa.”

Valentin Gefter, yo ndi membala wa gulu la Expert Council lo litendeseka ndi Wupu Wakuwona va Wanangwa wa Ŵanthu ku Russia, wangukamba vakukwaskana ndi “Ŵanthu wo Amangika Chifukwa cha Chivwanu Chawu ku Russia.” Akaboni wo amangika ku Russia, amangika chifukwa cha nkhani za ndali cha kweni chifukwa cha vo agomezga. Iyu wangukamba kuti: “Akaboni aku Yehova atinkhana ndi boma cha.” Wangulutirizga kukamba kuti vo Akaboni agomezga ndivu vitiŵachitiska kuti alekengi kuseleriyapu pa nkhani za ndali. Mwaviyo, boma litiŵamanga pa vifukwa vambula kuvwika kweniso mwambula urunji.

Yo wangumaliya kulongoro pa unganu uwu wenga Aleksandr Verkhovsky. Iyu ndi membala wa gulu la Presidential Human Rights Council ndipuso ndi mulongozgi wa wupu wa SOVA Center for Information and Analysis. Wupu wa SOVA Center uwona va milandu yosi yakukwaskana ndi dangu lakukaniza chinthu chechosi chakofya yo yalembeka mwambula kwenere, kusazgapu milandu yo yikwaska Akaboni aku Yehova. Mr. Verkhovsky wangukonkhoska mo Akaboni atombozgeke pasonu panu ku Russia. Iyu wanguti: “Kumbi ntchitu iyi yakulimbana ndi Akaboni yimalengi? Fumbu ili ndakukhumbika ukongwa, kweni tiziŵa cha kwamuka kwaki.” Verkhovsky wangusimikiza kuti pambula kuswera yapa pamwenga kunthazi boma la Russia lilekengi kutombozga Akaboni aku Yehova. Iyu wangupereka masachizgu ngakupambanapambana kwaku wo apanga marangu, kuti awoni vo angachita kuti asinthi fundu zinyaki zo ze mu dangu lakukaniza kuchita chinthu chakofya. Atenere kuchita venivi kuti Boma lije lakuvikilirika ku vinthu vakofya kweni kwambula kuswa wanangwa wakusopa wa ŵanthu, nge Akaboni aku Yehova.

Atolankhani anguzomerezeka kufumba mafumbu pa fundu zo zakambikanga.

Pa zuŵa lenili pe, mutawuni ya Chisinau, ku Moldova, naku kwachitikanga so unganu wa atolankhani. Ndipu wo anguchitiska unganu uwu ŵenga a Institute of History of the Academy of Sciences of Moldova, the Alecu Russo State University of Balti, ndipuso a Bogdan Petriceicu Hasdeu State University of Cahul. Unganu unyaki uchitikengi pa 9 April ku Ukraine.