Mubali Oleg Danilov ndi Vladimir Ermolaev, Jr., mbanyaki mwa Akaboni aku Yehova anandi ku Russia wo alutirizga kuja akugomezgeka kwaku Yehova ndipuso akondwa chinanga akunthiyapu kutombozgeka. Abali achiganga ŵenaŵa angukamba kuti asaniya nthazi kutuliya kwa abali ŵawu akali wo angulongo chiganga kweniso chivwanu.

Ambuyaki aku Oleg, a Fyodor ndi Yekaterina Rigel anguja Akaboni aku Yehova mu 1958. Boma lati lanozga kuti Akaboni aku Yehova atombozgeki, arara a boma ku Russia angufufuza munyumba ya mubali ndi mzichi Rigel, ndikuto katundu wawu ndipuso Fyodor angumuyeruzga kuti wapereki ndalama. Chinanga kuti atombozgekanga, Fyodor wanguwovya banja laki kuti lilutirizgi kusopa Yehova nyengu zosi.

Ŵana aku Fyodor ndi Yekaterina, Alfred ndi Ella (Anyina aku Oleg), pa nyengu yo akuwanga anyozekanga ndipuso kutombozgeka. Nawu ŵenga ndi chivwanu chakukho ndipu angulutirizga kuja akugomezgeka kwaku Yehova. Pavuli paki, pa nyengu yo Alfred angumukambiya kuti wasere usilikali wangukana; mumalu mwaki wanguja mujeri kwa vyaka vitatu.

Mwakuyanana ndi asibweni ŵaki a Alfred, Oleg Danilov akumuyeruzga kuti waje mujeri kwa vyaka vitatu chifukwa cha chivwanu chaki. Iyu waja mujeri kwamba mu March 2021, kwambula muwolu waki, Nataliya ndi ŵana ŵawu anthulumi ŵaŵi, Ilya ndi Nikita. Wosi mubanja laku Danilov athemba Yehova kuti waŵawovyengi kukunthiyapu nge mo wanguwovye ambuyaki aku Oleg ndi asibweni ŵaki.

Oleg wangukamba kuti: “Kanandi nditanja kuŵanaŵaniya mo abali ŵangu kweniso abali ndi azichi anyaki a munyengu ya ulamuliru wa Soviet Union angukunthiyapu ndi kulutirizga kuja ndi likondwa. Iyu wangukamba so kuti: “Ndichita kuwone limu kuti nthazi yaku Yehova ya mzimu wakupaturika ndiyu yinguŵawovya. Nde wakusimikiza kuti ini ndi banja langu tifiskengi kukunthiyapu kweniso kuja ndi likondwa.”

Ambuyaki aku Vladimir, Jr, a Anna Ermolaeva angusambira uneneska mu 1953 mumuzi wa Serebrovo, muchigaŵa cha Irkutsk. Yiwu ndiwu ŵenga akwamba kubatizika kuja Kaboni waku Yehova mumuzi wenuwu. Anna wasuskikanga ukongwa ndi ŵanthu apafupi ndipuso anyina wo anguleka kulongoro nayu.

Arara a boma ŵati aziŵa kuti Anna wapharazganga, angumumba mulandu wakuti ndi munthu wakofya ku mwana waki, Vladimir, Sr., ndipu angumuwofyeza kuti amulondengi mwana.

Abali ndi azichi a mumpingu wo Anna wawungananga angulemba kalata yakusimikiziya kuti mzichi Anna mbama amampha. Mubali wanguluta ndi kalatayo ku Moscow ndikuchipaska mlongozgi munyaki, Nikita Khrushchev. Chakukondwesa ntchakuti, Khrushchev wanguyiwona so nkhani yo. Anna angumugowoke ndipu arara a boma angumuto cha mwanayo.

Anna wenga so ndi mwana munthukazi zina laki Nadezhda. Mu 1970, wanguja muchipatala chifukwa chakuti wasuzgikanga mumoyu. Madokotala ngangumupanga opaleshoni ŵechendawoni dankha suzgu yo wenayu. Pa nyengu yo amuchitanga opaleshoni yeniyi, madokotala ngangukamba kuti wakhumbika waŵikiki ndopa. Wosi mwana ndi anyina angukana ndopa chifukwa cha chivwanu chawu. Madokotala nganguvwiya cha vo yiwu angukamba ndipu Nadezhda angumuŵika ndopa zambula kukoliyana nayu. Chakuchitiska chitima ntchakuti, iyu wakufwa pati pajumpha kanyengu kamanavi. Kuti abisi vo angunangisa, arara a muchigaŵa cho, angunozga kuti nkhani yaboza yakumumba Anna mulandu wakuti “wapereka mwana waki sembi” yilembeki munyuzipepala.”

Venivi vingusintha ukongwa umoyu wa mulumu waku Anna, Valentin. Nyengu zosi wamuzomerezanga Anna kuti wasambizengi ŵana ŵawu fundu za mu Bayibolu kweni iyu wazigwiriskiyanga ntchitu cha. Valentin wati wawona mo abali ndi azichi awovyiyanga banja lawu pa nyengu ya masuzgu yeniyi, wangusankha kuti wasambirengi Bayibolu ndipu wanguja Kaboni waku Yehova.

Anna ndi Valentin angulutirizga kusambiza mwana wawu, Vladimir, Sr., kuti walondongi fundu za mu Bayibolu. Wati wakuwa, wanguto mzichi wakugomezgeka zina laki, Lyubov. Vladimir ndi Lyubov, nawu angusambiza mwana wawu munthulumi, Vladimir, Jr., kuti wayanjengi Chiuta ndipuso walondongi fundu za mu Bayibolu.

Mu February 2020, arara a boma angufufuza munyumba yaku Vladimir, Jr., ndi muwolu waki, Valeriya. Vladimir, Jr., wangumangika, angumujaliya mujeri kweniso angumuyeruzga kuti wakachitengi ukayidi wapanyumba kwa myezi pafufupi yiŵi. Pasonu panu atimumba mulandu wakuti wanozga vakuchitika va gulu lo likukanizika. Iyu walindizga kuti khoti lipereki cheruzgu. Asani angamusaniya ndi mulandu, angamuyeruzga kuti wakaje mujeri kwa vyaka pafufupi 15. Mumalu mwakujaliya waka kuŵanaŵaniya vo khoti limuyeruzgengi, Vladimir, Jr., waŵanaŵaniya chakuwoniyapu chamampha cho apapi ŵaki ndipuso ambuyaki angulongo.

Vladimir, Jr., wangukamba kuti “Ndi mwaŵi ukulu kusuzgika chifukwa cha zina la Awusefwi. Apapi ŵangu kweniso ambuya angukunthiyapu mu nyengu yakusuzga ukongwa ndipu angulutirizga kuja akugomezgeka. Nani ndivu ndichitengi.”

Mwakuyanana ndi Oleg ndi Vladimir, Jr., Akaboni anandi ku Russia awona kuti chakuwoniyapu chamampha cho abali ŵawu wo Mbakaboni aku Yehova angulongo, ntchakuzirwa ukongwa. Tiyeni tosi tiŵanaŵaniyengi vakuwoniyapu vamampha va abali ndi azichi a munyengu yakali wo angukunthiyapu ndipuso wo akunthiyapu kutombozgeka mazuŵa nganu. Ndipu tikhumbika “kuyezga chivwanu chawu.”—Aheberi 13:7.