DECEMBER 23, 2021
RUSSIA

Vinthu vo Yehova Wapereka Zitovya Banja la Postnikov Kuja ndi Chimangu

JULANI

Nyengu yo Khoti Liyeruzgiyengi Mulandu

Pambula kuswera yapa, khoti la Birobidzhan lo le muchigaŵa cha Jewish Autonomous liperekengi cheruzgu pa mulandu wa Mubali Oleg Postnikov ndi Mzichi Agnessa Postnikova. Loya wa boma wechendakambi cheruzgu cho wakhumba kuti mubali ndi mzichi apaskiki
Pa 12 February 2021

Apolisi a FSB angumujuliya mulandu Agnessa. Banja la Postnikov alimbanga mulandu wakupanga gulu la “uchigeŵenga” ndipuso kukambiyaku anyawu vilatu vawu vakukwaskana ndi kuchita vinthu “vakofya.” Oleg ndi Agnessa anguŵayeruzga kuti angatuwangamu cha muchigaŵa chawu, akuŵajaliya makadi nga ku banki ndipuso mazina ngawu akungalemba mumundandanda wa ŵanthu wo achita vauchigeŵenga ku Russia
Pa 12 February 2020

Apolisi a FSB angwamba kumumba mulandu Oleg

Vakukwaskana ndi Ŵanthu Yaŵa

Oleg Postnikov

Chaka cho Wakuwiya: 1965 (Vyazemsky, Muchigaŵa cha Khabarovsk)

Mo Wakukuliya: Wagwiranga ntchitu yaupulambala. Weche wachinyamata wangusere gulu linyaki la vigeŵenga. Angumujaliya mujeri chifukwa chakuchita vinthu vauchigeŵenga. Wangwamba kusambira vinandi vakukwaskana ndi Bayibolu pa nyengu yo wenga mujeri. Wati watuzgika mujeri, wangubatizika kuja Kaboni waku Yehova mu 1986

Wakutorana ndi Agnessa mu 1989. Ŵe ndi ŵana ŵaŵi

Vo Oleg Wangumuka Wati Wafumbika

Kumbi mungusambira wuli uneneska mujeri?

Penga Kaboni munyaki yo angumujaliya mujeri chifukwa chakukana kusere usilikali. . . . Tingukambiskana kwa nyengu yitali ukaboni wakulongo kuti Chiuta waliku ndipuso maboza ngakukwaskana ndi nkhani yakuti vinthu vikuchita kusambuka. Tingukambiskana so mo chilengedu chikupangikiya mwalusu. Kukambiskana venivi kungusintha mo ndaŵanaŵaniyanga. . . . Pavuli paki, ndinguŵerenga mabuku ngakupambanapambana nga Akaboni aku Yehova. . . . Ndati ndatuzgika mujeri, ndingulutirizga kusambira ndipu ndingubatizika.

Kumbi mwasambiranji pankhani ya kuthemba Yehova?

Ndingwamba kupemphera ukongwa, asani ndiluta kuchikumana ndi wakufufuza. Kukambiskana ndi wakufufuza kungulongore limu kuti pakundija ndingagwentha cha vo wakufufuza wangakamba kuti wandipusisi ndipuso kuti ndingalutirizga cha kuja wakugomezgeka chifukwa cha zeru ndi nthazi zangu. Ndinguziŵa kuti ndikhumbika kuthemba ukongwa Yehova kuti ndije wakufwasa kweniso ndi chiganga. Ndipu ndikhumbika cha kufipa mtima ukongwa ndi vo vingachitika.

Kumbi pe lemba lelosi lo litikuchiskani?

Kanandi nditanja kuŵanaŵaniya mazu nga pa Yoswa 1:9 ngo ngakamba kuti: “Yehova Chiuta waku we nawi kwekosi ko ungaluta.” Venivi vitindikumbusa kuti ndingaluta kumalu nganyaki ko ndingayanjaku cha kuluta. Kweni, Yehova watindisimikiziya mwakundikambiya kuti: ‘Ndilutengi nawi, kufipa mtima cha. Nge mo ndingulutiya ndi Yosefi, nawi so, ndilutengi nawi.’ Layizgu ili, litindiwovya kuti ndileki kufipiya mtima ukongwa vo vingachitika mawa. Vitindiwovya so kuti ndileki kuja ndi maŵanaŵanu ngakugongowesa.

Agnessa Postnikova

Chaka cho Wakuwiya: 1963 (Kazakhstan)

Mo Wakukuliya: Iyu ngwachinkhondi pa ŵana 7 mu banja mwawu. Pa nyengu yo wenga wachinyamata, wayanjanga kuvina kweniso kuluta ku maholu. Watanja so kuchita masaza nga mu ayisi. Mazuŵa nganu watanja kuja mucharu chaki, kuphwere maluŵa ndipuso kukwera mapiri. Wagwira ntchitu yakusona

Wakubatizika mu 1979. Wakutorana ndi Oleg mu 1989

Vo Agnessa Wangumuka Wati Wafumbika

Kumbi mwawovyeka wuli munyengu yakusuzga iyi?

Ndikhumba kuwonga Wupu Wakulongozga pakutinozge chakurya chauzimu pa nyengu yaki. Ndikhumba so kuŵawonga ukongwa abali ndi azichi wo atovya pakunozga sumu, mafilimu, mavidiyo, maunganu ndi Mabayibolu ngafya. Nditimuwonga ukongwa Yehova pakundipaska banja la chanju ndipuso lamampha ukongwa kuti lindichiskengi mu nyengu yakusuzga yeniyi.

Kumbi ndi vinthu nivi vakutuliya kwaku Yehova vo vakuwovyani ukongwa?

Ndisaniya chovyu asani ndipemphera kwaku Yehova ndipuso kuŵanaŵaniya sumu nge yakuti, ‘Mucharu Chifya’ kweniso yakuti ‘Charu Chifya Che Pafupi Ukongwa.’ Sumu zenizi zikonkhoska mo charu chifya chazamuŵiya. Venivi vitindiwovya kuja wakufwasa ndipuso nditijvwa kuti Ada ŵangu achanju atindiyanja.

Vakuchitika venivi vilongore limu kuti Yehova wanozgekeresa ŵanthu ŵaki kuti alutirizgi kuja akugomezgeka chinanga kuti akumana ndi mayeseru ngakupambanapambana. Tiyeni tosi tilitirizgi kuthemba Yehova chifukwa cha ‘chanju chaki chambula kumala kweniso kugomezgeka kwaki.’—Salimo 115:1.

NKHANI