Pa 1 April 2021, ku Moscow kunguchitika unganu wa atolankhani, wakukumbukiya kuti pajumpha vyaka 70 kutuliya po Akaboni aku Yehova angutumizikiya ku ukapolu ku Siberia. Pati pajumpha waka mazuŵa ngamanavi, pa 6 April, wupu wa International Memorial Society unguchitiska unganu unyaki ndipu ungudana akaswiri akupambanapambana a ku Russia ndipuso ŵanthu wo awona va wanangwa wa ŵanthu. Pa unganu uwu angukambiskana va kutumizika kwa Akaboni mu 1951, ko boma la Soviet lakudananga kuti Operation North. Kweniso angukambiskana mbiri yakukwaskana ndi kutombozgeka ko Akaboni aku Yehova ku Russia akunthiyapu.

Zina lakuti Operation North lingwamba ndi Ministry of State Security (MGB) mu boma la Soviet. Kukwambiriya kwa chaka cha 1951, a MGB angutumiza lipoti kwaku Joseph Stalin, yo wenga mulongozgi wa boma Soviet Union. Chigaŵa chinyaki cha lipoti ili chingukamba kuti: “Kuti umalisi gulu la Akaboni aku Yehova lo ligwira ntchitu mwakubisa pakulimbana ndi boma la Soviet, gulu la MGB la USSR liŵanaŵana kuti vingaja umampha kuti alongozgi a Akaboni aku Yehova amangiki ndipuso kuti Akaboni anyaki wosi wo ŵe ku Ukraine, Belarus, Moldova, Latvia, Lithuania, ndi Estonia atumiziki ku ukapolu ku vigaŵa va ku Irkutsk ndi ku Tomsk.” Mwaviyo, ŵanthu pafufupi 10,000, mabanja ngakujumpha 3,000 angutumizika ku ukapolu. Ichi chenga chiŵerengeru chikulu ukongwa cha ŵanthu wo angutumizika ku ukapolu chifukwa cha nkhani za chisopa mu ulamuliru wa boma la USSR.

Aleksandr Guryanovyo, yo wachitisanga unganu wenuwu wangukamba kuti: “Kutombozgeka kwa gulu lenili . . . kweche kulutiriya mpaka sonu, mwaviyo mphakukhumbika kukambiskana vakukwaskana ndi mbiri ya Operation North.”

Pavel Polyan, yo ndi kaswiri wakulemba mbiri, wakuziŵa za malu kweniso wakuwona va maulendu ngakuchita kuchichizga ngo ngachitikanga mu ulamuliru wa USSR, wangukamba vakukwaskana ndi mbiri ya Akaboni aku Yehova mu nyengu ya ulamuliru wa Soviet Union, ndipu wangukonkhoska so chifukwa cho Akaboni anguŵatumiziya ku ukapolu. Mu vyaka va mu ma 1940 ndi 1950, gulu la MGB lingwamba kuwona kuti Akaboni aku Yehova ŵenga akukoliyana ukongwa. Kusazgiyapu yapa, Mr. Polyan wangukamba kuti: “[Akaboni aku Yehova] mbamishonale amampha ukongwa wo boma lo litimugomezga cha Chiuta litiŵatinkha.”

Valeriy Borshchev, yo wawona va wanangwa wa ŵanthu ndipuso mura wa gulu la Moscow Helsinki, wangukambapu kuti arara a chipani cha Soviet angugwiriskiya ntchitu nthowa zakupambanapambana pakukhumba kuti Akaboni aku Yehova aleki vo agomezga kweniso kuti aleki kuteŵete Yehova. Mr. Borshchev wangukamba kuti pati pajumpha nyengu, “arara a boma [wo awonere vakukwaskana ndi visopa] anguziŵa kuti viŵana vosi vo athyanga vagwiranga ntchitu cha. Titenere kuŵalumba ukongwa Akaboni aku Yehova. Yiwu ŵenga akusimikiza mtima kulutirizga kuja akugomezgeka kwaku Chiuta wawu.”

Sergey Davidis, yo ndi membala wa wupu wa Memorial Human Rights Center Council ndipuso wawonere pulogilamu yo wupu wenuwu ukwambisa yakovya akayidi, wangukonkhoska mo Akaboni aku Yehova angutombozgeke ukongwa ku Russia kwambiya mu 1998. Iyu wangukamba kuti vo Khoti Likulu Ukongwa linguyeruzga mu April 2017 pakukaniza ntchitu ya Akaboni aku Yehova, chenga chifukwa chakuti Akaboni aku Yehova akamba kuti chisopa chawu ndichu chauneneska. Mr. Davidis wangukamba kuti: “Cheruzgu cho khoti likupereka ntchambula urunji. Ve viyo chifukwa mwakawi munthu weyosi wagomezga kuti chisopa cho walimu ntchauneneska.”

Mubali Yaroslav Sivulskiy, wakumiya gulu la Akaboni aku Yehova ku Europe, wangukambiya ŵanthu wo avwisiyanga vo apapi ŵaki wo ŵenga ku ukapolu ku Siberia angumukambiya. Yiwu angumukambiya kuti panyengu yo Akaboni ŵenga ku Siberia, akumananga ndi masuzgu nganandi ngo akhumbikanga kukunthiyapu. Mabanja nganyaki ŵati afika nangu ku Siberia anguchingasiya kudondu kwambula nyumba kweniso ku malu ngakuzizira. Mwakuti abali achitanga kukumba vimazenji vikuluvikulu kuti mabanja ngawu ngajengemu. Ndipu ajanga mwenimo kwa myezi yinandi mpaka po azenge nyumba zakuti ajemu kwa nyengu yitali. Pa nyengu yosi yeniyi, kanandi Akaboni aryanga vakume vinyaki vacheya kweniso makungwa nga vimiti. Akaboni anandi angufwa ndi nja pamwenga matenda.

Mubali Sivulskiy wangukamba kuti chifukwa cho Akaboni aku Yehova angutumizikiya ku ukapolu mu 1951, chiyanana waka ndi cho boma la Russia litombozge Akaboni mazuŵa nganu. Arara aboma aŵanaŵana kuti chifukwa chakuti Akaboni aseleriyapu cha pa va ndali ndikuti akhumba cha kuvwiya boma. Kweni ndimu viliri cha. Yiwu aluwa kuti Akaboni aku Yehova aziŵika kuti atumbika ŵanthu amazaza, avwiya marangu ndipuso agwira ntchitu mwaphamphu pakovya ŵanthu.

Mu mazu ngaki ngakumaliya, Aleksandr Guryanov, yo wachitisanga unganu wenuwu wangukamba vo vichitikiya Akaboni aku Yehova ku Russia pasonu panu. Iyu wanguti: “Boma litiŵatinkha ukongwa Akaboni aku Yehova.” Ŵanthu wo ŵengapu pa unganu uwu angukumbusika kuti aziŵengi kuti chinanga kuti pajumpha vyaka 70 kutuwa po Akaboni anguŵatumiziya ku ukapolu ku Siberia, kweni boma la Russia likwamba so kuŵatombozga. Ŵanthu ŵenaŵa wo avwiya marangu, atiŵamba mulandu chifukwa chakuti achita vinthu vakukwaskana ndi chisopa chawu, chinanga kuti dangu lizomereza kuti munthu we ndi wanangwa wakuchita venivi.

Vidiyo ya unganu uwu yisanirika waka muchineneru cha ku Russia pe.