Pambula kuswera yapa, khoti la mutawuni ya Surgut lo le muchigaŵa cha Khanty-Mansi Autonomous liperekengi cheruzgu pa mulandu wa abali 17 ndi mzichi yumoza. Anyaki mwa abali ŵenaŵa ndi Mubali Yevgeniy Fedin, Artur Severinchik ndi Timofey Zhukov. Loya waboma wechendakambi cheruzgu cho wakhumba kuti abali yaŵa ndi mzichi widu apaskiki.

1. Pa 15 February, 2019

   Apolisi angufufuza munyumba zinandi za Akaboni aku Yehova ku Surgut ndipuso ku matawuni nganyaki ngapafupi. Abali 7 angukamba kuti angutombozgeka ukongwa pa nyengu yo apolisi aŵafumbanga mafumbu. Abali atatu anguŵikika mujeri kulindizgiya milandu yawu, kusazgapu Yevgeniy Fedin ndi Artur Severinchik

2. Pa 7 March, 2019

   Artur wati waja mujeri kwa mazuŵa 21, khoti la apilu lingukamba kuti watuzgiki mujeri

3. Pa 11 April, 2019

   Yevgeniy wati waja mujeri kwa myezi pafufupi yiŵi, wangutuzgika. Khoti lingumukaniza kuti wangatuwangamu cha mucharu cho, wangakambiskananga ndi munthu weyosi cha kweniso wangagwiriskiya ntchitu intaneti cha

4. Pa 16 January , 2020

   Wakweruzga wangukamba kuti Mubali Timofey Zhukov waluti kuchipatala cha ŵanthu akuzunguliya mutu kuti akamupaski chovyu chakuchipatala. Akufufuza angukamba kuti anguchita venivi chifukwa Mubali Timofey wamukanga cha mafumbu ngo amufumbanga. Kuleka kumuka mafumbu wenga wanangwa waki wo ukoliyana ndi Dangu 51 la Marangu nga ku Russia (Constitution of the Russian Federation). Pavuli paki, Timofey wangupanga apilu cheruzgu chenichi

5. Pa 5 February, 2020

   Apolisi angumanga Timofey pa nyengu yo watuwanga ku khoti. Chinanga kuti khoti lenga leche kuwona mulandu waki wo wangupanga apilu, apolisi anguluta nayu mbwenu kuchipatala cho chenga pa mtunda wa makilomita 1,200 ku Yekaterinburg ndipu wanguchijaku kwa mazuŵa 14

6. Pa 5 March, 2020

   Khoti la apilu linguyeruzga kuti vo apolisi anguchita pakumulutisa Timofey kuchipatala cha ŵanthu akuzunguliya mutu kwenga kuswa dangu

7. Pa October 19, 2021

   Khoti la apilu linguyeruzga kuti Timofey amulipiri ndalama chifukwa chakumuŵika mujeri kwambula kunanga

8. Pa 12 November, 2021

   Pa nyengu yo avwisiyanga mulandu wawu kakwamba, maloya ngo ngamiya abali ŵenaŵa pa milandu yawu ngangupereka ukaboni wakukwaskana ndi vinthu vambula kuzomerezeka ndi dangu vo apolisi achitanga ndipuso va nkhaza, kusazgapu kuŵatombozga, kupereka ukaboni waboza ndipuso kuchita sankhu. Maloya ngakumiya abali ŵenaŵa pa milandu ngangupempha khoti kuti milandu ya abali yaŵa yiwere so ku loya waboma

9. Pa 15 November, 2021

   Wakweruzga wanguziŵa kuti vinthu vinyaki vo akufufuza anguchita kwenga kuswa dangu, kweni wangukana kuweze milandu ku loya waboma

Tigomezga kuti Yehova walutirizgengi kovya Yevgeniy, Artur, Timofey ndipuso abali ndi azichi wosi wo ‘alutirizga kulereska pa vinthu vambula kuwoneka’ po alutirizga kukunthiyapu kutombozgeka.—2 Akorinto 4:17, 18.