Pa 7 March 2021, apharazgi wo alongoro Chikwangali, Chisepulana, ndi Chisetswana ku South Africa, angulonde mphasu yapade ukongwa. Mu nkhani yo yinguchita kujambulika, Mubali Mark Sanderson wa mu Wupu Wakulongozga ndiyu wangutuzga Bayibolu la Charu Chifya la Malemba nga Chigiriki Ngachikhristu mu Chikwangali ndi mu Chisepulana ndipuso Bayibolu la Charu Chifya la Malemba Ngakupaturika lakunozgeka so mu Chisetswana. Apharazgi anguwonere pulogilamu yeniyi kuziya pa vidiyokoferensi, ndipu Mabayibolu yanga ngenga ngakuŵerenge pa vipangizu va mazuŵa nganu.

Azichi ŵaŵi ndi mubali yumoza ndiwu angufwatuliya Bayibolu ili kwa vyaka viŵi. Apharazgi akujumpha 240 wo alongoro chineneru ichi, pasonu panu ŵe ndi Bayibolu lambula kusuzga kuŵerenga lo liŵawovyengi pakusambira pakuŵija ndipuso mu uteŵeti.

Abali ŵaŵi ndi azichi anayi ndiwu angugwira ntchitu yakufwatuliya Bayibolu lenili, lo linguto pafufupi chaka ndi hafu kuti limali. Ku South Africa kwe apharazgi 374 wo alongoro Chisepulana.

Wakufwatuliya munyaki wangukamba kuti: “Asani tasere mu uteŵeti, kanandi tagwiriskiyanga ntchitu Bayibolu la Chisepedi. Kweni techendakonkhoski Lemba, tayambanga dankha kukonkhoska pamwenga kufwatuliya mazu nga mu vesi lo ku ŵanthu wo titiŵapharazgiya. Kweni sonu, tikhoza kuŵerenga waka lemba kutuliya mu Bayibolu lasonu ndipuso weyosi wangavwisa liŵi vo ling’anamuwa.”

Ntchitu yakufwatuliya so Bayibolu lenili yinguto vyaka pafufupi vinayi kuti yimali. Akufwatuliya 6 ndiwu angugwira ntchitu yakufwatuliya Bayibolu lenili. Muchigaŵa cho ŵanthu alongoro Chisetswana mwe apharazgi akujumpha 5,600.

Pakukamba va Bayibolu la Charu Chifya la Chisetswana, wakufwatuliya munyaki wangukamba kuti: “Bayibolu lenili liwovyengi apharazgi kuti aŵikiyengepu mtima pakusazgiyaku lusu lawu mu uteŵeti mumalu mwakumaliya nyengu kukonkhoska mazu ngakusuzga. Bayibolu ili liŵengi so chidya chamampha ukongwa pakusambira. Vinthu vo ve mu Bayibolu ili nge matchati, mapu, vithuzi ndipuso mazu ngo ngakonkhoskeka viwovyengi apharazgi kuti ayeruzgiyengi kuti nkhani yo aŵerenga mu Bayibolu yichitika nadi.”

Mabayibolu ngasonu ngenanga ngawovyengi abali ndi azichi widu ndipuso ŵanthu wo atiŵapharazgiya kuti akhorwengi ndi vo asambira. Tiwonga ukongwa chakurya chinandi chauzimu cho tilonde mazuŵa nganu.—Yesaya 65:13.