Pa 28 January 2021, Khoti Likulu Ukongwa South Korea likuyeruzga kuti nkhunanga cha asani munthu wakana kusere usilikali chifukwa cha vo wagomezga. Venivi ving’anamuwa kuti pasonu panu abali ŵidu wo agwiranga ntchitu ya usilikali ŵechendaje Akaboni aku Yehova apaskingengi so cha chilangu chifukwa chakukana kusere usilikali.

Anthulumi wosi ku South Korea wo angugwiraku ntchitu ya usilikali atenere kuchita so masambiru nga usilikali kwa vyaka 8. Venivi ving’anamuwa kuti abali ŵidu wo pakwamba ŵenga asilikali aŵadana so kuti akachiti masambiru nga usilikali ndipu asani akana aŵapaskanga chilangu mwakuwerezawereza. Mubali munyaki wakhumbikanga kuchiwoneke kupolisi, kwa loya wakumiya boma ndipuso ku khoti maulendu ngakujumpha 60 pachaka.

Mu 2018, makhoti ngaŵi ngakulungakulu ku Korea, Khoti Lakuwona va Marangu ndipuso Khoti Likulu Ukongwa lingulamula kuti kukana kusere usilikali chifukwa cha vo munthu wagomezga nkhunanga cha. Mumalu mwaki Akhristu angapaskika ŵaka ntchitu zinyaki kuti agwirengi. Kweni Makhoti yanga ngakukamba cha vakuchita pankhani yakukwasana ndi dangu la gulu la Reserve Forces, lo lipereka mazaza ku boma ngakupereka chilangu ku munthu yo wakana kusere usilikali chifukwa cha vo wagomezga.

Pambula kuswera yapa Khoti Likulu Ukongwa likulamula kuti munthu we ndi wanangwa kukana kusere usilikali chifukwa cha vo wagomezga. Abali wo aja achiluta ku khoti kananandi waka, sonu angapempha kuti apasiki ntchitu zinyaki mumalu mwakupereka ndalama kweniso kuchija mujeri. Mubali Nam Tae-hee yo wenga yumoza mwa ŵanthu wo ambikanga mulandu, wangukamba kuti: “Ndati ndaluta ku khoti maulendu ngananandi waka pa vyaka 8 vo vajumpha, sonu nde ndi wanangwa. Ndituvwa nge kuti ndathula chinthu chizitu mumtima mwangu.”

Tikondwa ndipuso titimuwonga ukongwa Yehova pamoza ndi abali ŵidu a ku Korea kweniso mabanja ngawu chifukwa cha ‘kukunthiyapu masuzgu ndipuso kusuzgika ndi vinthu vambula urunji chifukwa cha njuŵi yawu kwaku Chiuta’!—1 Peturo 2:19.