Pa 7 January 2021, khoti la ku Tajikistan likuyeruzga kuti Mubali Rustamjon Norov wakaje mujeri kwa vyaka vitatu ndi hafu chifukwa chakukana kusere usilikali mwakukoliyana ndi vo wagomezga.

Khoti lechendapereki cheruzgu, Mubali Rustamjon wangupaskika mwaŵi wakuti walongoro ndi ŵanthu wo ŵenga mukhoti. Mwachiganga, iyu wangukamba mavesi nganandi nga mu Bayibolu kuti wakonkhoski chifukwa cho wakaniya kusere usilikali. Wangukamba so cho chitimuwovya kuti walutirizgi kuja wakugomezgeka kwaku Chiuta.

Iyu wangukamba mazu nga pa Afilipi 4:13 ngo ngakamba kuti: “Mu vinthu vosi ndija ndi nthazi kuporote mwaku yo watindipaska nthazi.” Kusazgiyapu yapa, wanguti: “Pa nyengu iyi, ndajivwanga kuti Chiuta wangu, Yehova, watindiwovya ndipuso watindipaska nthazi kuti ndileki kuwere vuli, kweni kuti nyengu zosi ndijengi walikondwa. Nditimuwonga ukongwa Yehova chifukwa chakuŵa nani ndipu ndimalika pakumuteŵete nge yumoza mwa Akaboni ŵaki.”