Nge mo tingukambiya pakwamba, Mubali Rustamjon Norov, sonu we ndi vyaka 22, ndipu wakutuzgika mwaliŵi mujeri pa 21 September 2021 ku Tajikistan chifukwa cha dangu lasonu lo lingwamba kugwira ntchitu kukwambiriya kwa mwezi wenuwu. Iyu wanguja mujeri kwa myezi yitatu kulindizgiya mulandu waki. Pa 10 May 2021, angumutumiza ku Yavan kuti wakalutirizgi kugwira jeri kwa vyaka vitatu ndi hafu. Pa nyengu yo wenga mujeri kweniso wambikanga mulandu, ŵanthu wo amuwoneriyanga Rustamjon angukhorwa ndi nkharu yaki yamampha ndipuso kugomezgeka kwaki.

Pa nyengu yo Rustamjon amumbanga mulandu, msilikali wangufika pafupi ndi Rustamjon ndikumuko janja. Msilikali yo wangukamba mo Rustamjon wangulongole chiganga ndipuso kugomezgeka kwaki. Msilikali uyu wangukamba kuti: “Munthu weyosi yo wagomezga Chiuta wakhumbika kuja nge yiwi.” Iyu wangukamba kuti: “Ŵanaŵaniya waka kuti vyaka vo vituza asani ntchitu zo munthu wakhumbika kugwira mumalu mwakuchita usilikali zaziyamba kunu ku Tajikistan, zina laku lazamukuŵa pamoza ndi mazina nga ŵanthu wo akujipereka chifukwa cha wanangwa wenuwu.”

Pa nyengu yo Rustamjon wenga mujeri wangulutirizga kulongo nkharu yamampha kwa anyaki. Chifukwa cha nkharu yaki yamampha, wangudanika ndi arara a jeri kuti wakachiti masambiru ngo wupu wa European Union ukujalikisa kuti uwovyi akayidi wo ŵe mujeri kuti azisaniyi ntchitu asani atuzgika. Rustamjon wati wamaliza masambiru ngaki, mura wa jeri wangumupasa setifiketi pamoza ndi kalata yakuwonga phamphu laki. Rustamjon wangukamba kuti arara angukamba kuti wenga ndi nkharu yamampha chifukwa chakuti wagwiriskiyanga ntchitu fundu za mu Bayibolu.

Rustamjon wechendatuzgiki mujeri wagomezganga cha kuti dangu ili lingagwira ntchitu kwaku iyu. Kweni akayidi anyaki angukamba kuti ŵenga akusimikiza kuti iyu wakhoza kutuwa chifukwa wenga ndi mbiri yamampha mujeri. Arara akujeri nawuso amuchiskanga.

Akaboni achinyamata wo mbakugomezgeka nge Rustamjon, amangika chifukwa chakukana kusere usilikali ndipu alutirizgengi kuja akugomezgeka, yiwu ‘alongo ukweru ku ŵanthu wosi.’ Kuluska vosi, “ntchitu zawu zamampha” zithamika ndipuso kukankhuska Yehovla Chiuta.—Mateyu 5:16.