Pambula kuswera yapa, * khoti la ku Tajikistan liperekengi cheruzgu pa mulandu wakukwaskana ndi Mubali Rustamjon Norov. Khoti lingayeruzga kuti waje mujeri kwa vyaka viŵi mpaka vinkhondi chifukwa chakuti njuŵi yaki yitimuzomereza cha kusere usilikali. Iyu wakuŵikika mujeri pa 1 October 2020.

Rustamjon Norov

• Chaka cho Wakuwiya: 1998 (Dushanbe)

• Mo Wakukuliya: Wagwiranga ntchitu yakunozga nyumba ndi vinthu vinyaki kuti wajiwovyengi kweniso wawovyengi banja laki. Watanja kutchaya bola

• Wangubatizika mu 2016 po wenga ndi vyaka 17. Pati pajumpha vyaka viŵi, iyu wangusama mu mpingu wa Chirashiya wo wawungananga limoza ndi banja laki ndipu wangusamiya mu mpingu wa Chitajiki kuti wawovyi ŵanthu kusambira Bayibolu

Mu 2016, Mubali Rustamjon Norov wanguluta ku ofesi ya asilikali. Iyu wangukonkhoska chifukwa cho waleke kusere usilikali ndipu wangupempha kuti amupaski ntchitu yinyaki. Mu chaka chakulondopu, iyu wangukamba vinthu vakuyanana waka ndi vo wangukamba pakwamba. Wachiŵi kwa ara ŵa asilikali wanguvwisa vo Mubali Norov wangukonkhoska ndipu wangukhorwa navu. Mu vyaka vitatu vakulondezana waka, Mubali Norov angumudanapu cha kuti wakasere usilikali.

Kweni pa 24 September 2020, ofesi ya asilikali yingudana Mubali Norov. Arara ŵa asilikali angumufumba mafumbu kwa maora ngatatu ndipu pakumaliya angukamba kuti we umampha waka ndipu wangafiska kugwira ntchitu ya usilikali. Arara ŵenaŵa angumuchichizga kuti waluti kuchiwonana ndi madokotala kuti akamupimi. Awisi a Mubali Norov nawu ŵengapu ndipu angupempha arara asilikali kuti nkhani iyi aluti nayu ku ofesi ya munthu yo wamiya boma pa milandu.

Pa 1 October, Mubali Norov ndi awisi anguluta ku ofesi ya munthu yo wamiya boma pa milandu. Wakumiya boma pa milandu wanguŵapaska mpolisi kuti waŵaperekezi ku ofesi ya asilikali. Ŵati afika, awisi a Mubali Norov anguŵazomereza cha kuti asere. Mubali Norov angumujaliya mujeri kwa mazuŵa ngaŵi. Mubali uyu ŵechendamuyeruzgi. Po wenga mujeri, arara ŵa asilikali amukaniyanga kuti wakambiskani ndi loya waki.

Pa 3 October, Mubali Norov angumusamusiya ku ofesi yinyaki ya asilikali mutawuni ya Khujand. Tawuni yeniyi ye pa mtunda wa makilomita 300 kutuwa ku Dushanbe ko kuja banja laki. Pa mazuŵa ngaŵi pe, angumusamusiya so ku maofesi nga asilikali ngakupambanapamba ku Khujand.

Pa 6 October, Mubali Norov angumuzomereza kuti wakambiskani ndi ŵanthu a mubanja laki kweniso loya waki. Chinanga kuti venga viyo, pa 17 October, khoti la asilikali ku Tajikstan lingukamba kuti mubali uyu waŵikiki mujeri wachilindizga kuti mulandu waki uyeruzgiki. Iyu walutirizgengi kuja mujeri mpaka po asaniliya ukaboni kweniso mpaka po khoti lazakumuyeruzgiya. Mubali Norov atimumba mulandu wakuti wakusintha vipepala va kuchipatala ndi chilatu chakuti waleki kusere usilikali.

Chinanga kuti Mubali Norov we mujeri, kweni wawere vuli cha ndipu walutirizga kuja wakugomezgeka kwaku Yehova. Iyu wawonga ukongwa Yehova chifukwa cha kumuwovya kuti waje ndi chivwanu chakukho kweniso chiganga vo vitimuwovya kuti walutirizgi kukunthiyapu chiyesu ichi. Mubali Norov waluwa so cha chiyesu cho chinguchitika mwamabuchibuchi mu 2013. Mu chaka ichi, arara aboma anguza ku sukulu ndi kuko iyu ndi mvurwa waki Ravshan ndipu anguluta nawu ku ofesi ya asilikali kuti akaŵapimi asani liŵavu lawu ndanthazi. Rustamjon wenga ndi vyaka 15 pe pa nyengu iyi ndipu wenga wechendakwanisi vyaka vo munthu wakhumbikiya kusere usilikali ndipu wenga mupharazgi wambula kubatizika. Venivi vati vachitika, pa nyengu yakusopa kwa pabanja, awusewu a Batyr, amaliyanga nyengu yinandi pakusambiza ŵana ŵawu mo angachitiya kuti aleki kuselereyamu mu vacharu. Kanandi a Batyr ayeseriyanga kuti yiwu mbara asilikali ndipu ŵana ŵawu ayeseriyanga mo angachitiya kuti avikiliyi chivwanu chawu.

Rustamjon wangukamba kuti: “Techendayambi kuyesere mo tingavikiliya chivwanu chidu pakusopa kwa pabanja, ndajiwonanga kuti nde wakunozgeka kuvikiliya chivwanu changu. Kweni tati tayamba kuyesere, ndinguzizwa kuwona mo ndachitiyanga mantha. Venivi vingundiwovya kuziŵa kuti ndakhumbikanga kupemphera kweniso kusambira vinandi vakukwaskana ndi mo ndingavikiliya chivwanu changu kuti ndileki kuthera. Ndati ndachita viyo, ndinguleka kuchita mantha. Kukwambiliya kwa chaka cha 2016, ndingujipatuliya kwaku Yehova ndi kubatizika.”

Rustamjon wachiskika so asani wacheza ndi abali akukota wo mbakukhwima mwauzimu wo nawu akumangikapu chifukwa cha chivwanu chawu. Iyu wangukamba kuti: “Ndiziŵa umampha kuti ndikumanengi ndi masuzgu asani ndingaleka kuseleriyamu mu vacharu. Asani angandiŵika mujeri, ndiwonengi kuti ndi mwaŵi wangu wakutowesa zina laku Yehova ‘muchigaŵa chasonu’ cho nkhu jeri.”

Awisi aku Rustamjon angukamba kuti: “Banja lidu liwonga ukongwa Yehova chifukwa chakutipaska mwaŵi wakumuteŵete ndipuso kutigwiriskiya ntchitu. Kwa abali ndi azichi ŵidu tikamba kuti, ‘tiwonga ukongwa chifukwa cha chanju chinu, mapempheru nginu ndi chovyu cho mutitipaska kuti tilutirizgi kuja pa ubwezi wakukho ndi Yehova.’ Tifipa mtima cha. Chimangu chaku Chiuta chivikiliya mtima yidu nge mo Yehova wakutilayizgiya mu Mazu ngaki!”—Afilipi 4:6, 7.