Mubali Jovidon Bobojonov wati watuzgika mujeri pa 1 November 2020 wangukamba kuti: “Yehova wandiwovya kuti ndilutirizgi kuja ndi chivwanu chakukho.” Pa 31 October 2020, Pulezidenti wa ku Tajikistan wangugowoke Jovidon, pamoza ndi akayidi anyaki 377. Jovidon wanguja mujeri kwa myezi 9 pa vyaka viŵi vo angumulangiya chifukwa chakuti njuŵi yaki yitimuzomerezga cha kusere usilikali.

Pa 4 October 2019, asilikali anguto Jovidon ku nyumba kwaki yo panyengu iyi wenga ndi vyaka 19 ndipu angumujaliya mu ofesi ya asilikali. Pati pajumpha myezi yinandi, angumusamusiya kumalu ngakupambanapambana nga asilikali. Ku malu ngosi ngo asungiyamu ŵanthu wo ananga (Temporary Detention Facility), iyu wakhumbikanga kukonkhoska chifukwa cho waleke kusere usilikali. Jovidon wangukamba kuti: “Arara a asilikali kweniso asilikali andifumbanga mafumbu ngakusuzga ndipu akhumbanga kuti ndileki kuja Kaboni waku Yehova. Yiwu andiyambiyanga dala mwakundifumba mafumbu ngenenga ndi chilatu chakuti ndifyi mtima. Nyengu zinyaki andiyuskanga ndi usiku ndipu andifumbanga mafumbu ngamoza pe mwakuwerezawereza kuti ndikonkhoski chifukwa cho ndikaniya kusere usilikali.

“Kweni, pempheru lingundiwovya ukongwa. Po ndajanga ndi gulu la asilikali, zuŵa lelosi ndi musana kweniso usiku ndapempheranga mwakutuliya pasi pamtima uku ndiliya, ndamupemphanga Yehova kuti wandiwovyi kukunthiyapu, kuleka kumuguŵiska kweniso kuti ndileki kumuka asani atindiyamba.

“Yehova wanguko janja langu mwanthazi . . . Nyengu zinyaki ndasuzgikanga maŵanaŵanu chifukwa ndajivwanga kuti nde ndija. Kweni Yehova kuziya muchilengedu chaki, wandipaskanga nthazi. Mulenji wewosi asani ndayuka ndavwanga tiyuni titumba. Ndi usiku, ndaleresanga mwezi ndi nyenyezi. Mphasu zakutuliya kwaku Yehova zenizi zingundiwovya kuti ndije ndi likondwa kweniso zandichiskanga.”

Pa 2 April 2020, Jovidon angumusaniya ndi mulandu ndipu angumusamusa ku malu ngakulindiziya ngo asungiyamu ŵanthu wo ananga ndi kumulutisa kujeri. Wazomerezekanga cha kulonde makalata. Kweni abali ndi azichi amupaskanga chakurya ndipuso kumulembe lemba la zuŵa pa majumbu ngo anyamuliyanga katundu. Jovidon wangukamba kuti: “Venivi vingundiwovya kujivwa kuti nde ndija cha ndipu ndinguziŵa kuti mabwezi ngangu ngatindiyanja.”

Jovidon wangukondwa so ukongwa kuti wakumbukanga mavesi ngakuchiska nga mu Bayibolu nge Aroma 8:37-39. Iyu wangukamba kuti: “Nde mujeri, ndinguwamu kuti mazu yanga ngauneneska nadi. Palivi mayeseru ngo ngangatipatuska ku chanju chaku Yehova. Yehova wangundiwovya kuti ndilutirizgi kuja ndi chivwanu chakukho.”

Vo Jovidon wangukumana navu vachiska ukongwa apapi ŵaki. Awisi a Abdujamol, angukamba kuti: “Chivwanu chidu chingukho chifukwa cha mapempheru kweniso chakuwoniyapu chamampha cha mwana widu yo wanguthera cha wati wakumana ndi mayeseru. Abali ndi azichi ŵidu wosi pacharu chosi atiwovyanga. Titiŵawonga ukongwa chifukwa cha mapempheru ngawu. Titimuwonga ukongwa Yehova chifukwa chakutipaska mabwezi nga chanju.”

Munyengu yakukumaliya iyi, tosi tilindizga kuzikumana ndi “mayeseru ngakulilima.” (1 Peturo 4:12) Jovidon wangumaliza ndi mazu ngakuti: “Pakuti sonu ndemujeri cha, ndikhumba kugwiriskiya ntchitu wanangwa wangu kuti ndiziŵi zeru zaku Yehova ndipu ndinozgeke mwakukwana mayeseru ngosi ngo ndingazikumana nangu kunthazi. Kwaku mosi yimwi mwendakumanepu ndi mayeseru, mukhumbika kuyesesa kugwiriskiya ntchitu wanangwa wo mwenawu kuti muziŵi zeru zaku Yehova mwakuŵerenga Mazu ngaki kweniso mabuku ngidu.”