Pa 24 February 2021, yumoza wa ŵaraŵara mu wupu wa USCIRF * zina laki Nury Turkel wangukamba kuti wawonesesengi kuti Mubali  Shamil Khakimov yo we ndi vyaka 70, watuzgiki mujeri mwakukoliyana ndi fundu yo wupu wa USCIRF’s Religious Prisoners of Conscience Project wenawu. Mu mazu ngaki, Turkel wangukamba kuti: “Kwambiya mu 2019, da uyu waja wachitama, kusuzgika ndi ukoti kweniso kuja mujeri mo mwe akayidi anandi chifukwa chakumuyeruzga mwambula urunji kuti waje mujeri kwa vyaka 7 ndi hafu. Cheruzgu chenichi chingachitiska kuti iyu wafwiyi mujeri. Iyu wakumangika chifukwa chifukwa cha vo wagomezga nge Kaboni waku Yehova.”

Mubali Khakimov, yo muwolu wakutayika, njumoza mwa Akaboni 24 wo aja kunkhondi kwa Tajikistan ŵeniwo angufumbika mafumbu ndi arara a wupu wa Department of Organized Crime Control (DOCC) mu January ndi February 2019. Arara a wupu wa DOCC angumanga Mubali Khakimov ndipu angumufumba vakukwaskana ndi mo gulu lichitiya vinthu kweniso cho chingumuchitiska kuti waje Kaboni waku Yehova.

Mubali Khakimov angumujaliya mukachipinda ka mujeri kwa maola 8 ndipu angumukaniza kulonde chovyu cha munkhwala wo wamwanga chifukwa cha opaleshoni yo angumupanga pambula kuswera. Iyu wasuzgika so ndi matenda nga BP. Apolisi ŵati amutole kunyumba kwaki, angumulonda vipangizu vaki vosi va mazuŵa nganu vo wenavu, Bayibolu, mabuku ngidu ngakusambiriya Bayibolu ndipuso pasipoti. Venga vakusuzga kuti Mubali Khakimov walondiyengi ndalama ya penshoni yo walondiyanga ndipuso kuti wasaniyengi ndalama yakulipira kuchipatala chifukwa wengavi pasipoti.

Pa 28 February 2019, wakweruzga ku khoti ya mutawuni ya ku Khujand wanguyeruzga kuti Mubali Khakimov waŵikiki mujeri kulindizgiya mulandu waki. Kweni kwa maulendu ngatatu, nyengu yo wakhumbikanga kujaliya mujeri kulindizgiya mlandu waki ayisazgiyangakusazgiyangaku. Mwakuti wanguja mwenimo mpaka po a khoti angumaliya kufufuza kweniso kumufumba mafumbu.

Pa 10 September 2019, angumusaniya ndi mulandu ndipu angumuyeruzga kuti wakaje mujeri kwa vyaka 7 ndi hafu. Kweni pa 4 July 2020, ŵaraŵara ajeri angukambiya Mubali Khakimov kuti mwakukoliyana ndi dangu la ku Tajikistan, angamutuzgiyaku vyaka viŵi, myezi yitatu ndi mazuŵa 10. Venivi vilongo kuti Mubali Khakimov watuwengi mujeri pa 16 May 2024.

Tiziŵa kuti Yehova walutirizgengi kuwovya abali ndi azichi ŵidu kuja akuzikira kweniso kukunthiyapu mwalikondwa.—Salimo 20:2.