Pa 28 March mpaka pa 8 April 2024 mutawuni ya Bangkok ku Thailand kunguchitika chiwoneseru cha mabuku cha nambala 22. Chakuchitika ichi chinguchitikiya ku Queen Sirikit National Convention Center ndipu kwenga ŵanthu pafufupi 2 miliyoni. Abali angunozga malu ngo angaŵikapu mabuku ngo ngendi ulongozgi wamampha wa mu Malemba wo ungawovya ŵanthu kuti aleki kuja ndi maŵanaŵanu ukongwa kweniso mo angamaliyana nangu. Chifukwa chakuti abali ndi azichi wo angujipereka kugwiraku ntchitu yakupharazga pamalu po taŵikanga mabuku ayesesanga kuti ayambi kukambisana ndi ŵanthu anandi, ŵanthu 34 angupempha kuti asambirengi Bayibolu.

Panyengu yo akambiskananga, munthulumi munyaki wangukamba kuti mwana waki munthukazi wasuzgika ukongwa maŵanaŵanu. Abali ŵidu angukambiskana nayu fundu zinandi za mu Malemba zo zisanirika mu Chigongwi cha Mlinda cha Na. 1 2023, cha mutu wakuti “Bayibolu Lingakuwovyani Asani Mwe ndi Matenda Ngakusuzgika Maŵanaŵanu.” Abali anguwovya so munthulumi uyu kusaniya nkhani zinyaki pa jw.org zakukwaskana ndi mo angajaliya ndi banja lalikondwa. Iyu wangukondwa ukongwa ndi ulongozgi wamampha wa mu Malemba, nyengu yeniyo mtima waki ungunyamukiya muchanya ndipu wakhumbanga kukambiyaku mwana waki munthukazi.

Munthu yo we ndi udindu ukulu mu boma wanguza pamalu po taŵikanga ma buku ngidu ndipu wangukambiskana ndi mubali kwanyengu yitali. Ŵati awonere mavidiyo nganandi pa jw.org, munthu yo we ndi udindu ukulu mu boma wangufumba vakukwaskana ndi Akaboni aku Yehova kweniso mo ntchitu yidu yakusambiza ŵanthu Bayibolu yitende. Iyu wanguvwa so kuti kusambira Bayibolu nkhwawezi. Munthu yo we ndi udindu ukulu mu boma wangufumba kuti, “Kumbi musambira wuli Bayibolu ndi munthu?” Mubali wangumulongo kabuku kakuti Kondwani ndi Umoyu Kwamuyaya! kweniso wangumulongo mo tisambiriya Bayibolu mwakuchita kukambiskana. Abali angunozga kuti azikambiskani so nyengu yinyaki.

Mzichi wati walongo munthukazi munyaki webusayiti yidu kweniso kumukonkhoske mwakudumuwa mo ntchitu yidu yakupharazga yitende, munthukazi uyu wangufumba kuti: “Kumbi ndi vinthu wuli so vinyaki vo Akaboni achita?” Mzichi wangumulongo vidiyo ya mutu wakuti Kumbi ndi Vinthu Wuli vo Vichitika pa Nyumba ya Ufumu? Munthukazi uyu wanguyiwonere vidiyo. Pavuli paki wangukamba kuti: “Viwoneka kuti kumaunganu kwinu ŵanthu ŵaki mbalisungu kweniso mbakuchezeka! Ndikhumba kuti nani ndiziluteku.” Sabata yakulondopu, munthukazi uyu wangwenda kwa maora pafufupi ngaŵi kuti wakasaniriki pa maunganu.

Tikondwa ukongwa kuwona kuti abali ndi azichi ŵidu ku Bangkok angugwiriskiya ntchitu nyengu yawu kuti awovyi ŵanthu anyaki kuziŵa “chimangu chaku Chiuta cho chiluska kuziŵa vinthu kosi.”—Afilipi 4:7.